ຄະນະປະຈຳພັກກະຊວງແຮງງານ ແລະ ສະຫວັດດີການ-ສັງຄົມ (ຮສສ) ໄດ້ຈັດກອງປະຊຸມຄົບຄະນະບໍລິຫານງານພັກເປີດກວ້າງຄັ້ງທີ 5 ສະໄໝທີ VI ຂຶ້ນໃນລະຫວ່າງວັນທີ 16-17 ມັງກອນນີ້ ທີ່ກະຊວງ ຮສສ ພາຍໃຕ້ການເປັນປະທານຂອງສະຫາຍນາງ ໃບຄຳ ຂັດທິຍະ ເລຂາຄະນະພັກ ລັດຖະມົນຕີກະຊວງ ຮສສ, ມີສະຫາຍເລຂາພັກ, ຮອງເລຂາ, ຄະນະໜ່ວຍພັກ, ສະມາຊິກພັກ, ພະນັກງານຫຼັກແຫຼ່ງເຂົ້າຮ່ວມ.
ໃນພິທີ, ສະຫາຍ ລີປາວຢ່າງ ຄະນະປະຈຳພັກກະຊວງ ຮອງລັດຖະມົນຕີກະຊວງ ຮສສ ໄດ້ຜ່ານຮ່າງບົດສະຫຼຸບຕີລາຄາການຊີ້ນໍາ-ນໍາພາຂອງອົງຄະນະພັກກະຊວງ ຮສສ ປະຈຳປີ 2024 ແລະ ທິດທາງແຜນການຈຸດສຸມ ປີ 2025, ສະຫາຍ ພົງໄຊສັກ ອິນຖາລາດ ກໍາມະການຄະນະພັກກະຊວງ ຮອງລັດຖະມົນຕີກະຊວງ ຮສສ ໄດ້ຜ່ານຮ່າງບົດສໍາຫຼວດການນໍາພາລວມຂອງຄະນະພັກປະຈໍາປີ 2024. ຈາກນັ້ນ, ບັນດາສະຫາຍຜູ້ແທນກອງປະຊຸມໄດ້ປະກອບຄໍາຄິດຄໍາເຫັນຕໍ່ຮ່າງບົດສະຫຼຸບຕີລາຄາການຊີ້ນໍາ-ນໍາພາຂອງອົງຄະນະພັກກະຊວງ ຮສສ ປະຈຳປີ 2024 ແລະ ທິດທາງແຜນການຈຸດສຸມປີ 2025 ແລະ ບົດສໍາຫຼວດການນໍາພາລວມ.
ກອງປະຊຸມຄັ້ງນີ້ຈັດຂຶ້ນ ເພື່ອສະຫຼຸບຕີລາຄາການເຄື່ອນໄຫວນໍາພາ-ຊີ້ນໍາວຽກງານຂອງອົງຄະນະພັກປະຈໍາ ປີ 2024 ແລະ ທິດທາງແຜນການປະຈໍາປີ 2025; ຕີລາຄາການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ XI ຂອງພັກ ແລະ ມະຕິກອງປະຊຸມໃຫຍ່ຄັ້ງທີ 6 ຂອງອົງຄະນະພັກ; ບົດສໍາຫຼວດການນໍາພາລວມຂອງຄະນະບໍລິຫານງານພັກກະຊວງປະຈໍາປີ 2024; ແຜນການເຄື່ອນໄຫວຮອບດ້ານຂອງຄະນະບໍລິຫານງານພັກກະຊວງປະຈໍາປີ 2025.
ຂ່າວ-ພາບ: ພູວັນ
