ແຫລ່ງຂ່າວຈາກ ແຂວງວຽງຈັນ ໃຫ້ຮູ້ວ່າ: ຈາກຄອບຄົວທຸກຍາກໃນເມື່ອກ່ອນ ແຕ່ປັດຈຸບັນມີລາຍຮັບ 300 ລ້ານກວ່າກີບຕໍ່ປີ ຈາກການປູກໝາກກ້ຽງນ້ອຍຂາຍ ເຮັດໃຫ້ຄອບຄົວຫລຸດພົ້ນອອກຈາກຄວາມທຸກຍາກຢ່າງສິ້ນເຊີງ ມີເຮືອນຢູ່ແໜ້ນໜາຖາວອນ, ມີລົດຈັກ, ລົດໃຫຍ່, ມີສວນ, ມີນາເຮັດກິນໃນແຕ່ລະປີ, ມີເງິນເກັບຈໍານວນໜຶ່ງ ເຮັດໃຫ້ຊີວິດການເປັນຢູ່ຂອງຄອບຄົວດີຂຶ້ນເປັນກ້າວໆ.
ທ່ານ ແອ ລັດສະໝີ ອາຍຸ 51 ປີ, ປັດຈຸບັນຢູ່ບ້ານວຽງສະໄໝ ເມືອງກາສີ ແຂວງວຽງຈັນ ເຊິ່ງເປັນຄອບຄົວຕົວແບບໃນການປູກໝາກກ້ຽງນ້ອຍ ໄດ້ປະກອບຄຳເຫັນ ກ່ຽວກັບການປູກໝາກກ້ຽງນ້ອຍ ເພື່ອແກ້ໄຂຄວາມທຸກຈົນໃນຄອບຄົວ ຕໍ່ກອງປະຊຸມໃຫຍ່ຜູ້ແທນອົງຄະນະພັກ ເມືອງກາສີ ຄັ້ງທີ VIII ທີ່ໄຂຂຶ້ນໃນທ້າຍອາທິດຜ່ານມາວ່າ: ຕົນເອງກໍາເນີດໃນຄອບຄົວທີ່ທຸກຍາກ, ໃນປີ 1990 ໄດ້ແຕ່ງງານກັບ ນາງ ມີ, ມີລູກຮ່ວມກັນ 3 ຄົນ, ຍິງ 2 ຄົນ ນັບແຕ່ໄດ້ສ້າງຄອບຄົວເປັນຕົ້ນມາ ຄອບຄົວ ແມ່ນຂາດເນື້ອທີ່ທຳການຜະລິດ ອາໄສເຮັດນຳພໍ່ແມ່ ເນື້ອທີ່ກໍມີໜ້ອຍ. ມາຮອດປີ 2013 ໄດ້ເລີ່ມປູກໝາກກ້ຽງ 600 ຕົ້ນ ໃນເນື້ອທີ່ປະມານ 1,5 ເຮັກຕາ ຜ່ານການຕິດຕາມ ຕົ້ນໝາກກ້ຽງເຫັນວ່າມີຄວາມເຕີບໂຕໄວ ໃນປີ 2014 ຈິ່ງໄດ້ເອົາແກ່ນໝາກກ້ຽງມາກ້າໄວ້ປູກເອງ ຕໍ່ຈາກນັ້ນມາ ຄອບຄົວຕົນເອງແມ່ນທັງກ້າ ແລະ ປູກເພີ່ມມາເລື້ອຍໆ ມາຮອດປີ 2018 ໝາກກ້ຽງຕົ້ນທີ່ປູກກ່ອນເລີ່ມເປັນໝາກ ແລະ ສາມາດເກັບຂາຍໄດ້ເງິນ 20 ລ້ານກີບ, ເຊິ່ງຕົນເອງໄດ້ເອົາເງິນຈຳນວນດັ່ງກ່າວມາຊື້ລົດຊິ້ງ 1 ຄັນ ມູນຄ່າ 15 ລ້ານກີບ ສ່ວນເງິນທີ່ເຫລືອແມ່ນເອົາມາພັດທະນາຄອບຄົວ ແລະ ສົ່ງໃຫ້ລູກຢູ່ທາງບ້ານ. ຮອດປີ 2019-2020 ໄລຍະ 2 ປີນີ້ ເຫັນວ່າໝາກກ້ຽງເປັນໝາກຫລາຍສົມຄວນ ແຕ່ເກີດພະຍາດໂຄວິດ-19 ລະບາດ ເຮັດໃຫ້ໝາກກ້ຽງບໍ່ໄດ້ຂາຍ ໄລຍະ 2 ປີ ຂາຍໝາກກ້ຽງໄດ້ແຕ່ 73 ລ້ານກີບເທົ່ານັ້ນ ເຮັດໃຫ້ໝາກກ້ຽງຫລົ່ນຖິ້ມຄາຕົ້ນ. ມາຮອດປີ 2021 ສາມາດເກັບໝາກກ້ຽງຂາຍໄດ້ 110 ລ້ານກີບ ແລ້ວນໍາເອົາເງິນໄປປຸກເຮືອນ 1 ຫລັງ ມູນຄ່າ 90 ລ້ານກີບ ຈໍານວນໜຶ່ງແມ່ນໄປຊື້ດິນ ເພື່ອຂະຫຍາຍສວນໝາກກ້ຽງຕື່ມ.
ທ່ານ ແອ ລັດສະໝີ ໃຫ້ຮູ້ຕື່ມວ່າ: ໃນປີ 2022 ຂາຍໝາກກ້ຽງໄດ້ 200 ລ້ານກີບ, ປີ 2023 ຂາຍໄດ້ 320 ລ້ານກີບ ພ້ອມນີ້, ໄດ້ຊື້ລົດຮຸນໄດ 1 ຄັນ, ລົດຈັກອີກ 3 ຄັນ, ຊື້ດິນນາ 2 ຕອນ ແລະ ໄປບຸກເບີກເນື້ອທີ່ນາ 1 ເຮັກຕາ, ຊື້ງົວມາລ້ຽງ 12 ໂຕ. ປັດຈຸບັນເຮັດໃຫ້ຄອບຄົວມີເງິນເກັບຈຳນວນໜຶ່ງ, ມີເນື້ອທີ່ດິນທັງໝົດ 7,5 ເຮັກຕາ ແລະ ມີຕົ້ນໝາກກ້ຽງປະມານ 2.800 ກວ່າຕົ້ນ ໃນເນື້ອທີ່ 4,5 ເຮັກຕາ, ຊຶ່ງລາຍຮັບທີ່ໄດ້ຈາກການຂາຍໝາກກ້ຽງປະມານ 300 ລ້ານກ່ວາກີບຕໍ່ປີ ແລະ ລາຍຮັບຈາກການຂາຍງົວອີກຈໍານວນໜຶ່ງ ເຮັດຄອບຄົວໄດ້ຫລຸດພົ້ນອອກຈາກ ຄວາມທຸກຍາກຢ່າງສິ້ນເຊີງ ໂດຍມີເຮືອນຢູ່ແໜ້ນໜາຖາວອນ, ມີລົດຈັກ, ລົດໃຫຍ່, ມີສວນ, ມີນາເຮັດກິນໃນແຕ່ລະປີ, ມີເງິນເກັບຈໍານວນໜຶ່ງ ເຮັດໃຫ້ຊີວິດການເປັນຢູ່ຂອງຄອບຄົວດີຂຶ້ນກວ່າເກົ່າ.
