ຄະນະບໍລິຫານງານຊາວໜຸ່ມ ກະຊວງການຕ່າງປະເທດ ໄດ້ດໍາເນີນກອງປະຊຸມໃຫຍ່ຜູ້ແທນຄັ້ງທີ XII ຂອງຕົນຂຶ້ນຢ່າງເປັນທາງການ ໃນຕອນເຊົ້າຂອງວັນທີ 14 ມັງກອນ 2025 ທີ່ກະຊວງການຕ່າງປະເທດ, ພາຍໃຕ້ການເປັນປະທານ ຂອງສະຫາຍ ນາງ ມຸກດາວັນ ສີສຸລິດ ກໍາມະການສູນກາງຊາວໜຸ່ມປະຊາຊົນ ປະຕິວັດລາວ ກໍາມະການຄະນະພັກກະຊວງ ເລຂາຄະນະບໍລິຫານງານຊາວໜຸ່ມກະຊວງການຕ່າງປະເທດ. ໃຫ້ກຽດເຂົ້າຮ່ວມ ຂອງສະຫາຍ ທອງສະຫວັນ ພົມວິຫານ ກໍາມະການສູນກາງພັກເລຂາຄະນະພັກກະຊວງ ລັດຖະມົນຕີກະຊວງການຕ່າງປະເທດ; ສະຫາຍ ມອນໄຊ ລາວມົວຊົ່ງ ກໍາມະການສໍາຮອງສູນກາງພັກ ເລຂາຄະນະບໍລິຫານງານສູນກາງຊາວໜຸ່ມປະຊາຊົນ ປະຕິວັດລາວ; ໂດຍມີຄະນະພັກກະຊວງ, ບັນດາເລຂາໜ່ວຍພັກ ແລະ ຕາງໜ້າໜ່ວຍພັກຈາກຫ້ອງການ ແລະ ບັນດາກົມຕ່າງໆອ້ອມຂ້າງກະຊວງ, ອົງການຈັດຕັ້ງມະຫາຊົນ, ຄະນະບໍລິຫານງານຊາວໜຸ່ມ, ສະມາຊິກຊາວໜຸ່ມກະຊວງການຕ່າງປະເທດ ແລະ ບັນດາແຂກຖືກເຊີນຈາກສູນກາງຊາວໜຸ່ມ ແລະ ກະຊວງອ້ອມຂ້າງຈໍານວນໜຶ່ງ ເຂົ້າຮ່ວມຢ່າງພ້ອມພຽງ.
ກອງປະຊຸມໃຫຍ່ຄັ້ງນີ້ ຈະໄດ້ຮັບຟັງການລາຍງານ ກ່ຽວກັບການຈັດຕັ້ງປະຕິບັດວຽກງານຊາວໜຸ່ມ ຂອງຄະນະຊາວໜຸ່ມກະຊວງການຕ່າງປະເທດ ໃນໄລຍະຜ່ານມາ ແລະ ການວາງແຜນການທິດທາງໃນຕໍ່ໜ້າ ຊຶ່ງໄດ້ຍົກໃຫ້ເຫັນເຖິິງຜົນສໍາເລັດອັນໃຫຍ່ຫຼວງ ທີ່ຊາວໜຸ່ມຂະແໜງການຕ່າງປະເທດ ສາມາດຍາດມາໄດ້ ໃນຕະຫຼອດໄລຍະ 5 ປີຜ່ານມາ, ພ້ອມທັງຕີລາຄາຄືນຈຸດດີ ທີ່ຕ້ອງເສີມຂະຫຍາຍ ແລະ ຂໍ້ຄົງຄ້າງຈໍານວນໜຶ່ງ ທີ່ຕ້ອງໄດ້ສືບຕໍ່ປັບປຸງແກ້ໄຂໃນຕໍ່ໜ້າ.
