ໃນປີ 2025 ນີ້, ລັດຖະບານ ຈະສຸມໃສ່ແກ້ໄຂບັນຫາຄວາມຫຍຸ້ງຍາກ ທາງດ້ານເສດຖະກິດ-ການເງິນ ໃຫ້ເປັນຮູບປະທຳ ເທື່ອລະກ້າວ ໂດຍສະເພາະຈະສືບຕໍ່ສຸມໃສ່ ແກ້ໄຂບັນຫາເງິນເຟີ້, ອັດຕາແລກປ່ຽນ, ລາຄາສິນຄ້າ ແລະ ການແກ້ໄຂໜີ້ສິນ. ພ້ອມກັນນັ້ນ, ຈະສືບຕໍ່ສຸມໃສ່ປະຕິບັດສອງວາລະແຫ່ງຊາດ ໃນທ້າຍສະໄໝ ຕິດພັນກັບການແກ້ໄຂຜົນກະທົບ ຈາກໄພທຳມະຊາດ ໃນປີ 2024 ດ້ວຍຄວາມບຸກບືນສູ້ຊົນ ໃຫ້ໄດ້ເປັນກ້າວໆ ແລະ ຢ່າງມີຈຸດສຸມ.
ທ່ານ ສອນໄຊ ສິດພະໄຊ ລັດຖະມົນຕີປະຈໍາສໍານັກງານນາຍົກລັດຖະມົນຕີ ທັງເປັນໂຄສົກລັດຖະບານ ຖະແຫຼງໃນໂອກາດສຳເລັດກອງປະຊຸມລັດຖະບານເປີດກວ້າງ ຄັ້ງທີ II ປີ 2024 ໃຫ້ຮູ້ເມື່ອບໍ່ດົນມານີ້ວ່າ: ໃນປີ 2025 ນີ້, ລັດຖະບານ ຈະສຸມໃສ່ແກ້ໄຂບັນຫາຄວາມຫຍຸ້ງຍາກ ທາງດ້ານເສດຖະກິດ-ການເງິນ ດ້ວຍການບັງຄັບໃຊ້ບັນດາມາດຕະການ ທີ່ໄດ້ວາງອອກແລ້ວນັ້ນ ໃຫ້ປະກົດຜົນເປັນຈິງ ແລະ ເປັນຮູບປະທຳຫຼາຍຂຶ້ນກວ່າເກົ່າ ໂດຍມອບວຽກການຈັດຕັ້ງ ແລະ ບຸກຄົນ ຢ່າງລະອຽດຈະແຈ້ງ ທັງກຳນົດຄາດໝາຍເວລາສໍາເລັດ ໃຫ້ຊັດເຈນ. ພ້ອມທັງ ຈະສືບຕໍ່ຊຸກຍູ້ສົ່ງເສີມການຜະລິດ ເພື່ອທົດແທນການນໍາເຂົ້າ ແລະ ເປັນສິນຄ້າສົ່ງອອກ, ຊຸກຍູ້ການຂຸດຄົ້ນ ແລະ ປຸງແຕ່ງແຮ່ທາດ ຕາມທິດຍືນຍົງ ທັງສາມາດສ້າງມູນຄ່າເພີ່ມຈາກແຮ່ຕ່າງໆ ແລະ ປັດໄຈການຜະລິດ ເຊັ່ນ: ຜະລິດປຸ໋ຍຊີວະພາບ, ຫົວອາຫານລ້ຽງສັດ, ວັດສະດຸກໍ່ສ້າງ, ເຄື່ອງອຸປະໂພກ-ບໍລິໂພກ ໄປຄຽງຄູ່ກັບການປັບປຸງໂຄງລ່າງພື້ນຖານ ແລະ ລະບົບການບໍລິການຂົນສົ່ງ ໃຫ້ມີຄວາມສະດວກຂຶ້ນ ເພື່ອເປັນພື້ນຖານສຳຄັນແກ່ການສົ່ງເສີມການລົງທຶນ, ການຄ້າ ແລະ ການທ່ອງທ່ຽວ; ສຸມໃສ່ຮັກສາສະຖຽນລະພາບທາງດ້ານເງິນຕາ ໃຫ້ມີຄວາມໝັ້ນທ່ຽງ ດ້ວຍການດຳເນີນນະໂຍບາຍເງິນຕາແບບຮັດກຸມ ແລະ ນະໂຍບາຍອັດຕາແລກປ່ຽນຢ່າງມີປະສິດທິພາບ, ຄຸ້ມຄອງເງິນຕາຕ່າງປະເທດ ຈາກການລົງທຶນ, ການສົ່ງອອກ-ນຳເຂົ້າສິນຄ້າ ຜ່ານລະບົບທະນາຄານ ໃຫ້ຫຼາຍຂຶ້ນ ຕິດພັນກັບສົ່ງເສີມການນໍາໃຊ້ເງິນກີບ ກັບປະເທດໃກ້ຄຽງ ເພື່ອຫຼຸດຜ່ອນຄວາມຕ້ອງການເງິນຕາຕ່າງປະ ເທດ, ສືບຕໍ່ປ່ອຍສິນເຊື່ອ ເພື່ອກະຕຸ້ນເສດຖະກິດ ແລະ ກະຈາຍແຫຼ່ງທຶນສູ່ທ້ອງຖິ່ນ ໃຫ້ມີປະສິດທິຜົນສູງ; ສຸມໃສ່ການຂຸດຄົ້ນແຫຼ່ງລາຍຮັບງົບປະມານແຫ່ງລັດ ໃຫ້ໄດ້ຕາມແຜນ ຫຼື ເກີນແຜນ ເປັນປີທີ 5 ຕິດຕໍ່ກັນ ແລະ ສູ້ຊົນໃຫ້ເປັນປີທຳອິດໃຫ້ມີລາຍຮັບເກີນດຸນ ຕາມຄາດໝາຍ ເສດຖະກິດເອກະລາດ ເປັນເຈົ້າຕົນເອງ (ສອຈ) ວາງອອກ ໂດຍສຸມທຸກກຳລັງແຮງສັງລວມ ເຂົ້າໃນການເກັບລາຍຮັບ ຕາມກົດໝາຍ ແລະ ລະບຽບການທີ່ໄດ້ກໍານົດໄວ້, ເລັ່ງຂະຫຍາຍຖານລາຍຮັບໃໝ່ ຕິດພັນກັບການຫັນເປັນທັນສະໄໝ, ຈໍາກັດການຍົກເວັ້ນພັນທະຕ່າງໆ ທີ່ບໍ່ເປັນການກະຕຸ້ນ ຫຼື ສົ່ງເສີມການລົງທຶນ. ດ້ານລາຍຈ່າຍງົບປະມານ ແມ່ນໃຫ້ສຸມໃສ່ວຽກງານບຸລິມະສິດ ຂອງລັດຖະບານ ບົນຈິດໃຈປະຢັດມັດທະຍັດ, ນໍາໃຊ້ແຫຼ່ງລາຍຮັບພາຍໃນ ເພື່ອແກ້ໄຂໜີ້ສິນພາຍໃນ ແລະ ຕ່າງປະເທດ ພ້ອມທັງຊອກທຸກວິທີ ເພື່ອຫຼຸດຜ່ອນການກູ້ຢືມດ້ວຍຮູບການຕ່າງໆລົງ.
ພ້ອມນີ້, ຍັງຈະສືບຕໍ່ດັດສົມຈຳນວນບໍລິສັດ ນຳເຂົ້າ-ສົ່ງອອກ, ຈໍາກັດການນໍາເຂົ້າສິນຄ້າ ທີ່ສາ ມາດຜະລິດເອງໄດ້ ແລະ ຕີຖອຍການຄ້ານອກລະບົບ ຫັນໄປສູ່ການຂາຍຍົກ-ຂາຍຍ່ອຍ ເພື່ອຄຸ້ມຄອງການນໍາເຂົ້າສິນຄ້າ ໃຫ້ຫຼຸດໜ້ອຍຖອຍລົງ; ສືບຕໍ່ປັບປຸງກົນໄກ, ລະບຽບການສົ່ງເສີມການລົງທຶນ ແລະ ການດຳເນີນທຸລະກິດ ໃຫ້ມີຄວາມສະດວກ, ຕັດຂັ້ນຂອດທີ່ບໍ່ຈໍາເປັນລົງ ເພື່ອດຶງດູດການລົງທຶນພາຍໃນ ແລະ ຕ່າງປະເທດ ໃຫ້ຫຼາຍຂຶ້ນ. ສຸມໃສ່ຕິດຕາມກວດກາບັນດາໂຄງການລົງທຶນ ທີ່ໄດ້ຮັບອະນຸມັດຜ່ານມາ, ໂຄງການໃດທີ່ບໍ່ມີຄວາມຄືບໜ້າ ຫຼື ມີຄວາມຄືບໜ້າຊ້າ ກໍໃຫ້ດໍາເນີນມາດຕະການ ຕາມຂັ້ນຕອນຂອງກົດໝາຍ ແລະ ລະບຽບການຢ່າງເຂັ້ມງວດ, ເດັດຂາດ; ເອົາໃຈໃສ່ຈັດຕັ້ງປະຕິບັດແຜນການລົງທຶນ ຂອງລັດປີ 2025 ໂດຍເລີ່ມປະຕິບັດໃນເດືອນມັງກອນ 2025 ເປັນຕົ້ນໄປ. ພ້ອມກັນນັ້ນ ກໍໃຫ້ເອົາໃຈໃສ່ໃນການນໍາໃຊ້ເງິນເກີນແຜນ ໃຫ້ຖືກຕ້ອງຕາມເປົ້າໝາຍ.
