“ລາບ” ຖືວ່າເປັນອາຫານພື້ນເມືອງຂອງລາວ ທີ່ມີລົດຊາດ ແລະ ເອກະລັກສະເພາະ, ເຂົ້າໜຽວກັບລາບ ໄດ້ກາຍເປັນສ່ວນໜຶ່ງທ່ີສໍາຄັນໃນຊີວິດປະຈໍາວັນຂອງປະຊາຊົນລາວບັນດາເຜົ່າ ເຊິ່ງບັນພະບູລຸດເຮົາໄດ້ມອບໃຫ້ເປັນມໍລະດົກ ແລະ ສືບທອດກັນມາຍາວນານຈົນເຖິງທຸກວັນນີ້, ເມື່ອຫວນຄືນຫລັງບໍ່ວ່າຈະເປັນບຸນປະເພນີ, ງານແຕ່ງດອງ ແລະ ງານສ້າງສັນຕ່າງໆແມ່ນບໍ່ເຄີຍປະຖິ້ມລາບ, ຈະເຫັນລາບຢູ່ເທິງໂຕະ, ພາເຂົ້າໂດຍສະເພາະແມ່ນລາບປາ, ລາບຊີ້ນງົວ, ລາບເປັດ, ລາບໄກ່ງວງ… ສະນ້ັນ ເພ່ືອໃຫ້ລາບກາຍເປັນເອກະລັກວັດທະນະທໍາ ອາຫານລາວຕະຫລອດໄປ ຫລາ້ສຸດ, ສະມາຄົມນັກທຸລະກິດແມ່ຍິງໄດ້ສົມທົບກັບບັນດາຂະແໜງການທີ່ກ່ຽວຂ້ອງຍື່ນໜັງສືເຖິງກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ເປັນທີ່ຮຽບຮ້ອຍແລ້ວເພື່ອສະເໜີເອົາອາຫານລາວ ກໍຄື “ລາບ” ເຂົ້າຈົດທະບຽນເປັນມໍລະດົກໂລກໃນອະນາຄົດ.
ທ່ານ ນາງ ຈັນທະຈອນ ວົງໄຊ ຮອງປະທານສະພາການຄ້າ ແລະ ອຸດສາຫະກໍາແຫ່ງຊາດ, ທັງເປັນປະທານສະມາຄົມນັກທຸລະກິດ ແມ່ຍິງກ່າວວ່າ: ການທີ່ສະເໜີເອົາ “ລາບ” ເຊິ່ງເປັນອາຫານພື້ນເມືອງຂອງລາວເຂົ້າໄປຈົດທະບຽນເປັນມໍລະດົກໂລກ ກໍຍ້ອນວ່າ “ລາບ” ເປັນອາຫານທີ່ຢູ່ຄູ່ກັບຄົນລາວ ແລະ ມີຄວາມເປັນມາເປັນເວລາດົນນານ ແລະ ມີເອກະລັກບໍ່ຄືກັບປະເທດອື່ນ, ເວລາຈັດງານສໍາຄັນຕ່າງໆເຊັ່ນ: ແຕ່ງດອງ, ງານລ້ຽງ, ຂຶ້ນເຮືອນໃໝ່, ສູ່ຂວັນ ແລະ ອື່ນໆ ຕ້ອງມີ “ລາບ” ຢູ່ດ້ວຍທຸກຄັ້ງເຮັດໃຫ້ໝັ້ນໃຈໄດ້ວ່າ “ລາບ” ອາຫານພື້ນເມືອງຂອງລາວເປັນເອກະລັກ ແລະ ການປຸງແຕ່ງທີ່ບ່ໍຄືກັບປະເທດອື່ນໆ ແລະ ສາມາດສະເໜີຂໍຈົດທະບຽນເປັນມໍລະດົກໂລກໄດ້ໃນຕໍ່ໜ້າ.
ໂດຍ: ລູກສາວຫລ້າ
