ດ້ວຍຄວາມພາກພູມໃຈຂອງປະເທດລາວທີ່ ນາງ ພອນລິສາ ສິນລະປະກິດ ນັກຮຽນຊັ້ນມັດທະຍົມ ມ.3 ໂຮງຮຽນນານາຊາດອ໋ອດສະກ້າ ເມືອງໄຊທານີ ນະຄອນຫຼວງວຽງຈັນ ພາຍໃຕ້ການນໍາພາໄປເຂົ້າຮ່ວມໄປແຂ່ງຂັນໃນຄັ້ງນີ້ໂດຍໂຮງຮຽນນານາຊາດລາວ ສາມາດຍາດໄດ້ລາງວັນຫຼຽນຄໍາ ຊຶ່ງເປັນຫຼຽນຄໍາໜຶ່ງດຽວທີ່ນັກຮຽນຈາກປະເທດລາວຂອງພວກເຮົາຍາດມາໄດ້ໃນການເຂົ້າຮ່ວມແຂ່ງຂັນວິຊາເລກ the Angkor Math Competition (AMC) ຮອບສຸດທ້າຍໃນທົ່ວໂລກ (ເຂດທະວີບອາຊີ) ໃນວັນທີ 22 ທັນວາ ຜ່ານມາ ທີ່ປະເທດກໍາປູເຈຍ.
ສຳລັບການແຂ່ງຂັນໃນລາຍການນີ້ ມີນັກຮຽນເຂົ້າຮ່ວມຫຼາຍກວ່າ 6,500 ຄົນ ທີ່ມາຈາກ 16 ປະເທດ. ພາຍຫຼັງທີ່ໄດ້ສໍາເລັດຈາກການແຂ່ງຂັນຮອບຄັດເລືອກ (ແບບອອນໄລ) ຢູ່ປະເທດຂອງຕົນ, ສໍາລັບນັກຮຽນຈາກປະເທດລາວຜູ້ອື່ນໆກໍສາມາດຍາດໄດ້ຫຼຽນເງິນ ແລະ ຫຼຽນທອງແດງ.
ນາງ ພອນລິສາ ສິນລະປະກິດ ກ່າວວ່າ: ມີຄວາມດີໃຈ, ພາກພູມໃຈຫຼາຍ ທີ່ໄດ້ເຂົ້າຮ່ວມແຂ່ງຂັນວິຊາເລກ ແລະ ສາມາດຍາດໄດ້ຫຼຽນຄໍາ ມາໃຫ້ປະເທດລາວ ເວົ້າລວມ, ເວົ້າສະເພາະ ແມ່ນຫຼຽນແຫ່ງຄວາມພາກພູມໃຈເປັນຢ່າງຍິ່ງສໍາລັບນ້ອງ, ໂຮງຮຽນ ແລະ ຄອບຄົວ, ໂອກາດນີ້, ນ້ອງຂໍສະແດງຄວາມຂອບໃຈເປັນຢ່າງສູງທີ່ໂຮງຮຽນ, ກະຊວງສຶກສາທິການ ແລະ ກິລາ ກໍຄື ກົມທີ່ກ່ຽວຂ້ອງ ໄດ້ໃຫ້ໂອກາດໄປສະແດງຄວາມສາມາດທີ່ຕ່າງປະເທດ, ຂໍສະແດງຄວາມຮູ້ບຸນຄຸນຕໍ່ຄູ, ອາຈານ ທີ່ໄດ້ອົບຮົມ, ບົ່ມສອນ ຄວາມຮູ້ທີ່ລໍ້າຄ່າໃຫ້ແກ່ນ້ອງ ແລະ ຂໍໃຫ້ຄູ, ອາຈານ ທັງຫຼາຍ ຈົ່ງສືບຕໍ່ສິດສອນສົ່ງຄວາມຮູ້ທີ່ດີໆໃຫ້ກັບນ້ອງ ກໍຄື ນັກຮຽນຄົນອື່ນໆ ໃຫ້ມີຄວາມຮູ້ຫຼາຍໆຂຶ້ນທຽບເທົ່າກັບສາກົນ. ໃນຕໍ່ໜ້າ, ນ້ອງຈະເອົາໃຈໃສ່ ສືບຕໍ່ຄົ້ນຄວ້າ, ຮໍ່າຮຽນຢ່າງສະໝໍ່າສະເໝີ ເພື່ອໃຫ້ເປັນນັກຮຽນດີ, ຮຽນເກັ່ງ ຂອງໂຮງຮຽນ ກໍຄື ຄົນດີຂອງສັງຄົມ ແລະ ຄອບຄົວ.
(ຂ່າວ-ພາບ: ແສງຈັນ)