ປັດຈຸບັນ, ຄະນະບໍລິຫານງານຊາວໜຸ່ມກະຊວງການຕ່າງປະເທດ ມີໂຄງປະກອບການຈັດຕັ້ງຈໍານວນ 185 ໜ່ວຍ (ຢູ່ພາຍໃນກະຊວງ ຈໍານວນ 17 ໜ່ວຍ, ສໍານັກງານຜູ້ຕາງໜ້າຢູ່ຕ່າງປະເທດ ຈໍານວນ 41 ໜ່ວຍ ແລະ ໜ່ວຍນັກສຶກສາທີ່ຂຶ້ນກັບຄະນະຊາວໜຸ່ມຮາກຖານບັນດາສໍານັກງານຜູ້ຕາງໜ້າຢູ່ຕ່າງປະເທດ ຈໍານວນ 127 ໜ່ວຍ) ແລະ 8 ຄະນະຮາກຖານ; ມີສະມາຊິກທັງໝົດປະມານ 7,830 ກວ່າສະຫາຍ ຍິງ 2,736 ກວ່າສະຫາຍ. ຄະນະບໍລິຫານງານຊາວໜຸ່ມ ໄດ້ຖືເອົາວຽກງານໂຄສະນາສຶກສາອົບຮົມວຽກງານ ການເມືອງ-ແນວຄິດ ແລະ ຄຸນສົມບັດໃຫ້ແກ່ສະມາຊິກຊາວໜຸ່ມຂອງຕົນ ເປັນບຸລິມະສິດສູງສຸດ ໄປຄຽງຄູ່ກັບການເຄື່ອນໄຫວວຽກງານວິຊາສະເພາະຂອງຕົນ ແລະ ຖືເອົາຂໍ້ແຂ່ງຂັນ 4 ບຸກ ທີ່ຄະນະບໍລິຫານງານສູນກາງຊາວໜຸ່ມປະຊາຊົນ ປະຕິວັດລາວ ວາງອອກເປັນຄາດໝາຍສູ້ຊົນ. ຕະຫຼອດໄລຍະຜ່ານມາ, ຊາວໜຸ່ມຂະແໜງການຕ່າງປະເທດ ໄດ້ຮັບນາມມະຍົດເປັນຊາວໜຸ່ມ 4 ບຸກ ເຖິງ 6 ສະໄໝຕິດຕໍ່ກັນ ແລະ ໄດ້ຮັບທຸງໄຊນໍາໜ້າໃນຂະບວນການແຂ່ງຂັນ 4 ບຸກ ຈາກຄະນະບໍລິຫານງານສູນກາງຊາວໜຸ່ມປະຊາຊົນ ປະຕິວັດລາວ.
ກອງປະຊຸມຄັ້ງນີ້ ຍັງໄດ້ປ່ອນບັດຄັດເລືອກເອົາຄະນະບໍລິຫານງານຊາວໜຸ່ມ ກະຊວງການຕ່າງ ປະເທດຊຸດໃໝ່ ຈໍານວນ 19 ສະຫາຍ, ໃນນັ້ນເພດຍິງ 6 ສະຫາຍ. ກອງປະຊຸມຄັ້ງປະຖົມມະລືກຂອງຄະນະຊຸດໃໝ່ ໄດ້ເລືອກເອົາຄະນະປະຈໍາ 7 ສະຫາຍ ຍິງ 2 ສະຫາຍ; ເລືອກຕັ້ງເອົາເລຂາ ແລະ ຮອງເລຂາ ດັ່ງນີ້: ສະຫາຍ ນາງ ມຸກດາວັນ ສີສຸລິດ ເປັນເລຂາຄະນະບໍລິຫານງານຊາວໜຸ່ມ ກະຊວງການຕ່າງປະເທດ; ສະຫາຍ ໂກ້ ນັນທະສອນ, ສະຫາຍ ຈັນຖຸນາ ສຸທໍາມະວົງ ແລະ ສະຫາຍ ສຸກສາຍຂອງ ແກ້ວລາ ເປັນຮອງເລຂາຄະນະບໍລິຫານງານຊາວໜຸ່ມ ກະຊວງການຕ່າງປະເທດ; ເລືອກຕັ້ງເອົາປະທານ, ຮອງປະທານ ແລະ ກໍາມະການກວດກາ; ພ້ອມທັງໄດ້ເລືອກຕັ້ງເອົາຄະນະຜູ້ແທນສົມບູນ ແລະ ຜູ້ແທນສໍາຮອງ ເພື່ອເຂົ້າຮ່ວມກອງປະຊຸມໃຫຍ່ຜູ້ແທນຊາວໜຸ່ມປະຊາຊົນປະຕິວັດລາວ ທົ່ວປະເທດ ຄັ້ງທີ IX ອີກດ້ວຍ. ຄະນະບໍລິຫານງານຊາວໜຸ່ມກະຊວງການຕ່າງປະເທດຊຸດໃໝ່ ຈະສືບຕໍ່ຊີ້ນໍາ-ນໍາພາວຽກງານການຈັດຕັ້ງປະຕິບັດຕາມມະຕິກອງປະຊຸມໃຫຍ່ ຄັ້ງທີ XII ຂອງຄະນະບໍລິຫານງານຊາວໜຸ່ມກະຊວງການຕ່າງປະເທດ ກໍຄືວຽກງານຂອງຊາວໜຸ່ມຂະແໜງການຕ່າງປະເທດ ໃຫ້ປະກົດຜົນເປັນຈິງ.
ໃນກອງປະຊຸມ, ຜູ້ແທນຍັງໄດ້ຮັບຟັງການໂອ້ລົມ ຂອງສະຫາຍ ທອງສະຫວັນ ພົມວິຫານ ແລະ ສະຫາຍ ມອນໄຊ ລາວມົວຊົ່ງ, ເພື່ອເປັນເຂັມຊີ້ທິດເຍືອງທາງ ແລະ ເປັນບ່ອນອີງສໍາຄັນໃຫ້ແກ່ຂະບວນການເຄື່ອນໄຫວຂອງຊາວໜຸ່ມ ຂະແໜງການຕ່າງປະເທດໃນຕໍ່ໜ້າໃຫ້ມີຜົນສໍາເລັດໃໝ່, ທັງປະກອບສ່ວນເປັນກໍາລັງແຮງໃນການຈັດຕັ້ງປະຕິບັດມະຕິຂອງກອງປະຊຸມໃຫຍ່ ວຽກງານການຕ່າງປະເທດ ຄັ້ງທີ 14 ພາຍໃຕ້ຄໍາຂວັນ: “ການທູດປ້ອງກັນເຫດ ແລະ ບຸກທະລຸ ເພື່ອພາລະກິດສ້າງສາ ແລະ ພັດທະນາປະເທດຊາດ”.
ໃນວາລະ ຍັງມີພິທີມອບຫຼຽນຊາວໜຸ່ມຕະລຸມບອນ ໃຫ້ແກ່ບຸກຄົນຂອງກະຊວງການຕ່າງປະເທດທີ່ມີຜົນງານດີເດັ່ນ, ມີຄຸນງາມຄວາມດີໃນການອຸທິດເຫື່ອແຮງ, ສະຕິປັນຍາ ແລະ ຊີ້ນໍາວຽກງານຂອງຄະນະຊາວໜຸ່ມປະຊາຊົນ ປະຕິວັດລາວ ໃນໄລຍະຜ່ານມາ ຈໍານວນ 29 ສະຫາຍ, ພ້ອມທັງໄດ້ມີພິທີມອບໃບຍ້ອງຍໍ ໃຫ້ແກ່ຄະນະບໍລິຫານງານຊາວໜຸ່ມປະຊາຊົນ ປະຕິວັດລາວ ກະຊວງການຕ່າງປະເທດ ທີ່ມີຜົນງານດີເດັ່ນໃນການຈັດຕັ້ງປະຕິບັດວຽກງານຊາວໜຸ່ມ ໃນໄລຍະ 5 ປີຜ່ານມາ (2020-2024) ຈໍານວນ 25 ສະຫາຍ.
ຂ່າວ: ກະຊວງຕ່າງປະເທດ
ພາບ: ແສງຈັນ
