ວັນທີ 17 ມັງກອນ ຜ່ານມານີ້, ອະດີດນັກຮຽນນາຍທະຫານ ກອງທັບປະຊາຊົນລາວ ທີ່ຮຽນຈົບຈາກ ສສ ຫວຽດນາມ ໄດ້ຈັດງານພົບປະ ເນື່ອງໃນໂອກາດວັນສ້າງຕັ້ງກອງທັບປະຊາຊົນຫວຽດນາມ ຄົບຮອບ 80 ປີ ແລະ ວັນສ້າງຕັ້ງກອງທັບປະຊາຊົນລາວ ຄົບຮອບ 76 ປີ, ໂດຍມີ ສະຫາຍ ພົນໂທ ຄຳລຽງ ອຸທະໄກສອນ ລັດຖະມົນຕີ ກະຊວງປ້ອງກັນປະເທດ ແຫ່ງ ສປປ ລາວ ພ້ອມດ້ວຍຄະນະ, ມີ ສະຫາຍ ພົນໂທ ເລ ກວາງ ມິ່ງ ຮອງຫົວໜ້າກົມໃຫຍ່ການເມືອງກອງທັບ ປະຊາຊົນຫວຽດນາມ ພ້ອມດ້ວຍຄະນະ, ມີ ບັນດາອະດີດນັກຮຽນນາຍທະຫານ ກອງທັບປະຊາຊົນລາວ ທີ່ຮຽນຈົບຈາກ ສສ ຫວຽດນາມ ແລະ ແຂກຖືກເຊີນ ເຂົ້າຮ່ວມ.
ໃນພິທີ, ສະຫາຍ ພົນໂທ ຄຳລຽງ ອຸທະໄກສອນ ກ່າວສະແດງຄວາມຂອບໃຈຢ່າງຈິງໃຈຕໍ່ ສະຫາຍ ພົນໂທ ເລ ກວາງ ມິ່ງ ຮອງຫົວໜ້າກົມໃຫຍ່ການເມືອງກອງທັບ ປະຊາຊົນຫວຽດນາມ ທີ່ໄດ້ສະຫຼະເວລາອັນມີຄ່າມາຢ້ຽມຢາມ ສປປ ລາວ ໃນຄັ້ງນີ້ ຊຶ່ງປີນີ້ ສປປ ລາວ ໄດ້ເປັນເຈົ້າພາບ ຈັດງານພົບປະນັກສຶກສາ ທະຫານລາວ ທີ່ເຄີຍຮຽນຢູ່ ສສ ຫວຽດນາມ. ພ້ອມທັງສະແດງຄວາມຂອບໃຈຢ່າງຈິງໃຈມາຍັງການນຳກະຊວງປ້ອງກັນປະເທດຫວຽດນາມ ທີ່ໄດ້ສ້າງໂອກາດໃຫ້ນາຍທະຫານ, ນັກສຶກສາທະຫານລາວ ທີ່ໄປຮຽນຢູ່ຫວຽດນາມ ໄດ້ພົບປະ ແລະ ສະແດງຄວາມຮັກແພງຕໍ່ນາຍທະຫານ, ຜູ້ບັນຊາການ, ຄູອາຈານ, ໂຮງຮຽນກອງທັບຫວຽດນາມ, ເນື່ອງໃນໂອກາດສະເຫຼີມສະຫຼອງ 80 ປີ ແຫ່ງວັນສ້າງຕັ້ງກອງທັບປະຊາຊົນຫວຽດນາມ ແລະ 76 ປີແຫ່ງວັນສ້າງຕັ້ງກອງທັບປະຊາຊົນລາວ ແລະ ອວຍພອນໃຫ້ກອງທັບປະຊາຊົນຫວຽດນາມ ແລະ ກອງທັບປະຊາຊົນລາວນັບມື້ນັບໝັ້ນຄົງເຂັ້ມແຂງ ແລະ ການພົວພັນລະຫວ່າງສອງກອງທັບໃຫ້ນັບມື້ນັບໝັ້ນຄົງກວ່າເກົ່າ.
ໂອກາດດັ່ງກ່າວ, ສະຫາຍ ພົນໂທ ເລ ກວາງ ມິ່ງ ກໍໄດ້ສະແດງຄວາມປິຕິຊົມຊື່ນຕໍ່ການພັດທະນາຢ່າງບໍ່ຢຸດຢັ້ງຂອງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ຫວຽດນາມ-ລາວ ໂດຍປະທານ ໂຮ່ຈິມິນ, ປະທານ ໄກສອນ ພົມວິຫານ, ປະທານ ສຸພານຸວົງ ກໍ່ສ້າງ ແລະ ບຳລຸງສ້າງ ຮຸ່ນຂອງຜູ້ນໍາ. ບັນດາໂຮງຮຽນ, ໂຮງຮຽນກອງທັບປະຊາຊົນຫວຽດນາມ ມີຄວາມພາກພູມໃຈທີ່ພັກ, ລັດ ແລະກອງທັບປະຊາຊົນລາວ ມີຄວາມໄວ້ເນື້ອເຊື່ອໃຈ ໄດ້ສົ່ງພະນັກງານ, ນັກຮົບທີ່ເກັ່ງກ້າສາມາດໄປບໍາລຸງສ້າງຝຶກແອບ ຖ່າຍທອດຄວາມຮູ້ມາພັດທະນາກົມກອງຂອງຕົນ, ໃນຕໍ່ໜ້າຈະສືບຕໍ່ຊ່ວຍເຫຼືອຊຶ່ງກັນ ແລະ ກັນ ເຊື່ອໝັ້ນວ່າບັນດານັກສຶກສາລາວ ທີ່ຮຽນຈົບມາແມ່ນປັດໄຈສຳຄັນ ໃນການປະກອບສ່ວນກໍ່ສ້າງກອງທັບປະຊາຊົນ ປະຕິວັດລາວ ໃຫ້ມີລະບຽບວິໄນ, ມີຄວາມເຂັ້ມແຂງ, ປະຕິບັດພາລະກິດສ້າງສາ ແລະ ປົກປັກຮັກສາປະເທດຊາດຢ່າງສຳເລັດຜົນ, ເປັນຂົວຕໍ່ເສີມຂະຫຍາຍນ້ຳໃຈສາມັກຄີແບບພິເສດຫວຽດນາມ-ລາວ ໃຫ້ນັບມື້ນັບແໜ້ນແຟ້ນຍິ່ງໆຂຶ້ນ.
ຂ່າວ-ພາບ: ໄພນາລິນ
