ໂດຍຕອບຮັບຕາມການເຊື້ອເຊີນ ຂອງ ທ່ານ ອິຊິບະ ຊິເງະຣຸ ນາຍົກລັດຖະມົນຕີ ແຫ່ງ ປະເທດຍີ່ປຸ່ນ, ທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ ພ້ອມດ້ວຍພັນລະຍາ ແລະ ຄະນະ ໄດ້ເດີນທາງໄປຢ້ຽມຢາມ ແລະ ເຮັດວຽກທາງການ ຢູ່ ປະເທດຍີ່ປຸ່ນ ໃນລະຫວ່າງວັນທີ 20-23 ມັງກອນ 2025 ເພື່ອສືບຕໍ່ເພີ່ມທະວີຮັດແໜ້ນສາຍພົວພັນມິດຕະພາບອັນເປັນມູນເຊື້ອ ແລະ ການຮ່ວມມືອັນດີງາມ ໃນໂອກາດສະເຫລີມສະຫລອງວັນສ້າງຕັ້ງສາຍພົວພັນການທູດ ລະຫວ່າງ ສປປ ລາວ ແລະ ຍີ່ປຸ່ນ ຄົບຮອບ 70 ປີ.
ໃນຕອນແລງວັນທີ 21 ມັງກອນ 2025 ນີ້, ທ່ານ ສອນໄຊ ສີພັນດອນ ແລະ ຄະນະ ໄດ້ເຂົ້າຮ່ວມພິທີຕ້ອນຮັບຢ່າງເປັນທາງການ ທີ່ຈັດຂຶ້ນຢ່າງອົບອຸ່ນ ແລະ ສົມກຽດ. ຫລັງຈາກນັ້ນ, ກໍໄດ້ພົບປະສຸດຍອດສອງຝ່າຍກັບ ທ່ານ ອິຊິບະ ຊິເງະຣຸ ນາຍົກລັດຖະມົນຕີ ແຫ່ງ ປະເທດຍີ່ປຸ່ນ ເພື່ອແລກປ່ຽນຄໍາຄິດເຫັນ ໃນການເພີ່ມທະວີ ແລະ ເສີມຂະຫຍາຍການຮ່ວມມື ລະຫວ່າງສອງປະເທດ ກໍຄື ການກໍານົດທິດທາງແຜນການຮ່ວມມືໃນແຕ່ລະຂົງເຂດໃນຕໍ່ໜ້າ, ລວມທັງການແລກປ່ຽນຄໍາເຫັນຕໍ່ສະພາບການພາກພື້ນ ແລະ ສາກົນ ທີ່ສອງຝ່າຍມີຄວາມສົນໃຈ.
ການຢ້ຽມຢາມເຮັດວຽກທາງການ ແລະ ພົບປະສຸດຍອດ ໃນຄັ້ງນີ້, ເປັນນິມິດໝາຍທີ່ມີຄວາມສໍາຄັນທາງປະຫວັດສາດ ອີກຄັ້ງໜຶ່ງຂອງການພົວພັນ ແລະ ຮ່ວມມື ລາວ-ຍີ່ປຸ່ນ ໃນການສະເຫລີມສະຫລອງຄົບຮອບ 70 ປີ ແຫ່ງການສ້າງຕັ້ງສາຍພົວພັນການທູດ ແລະ ຄົບຮອບ 60 ປີ ທີ່ລັດຖະບານຍີ່ປຸ່ນໄດ້ສົ່ງອາສາສະໝັກມາປະຈໍາຢູ່ ສປປ ລາວ ເລີ່ມແຕ່ປີ 1965 ເປັນຕົ້ນມາ. ການຢ້ຽມຢາມຄັ້ງນີ້, ຍັງຖືເປັນໜຶ່ງໃນກິດຈະກໍາສໍາຄັນ ແລະ ເປັນການເປີດການສະເຫລີມສະຫລອງປີມິດຕະພາບ 70 ປີ ການພົວພັນການທູດ ລາວ-ຍີ່ປຸ່ນ, ຍີ່ປຸ່ນ-ລາວ ອີກດ້ວຍ.
