ວິທະຍຸສາກົນ ແຫ່ງ ສປ ຈີນ, ວັນທີ 20 ມັງກອນນີ້, ທ່ານ ໂດນັນ ທຣຳ ໄດ້ເຂົ້າພິທີສາບານຕົວຂຶ້ນດຳລົງຕຳແໜ່ງ ປະທານາທິບໍດີ ສ.ອາເມລິກາ ຄົນທີ 47 ເປັນສະໄໝທີ 2 ທີ່ຈັດຂຶ້ນ ຢູ່ຫ້ອງໂຖງໃຫຍ່ ຫໍລັດຖະສະພາ ທີ່ນະຄອນຫລວງ ວໍຊິງຕັນ ຂອງ ສ.ອາເມລິກາ, ຫລັງຈາກນັ້ນ, ທ່ານ ໂດນັນ ທຣຳ ໄດ້ກ່າວ ປາຖະກະຖາ ປະກາດ ຍຸບລັດຖະດຳລັດ ຂອງລັດຖະບານ ໂຈ ໄບເດນ ເກືອບ 80 ສະບັບ, ໃນນີ້ ລວມທັງ ສ.ອາເມລິກາ ຈະຖອນຕົວ ອອກຈາກ ສັນຍາ ປາຣີ ກ່ຽວກັບ ການຮັບມື ກັບການປ່ຽນແປງ ຂອງດິນຟ້າ ອາກາດ. ທ່ານ ໂດນັນ ທຣໍາ ໄດ້ປະກາດ ຈະລົງນາມ ໃນລັດຖະດໍາລັດຕ່າງໆ ເຊິ່ງລວມທັງ ການປະກາດ ເຂດຊາຍແດນ ພາກໃຕ້ ຂອງປະເທດ ເຂົ້າສູ່ພາວະສຸກເສີນ ພ້ອມທັງ ສົ່ງກຳລັງທະຫານ ໄປຕໍ່ຕ້ານ ອັນທີ່ເອີ້ນວ່າ “ການເຂົ້າຮຸກຮານ ລັກສະນະ ໄພພິບັດ” ຂອງຜູ້ອົບພະຍົບ ທີ່ຜິດກົດໝາຍ; ຍົກເລີກນະໂຍບາຍໃຫ້ສິດທິພິເສດ ຕໍ່ລົດທີ່ ໃຊ້ພະລັງງານໄຟຟ້າ ເພື່ອກອບກູ້ ອຸດສາຫະກຳ ລົດຍົນ ດັ້ງເດີມ ຂອງ ສ.ອາເມຣິກາ; ສ້າງຕັ້ງ ອົງການພາສີ ຕໍ່ຕ່າງປະເທດ, ເພີ່ມພາສີຕໍ່ຜະລິດຕະພັນ ທີ່ນຳເຂົ້າ ຈາກຕ່າງປະເທດ ແລະອື່ນໆ. ນອກຈາກນີ້, ທ່ານ ໂດນັນ ທຣຳ ຍັງກ່າວ ຢືນຢັນວ່າ: ຈະໃຫ້ການອະໄພຍະໂທດ ຕໍ່ຜູ້ມີສ່ວນຮ່ວມ ໃນການກໍ່ເຫດ ຈະລາຈົນ ທີ່ຫໍ ລັດຖະສະພາ ໃນວັນທີ 6 ມັງກອນ 2021.ຈາກນັ້ນ ທ່ານ ເຈັມສ ເດວິດ ວັນສ, ໄດ້ສາບານຕົວ ຂຶ້ນດຳລົງຕຳແໜ່ງ ເປັນຮອງປະທານາທິບໍດີ ສ.ອາເມລິກາ ໃນວັນດຽວກັນ./.
(ບັນນາທິການຂ່າວ: ຕ່າງປະເທດ)
ຮຽບຮຽງ ຂ່າວໂດຍ: ສະໄຫວ ລາດປາກດີ
