ສະຫາຍ ພັນເອກ ນາງ ຫຼ້າ ຄຸນນະວົງສາ ຮອງຫົວໜ້າຫ້ອງການສະຫະພັນແມ່ຍິງກອງທັບ ໃຫ້ຮູ້ວ່າ: ເນື່ອງໃນໂອກາດວັນສ້າງຕັ້ງກອງທັບປະຊາຊົນລາວ ຄົບຮອບ 76 ປີ ທີ່ຈະມາເຖິງນີ້, ຕົນເອງມີຄວາມຮູ້ສຶກເອກອ້າງທະນົງໃຈ ປິຕິຊົມຊື່ນຕໍ່ການເຕີບໃຫຍ່ຂະຫຍາຍຕົວຂອງກອງທັບປະຊາຊົນລາວ ນັບຕັ້ງແຕ່ມື້ສ້າງຕັ້ງຈົນເຖິງປັດຈຸບັນ. ຕະຫຼອດໄລຍະ 76 ປີຜ່ານມາ ໄດ້ເປັນຂີດໝາຍແຫ່ງການເຕີບໃຫຍ່ເຂັ້ມແຂງຂອງກອງທັບປະຊາຊົນລາວທີ່ໄດ້ຜ່ານຜ່າອຸປະສັກ, ຜ່ານບັ້ນທົດສອບອັນລະອິດລະອ້ຽວໃນການເຮັດໜ້າທີ່ປົກປັກຮັກສາ ແລະ ສ້າງສາພັດທະນາປະເທດຊາດ. ກອງທັບປະຊາຊົນລາວຍາມໃດກໍໄດ້ເປັນກໍາແພງດ້ານໜ້າໃນການເຮັດໜ້າທີ່ປົກປັກຮັກສາເຂດນ້ຳແດນດິນ, ຮັກສາສັນຕິພາບ, ເອກະລາດ, ອໍານາດ, ອະທິປະໄຕ ແລະ ຜືນແຜ່ນດິນອັນຄົບຖ້ວນໄວ້ໃຫ້ໝັ້ນຄົງ ຊຶ່ງຍາມໃດການນຳກະຊວງປ້ອງກັນປະເທດ ກໍໄດ້ເອົາໃຈໃສ່ປັບປຸງກອງທັບປະຊາຊົນລາວ ໃຫ້ມີຄວາມເຂັ້ມແຂງທັນສະໄໝທຽບເທົ່າກັບສາກົນເທື່ອລະກ້າວ.
ສະຫາຍ ພັນເອກ ນາງ ຫຼ້າ ຄຸນນະວົງສາ ຕາງໜ້າໃຫ້ສະຫະພັນແມ່ຍິງທົ່ວກອງທັບ ຂໍສະແດງຄວາມຮູ້ບຸນຄຸນອັນສູງສົ່ງຕໍ່ທ່ານຜູ້ນໍາພັກ ແລະ ລັດຖະບານ, ທ່ານຜູ້ນໍາກະຊວງປ້ອງກັນປະເທດທີ່ຍາມໃດກໍໄດ້ໃຫ້ຄວາມສໍາຄັນຕໍ່ວຽກງານດ້ານຕ່າງໆໃນການສຶກສາອົບຮົມບົ່ມສອນ, ນໍາພາຊີ້ນໍາ ແລະ ສ້າງເງື່ອນໄຂດ້ານຕ່າງໆ ເຮັດໃຫ້ ພະນັກງານ-ນັກຮົບສາມາດຮັກສາ ແລະ ເສີມຂະຫຍາຍໄດ້ມູນເຊື້ອຂອງຕົນໄດ້ດີຕະຫຼອດມາ, ພ້ອມທັງອວຍ ພອນໄຊອັນປະເສີດໃຫ້ບັນດາທ່ານຈົ່ງມີສຸຂະພາບພະລານາໄມແຂງແຮງ ສືບຕໍ່ນໍາພາປະເທດຊາດຈະເລີນສີວິໄລ, ໃຫ້ກອງທັບປະຊາຊົນລາວມີຄວາມເຂັ້ມແຂງ ແລະ ທັນສະໄໝໄດ້ຮັບການພັດທະນາກ້າວຂຶ້ນຢ່າງຕໍ່ເນື່ອງ.
