ວັນທີ 19 ມັງກອນ 2025, ຢູ່ທີ່ຫ້ອງປະຊຸມຫ້ອງວ່າການປົກຄອງ ເມືອງວຽງໄຊ ແຂວງຫົວພັນ ໄດ້ຈັດກອງປະຊຸມສ່ອງແສງວຽກງານຮອບດ້ານປະຈຳເດືອນທີ 2 ໃນການຮ່ວມມືກວດກູ້ ແລະ ທຳລາຍ ລະເບີດບໍ່ທັນແຕກ ລາວ-ຣັດເຊຍ, ໂດຍການເຂົ້າຮ່ວມຂອງ ສະຫາຍ ພົນຕີ ປະສິດ ທ່ຽງທໍາ ຮອງລັດຖະມົນຕີກະຊວງປ້ອງກັນປະເທດ ແຫ່ງ ສປປ ລາວ ຫົວໜ້າຄະນະຊີ້ນໍາລວມ ການຮ່ວມມືແກ້ໄຂ ລບຕ ລາວ-ຣັດເຊຍ, ມີ ສະຫາຍ ພັນເອກ ລີຄາເຊັບ ອັນເດຣ ເປຣໂຕ ວິດ ທູດປ້ອງກັນຊາດແຫ່ງ ສ ຣັດເຊຍ ປະຈຳ ສປປ ລາວ, ພ້ອມດ້ວຍຄະນະຝ່າຍ ລາວ-ຣັດເຊຍ ເຂົ້າຮ່ວມ.
ສະຫາຍ ພັນໂທ ມັກຊີມ ເຕີຄ່າເຊັບ ຫົວໜ້າໜ່ວຍງານເກັບກູ້ລະເບີດ ສູນກວດກູ້ມິນສາກົນ ກຳລັງປະກອບອາວຸດ ແຫ່ງ ສ ຣັດເຊຍ ໄດ້ລາຍງານການຈັດຕັ້ງປະຕິບັດວຽກງານກວດກູ້ໃນ 1 ເດືອນຜ່ານມາ ໃຫ້ຮູ້ວ່າ ນັບຕັ້ງແຕ່ວັນທີ 11 ພະຈິກ 2024 ຫາ 18 ມັງກອນ 2025, ກຳລັງກວດກູ້ມິນສາກົນ ແຫ່ງ ສ ຣັດເຊຍ ກວດກູ້ລະເບີດບໍ່ທັນແຕກຢູ່ເຂດສະໜາມກໍ່ສ້າງຫ້ອງການປົກຄອງເມືອງ ແລະ ພື້ນທີ່ກະສິກຳສິກຳເມືອງ ຢູ່ບ້ານນາໄກ່ ເມືອງວຽງໄຊ ແຂວງຫົວພັນ ສາມາດກວດກູ້ພື້ນທີ່ສໍາເລັດແລ້ວ 9,11 ເຮັກຕາ, ກວດກູ້ລະເບີດໄດ້ 189 ໜ່ວຍ, ເສດເຫຼັກໄດ້ທັງໝົດ 4,755 ສີ້ນສ່ວນ, ເສດສະເກັດທັງໝົດ 11,841 ສີ້ນສ່ວນ. ຈາກນັ້ນຄະນະທັງ 2 ຝ່າຍໄດ້ປຶກສາຫາລື ປະກອບຄໍາຄິດເຫັນທີ່ສືບຕໍ່ຈັດຕັ້ງປະຕິບັດວຽກງານໃນໄລຍະຕໍ່ໜ້າ
ໂອກາດນີ້, ສະຫາຍ ພົນຕີ ປະສິດ ທ່ຽງທໍາ ໄດ້ສະແດງຄວາມຍ້ອງຍໍຊົມເຊີຍຕໍ່ບັນດາຄະນະຊີ້ນຳ, ຄະນະຮັບຜິດຊອບພາກສະໜາມ ແລະ ພະນັກງານ- ນັກຮົບກວດກູ້ລະເບີດຝ່າຍ ລາວ-ຣັດເຊຍ ທຸກສະຫາຍ ທີ່ໄດ້ເອົາໃຈໃສ່ໃນການປະຕິບັດໜ້າທີ່, ສຸມສະຕິປັນຍາ, ທຸ້ມເທເຫື່ອແຮງເຂົ້າໃນການປະຕິບັດໜ້າທີຢ່າງບໍ່ຮູ້ອິດຮູ້ເມື່ອຍ, ມີຄວາມອົດທົນ, ບຸກບືນຜ່ານຜ່າທຸກຄວາມຫຍຸ້ງຍາກນານາປະການ, ມີຄວາມຕັດສິນໃຈ ແລະ ມີຄວາມຮັບຜິດຊອບສູງ.
ໃນວັນດຽວກັນ ສະຫາຍ ພົນຕີ ປະສິດ ທ່ຽງທໍາ ພ້ອມດ້ວຍຄະນະ ຍັງໄດ້ລົງກວດກາສະໜາມກວດກູ້ ເຂດກໍ່ສ້າງຫ້ອງການປົກຄອງເມືອງ ແລະ ພື້ນທີ່ກະສິກຳເມືອງ ຢູ່ບ້ານນາໄກ່ ຕື່ມອີກ.