ສອງຝ່າຍໄດ້ຕີລາຄາສູງ ຕໍ່ການພົວພັນຮ່ວມມືຂອງສອງປະເທດ ທີ່ມີການເຕີບໃຫຍ່ຂະຫຍາຍຕົວ ທັງໃນສາຍລັດ, ສາຍພັກ, ສາຍສະພາ ແລະ ການທູດປະຊາຊົນ ຕະຫລອດໄລຍະ 70 ປີຜ່ານມາ ໂດຍເຫັນໄດ້ຈາກການນໍາຂັ້ນສູງຂອງສອງປະເທດ ໄດ້ມີການແລກປ່ຽນການຢ້ຽມຢາມ ຢ່າງເປັນປົກກະຕິ; ບັນດາໂຄງການຊ່ວຍເຫລືອ-ຮ່ວມມືຂອງສອງປະເທດ ກໍໄດ້ຮັບການຈັດຕັ້ງປະຕິບັດ ຢ່າງມີຄວາມຄືບໜ້າເປັນກ້າວໆ. ສອງນາຍົກລັດຖະມົນຕີ ລາວ-ຍີ່ປຸ່ນ ມີຄວາມຍິນດີຈະສືບຕໍ່ເຮັດວຽກຮ່ວມກັນ ເພື່ອຊຸກຍູ້ການຮ່ວມມືໃນຂົງເຂດເສດຖະກິດ ກໍຄື ການເພີ່ມຈໍານວນຕົວເລກການຄ້າ-ການລົງທຶນ ລະຫວ່າງສອງປະເທດ ໃຫ້ຫລາຍຂຶ້ນ, ການສົ່ງເສີມການໄປມາຫາສູ່ຂອງປະຊາຊົນສອງຊາດ ໂດຍສືບຕໍ່ຊຸກຍູ້ພາກທຸລະກິດຂອງສອງຝ່າຍ ໃຫ້ສາມາດເປີດຖ້ຽວບິນໂດຍກົງ ລະຫວ່າງສອງປະເທດ ໄດ້ໃນອະນາຄົດອັນໃກ້ນີ້, ເຊິ່ງຝ່າຍລາວ ກໍມີແຜນຈະເພີ່ມໄລຍະເວລາພັກເຊົາ ໂດຍຍົກເວັ້ນວີຊາ ໃຫ້ແກ່ພົນລະເມືອງຍີ່ປຸ່ນ ທີ່ຖືໜັງສືຜ່ານແດນທໍາມະດາ ຈາກ 15 ເປັນ 30 ວັນ. ພ້ອມດຽວກັນນີ້, ສອງຝ່າຍກໍໄດ້ເຫັນດີຈະສືບຕໍ່ໃຫ້ການສະໜັບສະໜູນເຊິ່ງກັນ ແລະ ກັນ ໃນເວທີພາກພື້ນ ແລະ ສາກົນ ໂດຍສະເພາະໃນຂອບການຮ່ວມມື ອາຊຽນ-ຍີ່ປຸ່ນ, ການຮ່ວມມື ແມ່ນໍ້າຂອງ-ຍີ່ປຸ່ນ ກໍຄື ຂອບການຮ່ວມມືອົງການສະຫະປະຊາຊາດ ແລະ ອົງການຈັດຕັ້ງສາກົນຕ່າງໆ.
ໃນໂອກາດນີ້, ທ່ານ ສອນໄຊ ສີພັນດອນ ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ແລະ ສະແດງຄວາມຍິນດີ ທີ່ໄດ້ພົບປະກັບ ທ່ານ ອິຊິບະ ຊິເງະຣຸ ອີກຄັ້ງ, ພາຍຫລັງທີ່ໄດ້ພົບປະກັນ ຢູ່ ນະຄອນຫລວງວຽງຈັນ ໃນໄລຍະກອງປະຊຸມສຸດຍອດອາຊຽນ ແລະ ກອງປະຊຸມອື່ນໆທີ່ກ່ຽວຂ້ອງ ໃນເດືອນຕຸລາ 2024 ທີ່ຜ່ານມາ. ທ່ານ ສອນໄຊ ສີພັນດອນ ຍັງໄດ້ສະແດງຄວາມຂອບໃຈຕໍ່ການຊ່ວຍເຫລືອອັນລໍ້າຄ່າຈາກ ລັດຖະບານ ແລະ ປະຊາຊົນຍີ່ປຸ່ນ ເຊິ່ງໄດ້ປະກອບສ່ວນສໍາຄັນ ເຂົ້າໃນການພັດທະນາເສດຖະກິດ-ສັງຄົມ ຂອງ ສປປ ລາວ ໃນຕະຫລອດໄລຍະຜ່ານມາ ເປັນຕົ້ນ ແມ່ນການຊ່ວຍເຫລືອ ແລະ ສະໜັບສະໜູນ ສປປ ລາວ ໃນການເປັນປະທານອາຊຽນ ໃນປີ 2024 ທີ່ຜ່ານມາ; ບັນດາໂຄງການຊ່ວຍເຫລືອຕ່າງໆທີ່ສໍາຄັນ ໃນຂົງເຂດການພັດທະນາຊັບພະຍາກອນມະນຸດ ແລະ ໂຄງລ່າງພື້ນຖານ; ການຊ່ວຍເຫລືອໃນຂະແໜງການເກັບກູ້ລະເບີດບໍ່ທັນແຕກ (UXO). ພ້ອມກັນນີ້, ທ່ານ ສອນໄຊ ສີພັນດອນ ກໍໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ບົດບາດຂອງຍີ່ປຸ່ນ ໃນການເປັນເຈົ້າພາບ ຈັດງານວາງສະແດງໂລກ Expo Osaka 2025, ພ້ອມທັງເຊື່ອໝັ້ນວ່າ ດ້ວຍປະສົບການ ແລະ ຄວາມເອົາໃຈໃສ່ຂອງລັດຖະບານຍີ່ປຸ່ນ, ການເປັນເຈົ້າພາບຈັດງານວາງສະແດງຄັ້ງນີ້ ຈະໄດ້ຮັບຜົນສໍາເລັດອັນຈົບງາມ ເຊິ່ງຝ່າຍລາວ ກໍກໍາລັງກະກຽມເຂົ້າຮ່ວມຢ່າງຕັ້ງໜ້າ ແລະ ສະແດງຄວາມຂອບໃຈຕໍ່ການອໍານວຍຄວາມສະດວກຕ່າງໆຈາກຝ່າຍຍີ່ປຸ່ນ.
ໃນໂອກາດດຽວກັນ, ທ່ານ ອິຊິບະ ຊິເງະຣຸ ກໍໄດ້ສະແດງຄວາມຍິນດີຕ້ອນຮັບອັນອົບອຸ່ນ ແລະ ຂອບໃຈຕໍ່ການຕອບຮັບຄໍາເຊີນ ແລະ ດໍາເນີນການຢ້ຽມຢາມຍີ່ປຸ່ນໃນຄັ້ງນີ້ຂອງທ່ານ ນາຍົກລັດຖະມົນຕີ ແຫ່ງ ສປປ ລາວ ແລະ ຄະນະ, ພ້ອມທັງໄດ້ສະແດງຄວາມໝາຍໝັ້ນວ່າ ຈະສືບຕໍ່ໃຫ້ການສະໜັບສະໜູນ ແລະ ຊ່ວຍເຫລືອແກ່ ລັດຖະບານ ແລະ ປະຊາຊົນລາວ ທັງໃນຂອບສອງຝ່າຍ ແລະ ຫລາຍຝ່າຍ ໃນອະນາຄົດ.
ພາຍຫລັງສໍາເລັດການພົບປະ, ສອງນາຍົກລັດຖະມົນຕີ ລາວ ແລະ ຍີ່ປຸ່ນ ໄດ້ຮ່ວມກັນລົງນາມ ໃນຖະແຫລງການຮ່ວມ ວ່າດ້ວຍ ການຍົກລະດັບເປັນ ຄູ່ຮ່ວມຍຸດທະສາດຮອບດ້ານ ແລະ ໄດ້ເປັນສັກຂີພິຍານໃນພິທີແລກປ່ຽນເອກະສານໂຄງການຊ່ວຍເຫລືອລ້າຈາກລັດຖະບານຍີ່ປຸ່ນ ໃນໂຄງການປັບປຸງສູນພັດທະນາຄູຂັ້ນແຂວງ, ພ້ອມທັງໄດ້ຮ່ວມກັນຖະແຫລງຂ່າວ ຕໍ່ບັນດາສື່ມວນຊົນ ກ່ຽວກັບ ຜົນສໍາເລັດຂອງການພົບປະສຸດຍອດສອງຝ່າຍໃນຄັ້ງນີ້. ຫລັງຈາກນັ້ນ, ທ່ານ ສອນໄຊ ສີພັນດອນ ແລະ ຄະນະ ກໍໄດ້ສືບຕໍ່ເຂົ້າຮ່ວມງານລ້ຽງຮັບຮອງອາຫານຄໍ່າແບບເຮັດວຽກ ເປັນກຽດຈັດໂດຍ ທ່ານ ອິຊິບະ ຊິເງະຣຸ ນາຍົກລັດຖະມົນຕີ ແຫ່ງ ຍີ່ປຸ່ນ.
ຂ່າວ-ພາບ: ກຕທ
