ທ່ານ ສົມຮັກ ສີບຸນເຮືອງ ຢູ່ບ້ານບ້ານດົງໄລ່ ເມືອງບາຈຽງຈະເລີນສຸກ, ແຂວງຈໍາປາສັກ, ເປັນຄອບຄົວຕົວແບບໃນການປູກຖົ່ວລຽນເປັນສິນຄ້າ ສສ້າງລາຍຮັບແກ່ຄອບຄົວ ເຮັດໃຫ້ຊີວິດການເປັນຢູ່ນັບມື້ໄດ້ຮັບການພັດທະນາດີຂຶ້ນເລື້ອຍໆ.
ທ່ານ ສົມຮັກ ສີບຸນເຮືອງ ໃຫ້ສໍາພາດໃນວັນທີ 14 ມັງກອນ 2025 ນີ້ວ່າ: ຄອບຄົວຂອງຂ້າພະເຈົ້າມີຈໍານວນພົນ 4 ຄົນ, ຍິງ 2 ຄົນ, ໃນນັ້ນ ແຮງງານຕົ້ນຕໍ 2 ຄົນ, ຍິງ 1 ຄົນ ແຕ່ກ່ອນເຮັດວຽກນໍາບໍລິສັດ ປປູກໝາກມ່ວງຫິມມະພານຂອງໄທ ແຕ່ຍ້ອນຢາກໃຫ້ຊີວິດມີຄວາມໝັ້ນຄົງ, ມີລາຍຮັບທີ່ແນ່ນອນ.
ເມື່ອເປັນແນວນັ້ນ ຄອບຄົວຂອງລາວຈິ່ງຄິດຫາອາຊີບທີ່ຕົນ ເອງພໍມີຄວາມຮູ້ ເປັນຕົ້ນແມ່ນ ດ້ານການປູກຝັງ, ທທໍາອິດຄິດວ່າຈະປູກຢາງພາລາແຕ່ສຶກສາຄົ້ນຄວ້າເບິ່ງລາຍລະອຽດ ເຫັນວ່າ ການປູກຢາງພາລາມີຄວາມຫຍຸ້ງຍາກຫຼາຍຢ່າງ ຈິ່ງປ່ຽນແຜນຫັນມາປູກໝາກຖົ່ວລຽນ ຕະຫຼາດມີຄວາມຕ້ອງການຫຼາຍ ໂດຍເລີ່ມບຸກເບີກເນື້ອທີ່ໃນປີ 2009 ແລະ ລົງມືປູກໃນປີນັ້ນເລີຍ ໃນເນື້ອທີ່ 4 ເຮັກຕາ, ປູກໝາກຖົ່ວລຽນພັນໝອນທອງ ຈຳນວນ 600 ຕົ້ນ ເຊິ່ງເປັນທຶນສ່ວນຕົວ ກກໍຄືຄອບຄົວ.
ປູກປີທໍາອິດ ຕົ້ນຖົ່ວລຽນຕາຍ 400 ຕົ້ນ ຍ້ອນປະສົບການ ແລະ ບົດຮຽນໃນການບົວລະບັດຮັກສາຕົ້ນຖົ່ວລຽນບໍ່ທັນສູງ, ສ່ວນໃຫຍ່ແມ່ນຮຽນຮູ້ດ້ວຍຕົນເອງ, ຮຽນຈາກຢູທຸບ ແລະ ຕໍາລາຕ່າງໆ, ປູກໄປນໍາ ຖອດຖອນບົດຮຽນໄປນໍາ. ໃນປີ 2010 ໄດ້ປູກທົດແທນ, ໃນຈຳນວນ 4 ເຮັກຕາ, ໄລຍະຫ່າງຂອງຕົ້ນຖົ່ວລຽນ ປູກ 7 ແມັດ x 7 ແມັດ ແລະ ໄດ້ເອົາໃຈໃສ່ບົວລະບັດຮັກສາ. ປີ 2019 ໄດ້ຂະຫຍາຍເນື້ອທີ່ປູກຕື່ມອີກ 1,2 ເຮັກຕາ.
ທ່ານ ສົມຮັກ ສີບຸນເຮືອງ ກ່າວຕື່ມວ່າ: ປູກຖົ່ວລຽນບໍ່ງ່າຍ ບໍ່ຍາກ, ສໍາຄັນຕ້ອງດູແລເອົາໃຈໃສ່, ເຂົ້າໃຈຄວາມຕ້ອງການຂອງພືດ, ສະພາບແວດລ້ອມ, ດິນ, ນໍ້າ ແລະ ອາກາດ. ການວາງລະບົບນໍ້າ ເພື່ອຫົດໃນຍາມແລ້ງ, ສວນຂອງຂ້າພະເຈົ້າໃຊ້ນໍ້າບາດານ ລວມມີ 9 ບໍ່, ແຕ່ໂປມຂຶ້ນພັກໃນໜອງສະ ແລ້ວປ່ອຍໄປຫົດຕົ້ນຖົ່ວລຽນ ແບບລະບົບສະປິງເກີ້.
ນອກນີ້ ກໍເອົາໃຈໃສ່ການນໍາໃຊ້ຝຸ່ນ, ຢາປາບແມ້ງໄມ້ ແລະ ສັດ ຕູພືດ ໂດຍໃຊ້ແບບປະສົມປະສານ ລະຫວ່າງ ຝຸ່ນຊີວະພາບ 30% ແລະ ຝຸ່ນວິທະຍາສາດ 70%, ການປູກໝ່ກຖົ່ວລຽນຂອງຄອບຄົຂ້າພະເຈົ້າ ສວນຫຼາຍເປັນພັນໝອນທອງ, ພັນພວງມະນີ 80 ຕົ້ນ, ພັນມູຊັງຄີງ 50 ຕົ້ນ ແລະ ພັນກ້ານຍາວຈຳນວນໜຶ່ງ.