ເດັດຂາດໂຈະຖາວອນການອະນຸຍາດ ໃຫ້ຂຸດຄົ້ນແຮ່ຄໍາຕົກຂ້ອນ, ທ້ອງຖິ່ນໃດ ຫາກຍັງມີສະພາບການສວຍໃຊ້ການຂຸດຄົ້ນຫີນແຮ່-ຊາຍ ເພື່ອຂຸດຄົ້ນຄໍາຕົກຂ້ອນ ແມ່ນໃຫ້ຮີບຮ້ອນແກ້ໄຂ ແລະ ດຳເນີນມາດຕະການທາງກົດໝາຍຢ່າງເດັດຂາດ. ພ້ອມທັງ ສຸມໃສ່ກວດກາບັນດາໂຄງການບໍ່ແຮ່ທີ່ໄດ້ອະນຸມັດຜ່ານມາ ເພື່ອບໍ່ໃຫ້ມີຊ່ອງວ່າງລັກໂລບ ຫຼື ລາຍງານຂໍ້ມູນການຂຸດຄົ້ນ ບໍ່ຖືກຕ້ອງ; ສືບຕໍ່ເລັ່ງຫັນໂຄງການທົດລອງແຮ່ທາດໄປສູ່ກົນໄກປົກກະຕິຕາມກົດໝາຍກຳນົດ, ພ້ອມກັນນັ້ນ ຕ້ອງສຸມໃສ່ປະຕິບັດມາດຕະການ ຄຸ້ມຄອງການຂຸດຄົ້ນ ແລະ ປຸງແຕ່ງແຮ່ຄຳ, ແຮ່ຫາຍາກ ແລະ ອື່ນໆ, ທັງຮີບຮ້ອນຄົ້ນຄວ້ານະໂຍບາຍຈຳນວນໜຶ່ງ ເພື່ອໃຫ້ມີການສ້າງໂຮງງານປຸງແຕ່ງແຮ່ສຳເລັດຮູບຢູ່ລາວ ໂດຍສະເພາະແຮ່ຖ່ານຫີນ, ແຮ່ ຄໍາ ແລະ ແຮ່ເຫຼັກ.
ພ້ອມດຽວກັນນີ້, ຍັງຈະເລັ່ງແກ້ໄຂບັນຫາລົດເຖື່ອນ ຢູ່ເຂດເສດຖະກິດພິເສດສາມຫຼ່ຽມຄຳ ໃຫ້ສຳເລັດ ພາຍໃນ 6 ເດືອນຕົ້ນປີ 2025. ສໍາລັບ ລົດເຖື່ອນ ຢູ່ທ້ອງຖິ່ນອື່ນໆ ໃຫ້ສືບຕໍ່ແກ້ໄຂ ຢ່າງເດັດຂາດ ແລະ ເຂັ້ມງວດ. ພ້ອມກັນນັ້ນ ໃຫ້ກະຊວງການເງິນ ແລະ ຫ້ອງວ່າການສຳນັກງານນາຍົກລັດຖະມົນຕີ ສົມທົບກັນ ຕິດຕາມກວດກາ ແລະ ຊຸກຍູ້ການປະຕິບັດດຳລັດຂອງລັດຖະບານ ເລກທີ 599 (ລົດລັດ) ໃຫ້ເປັນເອກະພາບໃນຂອບເຂດທົ່ວປະເທດ.
