ກົມຄຸ້ມຄອງບໍ່ແຮ່ ຈັດກອງປະຊຸມເປີດກວ້າງ ເພື່ອສະຫລຸບ ແລະ ຖອດຖອນບົດຮຽນການຈັດຕັ້ງປະຕິບັດຕາມວິໄສທັດ ຮອດປີ 2040 ແລະ ຍຸດທະສາດການພັດທະນາແຮ່ທາດ ຮອດປີ 2030 ເພື່ອພັດທະນາວຽກງານຂອງຂະແໜງບໍ່ແຮ່ ປະຈຳປີ 2024 ແລະ ວາງແຜນການ ປີ 2025 ວັນທີ 20-21 ມັງກອນ 2025 ພາຍໃຕ້ການເປັນປະທານຂອງ ທ່ານ ໂພໄຊ ໄຊຍະສອນ ລັດຖະມົນຕີກະຊວງພະລັງງານ ແລະ ບໍ່ແຮ່, ມີບັນດາຫົວໜ້າກົມ, ຫົວໜ້າຫ້ອງການ ແລະ ພາກສ່ວນກ່ຽວຂ້ອງ ເຂົ້າຮ່ວມ.
ທ່ານ ໂພໄຊ ໄຊຍະສອນ ໄດ້ໃຫ້ຮູ້ວ່າ: ການຈັດຕັ້ງປະຕິບັດແຜນພັດທະນາວຽກງານຂອງຂະ ແໜງບໍ່ແຮ່ ປີ 2024 ແມ່ນນອນຢູ່ໃນໄລຍະທີ່ ສະພາບການພາກພື້ນ, ສາກົນ ແລະ ພາຍໃນປະເທດ ມີຄວາມສັບສົນ, ສະພາບຄວາມຫຍຸ້ງຍາກທາງດ້ານເສດຖະກິດ ງົບປະມານ-ການເງິນ, ລາຄານໍ້າມັນ, ອັດ ຕາແລກປ່ຽນເງິນຕາ ແລະ ຄວາມຫຍຸ້ງຍາກໃນດ້ານອື່ນໆ. ສໍາລັບ ຂະແໜງພະລັງງານ ແລະ ບໍ່ແຮ່ ມີບາງແຜນການ, ບາງໂຄງການ ແລະ ໜ້າວຽກຈໍານວນໜຶ່ງ ກໍຖືກຢຸດຊະງັກ, ເກີດຄວາມຊັກຊ້າ ບໍ່ສາ ມາດບັນລຸໄດ້ຕາມກໍານົດເວລາ ແລະ ພົບຄວາມຫຍຸ້ງຍາກໃນດ້ານອື່ນໆ. ແຕ່ເຖິງແນວໃດກໍຕາມ, ພາຍໃຕ້ການນໍາພາ-ຊີ້ນໍາຂອງພັກ, ລັດຖະບານ, ຄະນະພັກ, ອົງການປົກຄອງທ້ອງຖິ່ນ ແລະ ຄວາມຕັດສິນໃຈ, ຄວາມເປັນເຈົ້າການບຸກບືນສູ້ຊົນ ພ້ອມກັນຜ່ານຜ່າຄວາມຫຍຸ້ງຍາກຂອງຖັນແຖວພະນັກງານ, ສະ ມາຊິກພັກ, ລັດຖະກອນ, ກໍາມະກອນໃນທົ່ວຂະແໜງພະລັງງານ ແລະ ບໍ່ແຮ່ ກໍສາມາດຍາດໄດ້ຜົນສໍາເລັດ ທີ່ມີລັກສະນະຕໍ່ເນື່ອງ ແລະ ໜັກແໜ້ນ.
ກອງປະຊຸມຄັ້ງນີ້, ຈັດຂຶ້ນເພື່ອຖອດຖອນບົດຮຽນກ່ຽວກັບ ການພັດທະນາວຽກງານບໍ່ແຮ່, ສະ ຫລຸບໝາກຜົນຂອງການປະຕິບັດແຜນການ, ຊອກໃຫ້ເຫັນຂໍ້ສະດວກ, ຂໍ້ຫຍຸ້ງຍາກ. ນອກນີ້, ກອງປະ ຊຸມຍັງໄດ້ຟັງການລາຍງານ ສະພາບການປະຕິບັດວຽກງານທໍລະນີສາດ ແລະ ບໍ່ແຮ່ ຂອງແຕ່ລະແຂວງ , ຄົ້ນຄວ້າວາງແຜນການສໍາລັບປີ 2025, ການກໍານົດວິທີການ ແລະ ມາດຕະການ ເພື່ອແກ້ໄຂຈຸດອ່ອນ ເພື່ອພ້ອມກັບປັບປຸງໃຫ້ດີຂຶ້ນ.
ການຈັດກອງປະຊຸມຄັ້ງນີ້, ແມ່ນການສ້າງພື້ນຖານສໍາຄັນໃຫ້ແກ່ການປັບປຸງ ການເຄື່ອນໄຫວ ວຽກງານ ແນໃສ່ເຮັດໃຫ້ຂະແໜງພະລັງງານ ແລະ ບໍ່ແຮ່ ແຕ່ລະຂັ້ນ ສາມາດເຮັດວຽກສໍາເລັດຕາມພາລະບົດບາດ ແລະ ໜ້າທີ່ ເປັນເສນາທິການໃຫ້ແກ່ລັດຖະບານ ແລະ ອົງການປົກຄອງທ້ອງຖິ່ນ ກ່ຽວກັບການພັດທະນາວຽກງານບໍ່ແຮ່ ກໍຄື ການພັດທະນາວຽກງານພະລັງງານ ແລະ ບໍ່ແຮ່ ໃຫ້ມີຄຸນນະພາບ ແລະ ມີປະສິດທິຜົນສູງຂຶ້ນ.
ຂໍ້ມູນ-ພາບ: ໜພ ວຽງຈັນໃໝ່