ໃນປີ 2013 ກໍໄດ້ປູກເພີ່ມອີກລວມເປັນຈຳນວນ 861 ຕົ້ນ, ໃນເນືອທີ່ 5,2 ເຮັກຕາ, ຮອດປີ 2014 ເລີ່ມໃຫ້ຜົນຜະລິດ ແລະ ຂາຍເປັນສິນຄ້າ ສ້າງລາຍຮັບ ໄດ້ 35 ລ້ານກີບ, ໄລຍະນັ້ນ ລາຄາ 12 ພັນກີບ/ກິໂລກຣາມ; ປີ 2015 – 2019 ເຫັນວ່າຕະຫຼາດມີຄວາມຕ້ອງເພີ່ມຂຶ້ນ, ຄອບຄົວຂ້າພະເຈົ້າຈິ່ງໄດ້ເອົາ ໃຈໃສ່ບົວລະບັດຮັກສາຕົ້ນຖົ່ວລຽນດ້ວຍຄວາມຮັບຜິດຊອບ ແລະ ການປູກຖົ່ວລຽນຢູ່ສວນຂ້າພະເຈົ້າ ມີສອງຮູບແບບ ຄືແບບບັງຄັບໃຫ້ເປັນໝາກເລີຍ ໂດຍເລີ່ມບັງຄັບແຕ່ເດືອນທີ 10, ພັກຕົ້ນ 6 ເດືອນ, ເດືອນທີ 4 – 5, ເຕັກນິກໃນການເກັບຮັກສາໝາກ, ຕົ້ນໜຶ່ງຈະຮັກສາໝາກໄວ້ ໂດຍອີງໃສ່ຄວາມສົມບູນຂອງຕົ້ນຖົ່ວລຽນ.
ຮອດປີ 2020 ຂາຍຜົນຜະລິດໄດ້ 25 ໂຕນ, ສ້າງລາຍຮັບໄດ້ 880 ລ້ານກີບ ເຊິ່ງເຮັດໃຫ້ຄອບຄົວຂອງຂ້າພະເຈົ້າມີລາຍຮັບນັບມື້ຂື້ນເລື້ອຍໆ. ປີ 2022, ຂາຍຜົນຜະລິດ ໄດ້ທັງໝົດປະ ມານ 46,3 ໂຕນ, ສ້າງລາຍຮັບໄດ້ 2,4 ຕື້ກີບ, ປີ 2023 ຂາຍຜົນຜະລິດໄດ້ 43 ໂຕນ, ມູນຄ່າ 3,8 ຕື້ກີບ, ປີ 2024 ຂາຍຜົນຜະລິດໄດ້ 40 ໂຕນ,ມູນຄ່າ 5,1 ຕື້ກີບ. ຕະຫຼາດໝາກຖົ່ວລຽນ ທັງຈໍາໜ່າຍພາຍໃນແຂວງ ແລະ ຕ່າງແຂວງ, ການຈຳໜ່າຍແມ່ນມີແມ່ຄ້າມາຊື້ກັບສວນ ແລະ ນໍາສົ່ງຕາມການສັ່ງຈ່ອງຕາມທ້ອງຕະ ຫຼາດພາຍໃນ ແລະ ຕ່າງແຂວງ ໂດຍຜ່ານບໍລິສັດຂົນສົ່ງດ່ວນມີໄຊ ໄປທີ່ຕະຫຼາດນະຄອນຫຼວງວຽງຈັນ ແລະ ຕະຫຼາດແຂວງສະ ຫວັນນະເຂດ.
ທ່ານ ສົມຮັກ ສີບຸນເຮືອງ ກ່າວຕອນທ້າຍອີກວ່າ: ໃນຕໍ່ໜ້າຈະສືບຕໍ່ຜະລິດໃຫ້ຫຼາຍ ກາຍເປັນສີນຄ້າ ເພື່ອສົ່ງອອກໄປຕ່າງປະ ເທດ ຫຼື ບາງທີອາດຈະໄດ້ແປຮູບຜະລິດຕະພັນອົບແຫ້ງ, ເຮັດເຂົ້າໜົມ ແລະ ອື່ນໆຕື່ມອີກ. ຖ້າວ່າມີທຶນຮອນພຽງພໍ ຈະສ້າງສາງເຢັນ ເພື່ອເກັບຮັກສາໝ່ກຖົ່ວລຽນໄວ້ຂາຍໃນຍາມບໍ່ມີທຸລຽນຫຼາຍ. ພ້ອມນີ້ ຈະຍົກລະດັບເຕັກນິກດ້ານວິຊາການໃນການບົວລະບັດຮັກສາຜົນຜະລິດ ໃຫ້ມີຄຸນນະພາບ ໂດຍສົມທົບກັບວິຊາການທີ່ຊ້ຽວຊານດ້ານການຮັກສາຕົ້ນຖົ່ວລຽນ; ຈະຍົກສູງການບໍລິການ ໃຫ້ທຽບທັນສາກົນ ໂດຍສົມທົບກັບຕ່າງປະເທດ ເພື່ອສົ່ງອອກໂດຍສະເພາະການຫຸ້ມຫໍ່ໃຫ້ມີສີສັນເພື່ອຢັ້ງຢືນເຖີງຕົ້ນກຳເນີດສີນຄ້າ.
Cr: ທູນທອງໃຈ
