ວັນທີ 15 ມັງກອນ 2025 ທ່ານ ທອງລຸນ ສີສຸລິດ ເລຂາທິ ການໃຫຍ່ ປະທານປະເທດ ພ້ອມດ້ວຍຄະນະ ໄດ້ຢ້ຽມຢາມພື້ນຖານການຜະລິດຂອງປະຊາຊົນ ຢູ່ບ້ານຫຼັກຂາວ ເມືອງທ່າແຕງ ແຂວງເຊກອງ ຖືກຕ້ອນຮັບໂດຍທ່ານ ເຫຼັກໄຫຼ ສີວິໄລ ເຈົ້າແຂວງເຊກອງ ທ່ານ ແສງລາຕີ ຫຼອມຍະເດດ ເຈົ້າເມືອງທ່າແຕງ ພ້ອມດ້ວຍພາກສ່ວນກ່ຽວຂ້ອງຂັ້ນແຂວງ ແລະ ຂັ້ນເມືອງ.
ໃນການຢ້ຽມຢາມພື້ນຖານການຜະລິດ ຂອງປະຊາຊົນບ້ານຫຼັກຂາວຄັ້ງນີ້ ທ່ານປະທານປະເທດໄດ້ລົງເຄື່ອນໄຫວ ຢ້ຽມຢາມເຂດການຜະລິດກະສິກຳ ໂດຍສະເພາະການປູກຜັກກະລໍ່າປີ ໝາກເຂືອ ໝາກເຜັດ ແລະ ພືດຜັກອື່ນໆຂອງປະຊາຊົນທີ່ເປັນກຸ່ມການຜະລິດຂອງເມືອງ ຂອງແຂວງ ທີ່ນຳໃຊ້ເຄື່ອງມືທັນສະໄໝ ເປັນຕົ້ນໂຄງການຝຸ່ນຝ່ອຍຢູ່ບ້ານດັ່ງກ່າວ ຈາກນັ້ນໄດ້ຟັງການລາຍງານໂດຍຫຍໍ້ ຈາກປະຊາຊົນກຸ່ມການຜະລິດໃນແຕ່ລະຂັ້ນຕອນຢ່າງລະອຽດຈະແຈ້ງ ເພື່ອວາງແຜນຈະສູ້ຊົນໃນຕໍ່ໜ້າໃຫ້ພໍ່ຄ້າ-ແມ່ຄ້າ ທີ່ມາຊື້ຢູ່ກັບທີ່ ແລະ ນໍາໄປວາງຈຳໜ່າຍຢູ່ຕະຫຼາດພາຍໃນເມືອງ ຕ່າງເມືອງ ແລະ ຕ່າງແຂວງໃຫ້ນັບມື້ຫຼາຍຂຶ້ນ.
ໂອກາດນີ້ທ່ານປະທານປະເທດໄດ້ສະແດງຄວາມຊົມເຊີຍຕໍ່ການນໍາເມືອງ ແລະ ແຂວງທີ່ໄດ້ເອົາໃຈໃສ່ ຊີ້ນໍາ-ນໍາພາເຮັດໃຫ້ເມືອງທ່າແຕງ ມີການພັດທະນາດີສົມຄວນ ພ້ອມນັ້ນທ່ານຍັງເນັ້ນໃຫ້ເມືອງເອົາໃຈໃສ່ແກ້ໄຂບັນຫາຄວາມທຸກຍາກຂອງປະຊາ ຊົນ ໂດຍອີງໃສ່ທ່າແຮງບົ່ມຊ້ອນຂອງເມືອງ ເອົາໃຈໃສ່ສ້າງຄອບ ຄົວຕົວແບບດ້ານຕ່າງໆ ໃຫ້ນັບມື້ຫຼາຍຂຶ້ນ ໂດຍມີການວາງຄາດ ໝາຍຢ່າງລະອຽດ ຍົກສູງການປະຕິບັດວຽກງານຂອງສູນພັດ ທະນາກະສິກຳຕ່າງໆໃຫ້ມີຄວາມເຂັ້ມແຂງ ເພື່ອເສີມຂະຫຍາຍຄອບຄົວຕົວແບບ ກຸ່ມການຜະລິດເປັນບ່ອນຝຶກອົບຮົມປະຊາ ຊົນໃຫ້ມີການຜະລິດຫຼາຍຮູບຫຼາຍສີ ຕິດພັນກັບການຊອກຕະຫຼາດພາຍໃນ ແລະ ຕ່າງປະເທດ ສືບຕໍ່ຂະຫຍາຍເນື້ອທີ່ການຜະລິດ ແລະ ຜົນຜະລິດ ຮັບປະກັນທັງຄຸນນະພາບ ແລະ ປະລິ ມານ ເພື່ອຕອບສະໜອງຄວາມຕ້ອງການຂອງຕະຫຼາດ ທີ່ນັບມື້ຫຼາຍຂຶ້ນ ສາມາດຮອງຮັບການແຂ່ງຂັນໃນອະນາຄົດ ແລະ ການປຸງແຕ່ງຜະລິດຕະພັນກໍ່ໃຫ້ມີຫຼາຍຮູບຫຼາຍສີຕາມທິດສີຂຽວ ແລະ ຍືນຍົງ ເພື່ອເຮັດໃຫ້ປະຊາຊົນຫຼຸດພົ້ນອອກຈາກຄວາມ ທຸກຍາກເທື່ອລະກ້າວ ພາຍຫຼັງຢ້ຽມຢາມພື້ນຖານການຜະລິດຂອງປະຊາຊົນແລ້ວ ທ່ານປະທານປະເທດໄດ້ສືບຕໍ່ເຄື່ອນໄຫວຢ້ຽມຢາມ ແຂວງສາລະວັນຕື່ມອີກ.
