ໃນໂອກາດໃຫ້ສໍາພາດຕໍ່ສື່ມວນຊົນໃນຂະນະທີ່ຮ່ວມກັບພາກສ່ວນກ່ຽວຂ້ອງເຄື່ອນໄຫວຈັດສັນຄວາມເປັນລະບຽບຮຽບຮ້ອຍໃນການຈອດລົດຢູ່ເຂດປະຕູໄຊ ເມື່ອບໍ່ດົນມານີ້, ພັນໂທ ເດດລືຊາ, ຮອງຫົວໜ້າພະແນກຕໍາຫລວດຈະລາຈອນ ນະ ຄອນຫລວງວຽງຈັນ ໃຫ້ຮູ້ວ່າ: ນັບແຕ່ວັນທີ 8 ມັງກອນ ຫາ ຕົ້ນເດືອນກຸມພາ 2025 ພະແນກຕໍາຫລວດຈະລາຈອນ ນະຄອນ ຫລວງວຽງຈັນ ໄດ້ແຕ່ງຕັ້ງເຈົ້າໜ້າທີ່ມາປະຈໍາການຢູ່ເຂດປະຕູໄຊ 3-4 ຄົນ ເພື່ອໂຄສະນາ ແລະ ກ່າວເຕືອນໃຫ້ຜູ້ປະກອບການຂົນ ສົ່ງ ກໍຄື ນັກທ່ອງທ່ຽວ ແລະ ປະຊາຊົນຮັບຮູ້ເຂົ້າໃຈຢ່າງເລິກເຊິ່ງໃນແຈ້ງການ ສະບັບເລກທີ 12995/ຍທຂ.ນວ, ລົງວັນທີ 23 ທັນວາ 2024 ກ່ຽວກັບການຈັດສັນບ່ອນຈອດລົດຈະໄປເຂົ້າຊົມສະຖານທີ່ທ່ອງທ່ຽວຕ່າງໆ ໃນໃຈກາງຕົວເມືອງນະຄອນຫລວງວຽງຈັນ ໂດຍສະເພາະຢູ່ອອບຮອບເຂດປະຕູໄຊ ເຊິ່ງການຢຸດຈອດຊົ່ວຄາວແມ່ນສາ ມາດຈອດໄດ້ບໍ່ເກີນ 5 ນາທີ ເພື່ອເອົານັກທ່ອງທ່ຽວຂຶ້ນ-ລົງ ແລ້ວໄປຈອດຢູ່ສະຖານ ທີ່ອື່ນ, ຫລັງຈາກນັ້ນເມື່ອນັກທ່ອງທ່ຽວຈະກັບໃຫ້ກັບຄືນມາຮັບເອົານັກທ່ອງທ່ຽວໄດ້. ສ່ວນສະຖານທີ່ຈອດລົດ ແມ່ນກໍານົດຢູ່ຂອບເຂດເດີ່ນພະ ທາດຫລວງ ແລະ ຕາມເສັ້ນທາງຫລັງສໍານັກງານປົກຄອງນະ ຄອນຫລວງວຽງຈັນ.
ພັນໂທ ເດດລືຊາ ກ່າວຕື່ມວ່າ: ການປະຕິບັດວຽກງານຂອງເຈົ້າໜ້າທີ່ຢູ່ຂອບ ເຂດປະຕູໄຊ ແມ່ນຈະດໍາເນີນໄປຮອດຕົ້ນເດືອນກຸມພາທີ່ຈະມາເຖີງນີ້, ຫລັງຈາກນັ້ນ ຈະນໍາໃຊ້ມາດຕະການປັບໄໝຕໍ່ຜູ້ລະເມີດລະບຽບການທີ່ກໍານົດໄວ້ຕາມກໍລະນີໜັກ ຫລື ເບົາ. ສະນັ້ນ, ທ່ານໄດ້ຮຽກຮ້ອງມາຍັງບຸກຄົນ ແລະ ນິຕິ ບຸກຄົນ ກໍຄື ຜູ້ປະກອບການຂົນສົ່ງນັກທ່ອງທ່ຽວ ຈົ່ງເອົາໃຈໃສ່ຈັດຕັ້ງປະຕິບັດຕາມແຈ້ງການ ສະບັບເລກທີ 12995/ຍທຂ. ນວ ຢ່າງເຂັ້ມງວດ ເພື່ອໃຫ້ສະຖານທີ່ທ່ອງທ່ຽວປະຕູໄຊ ມີຄວາມ ສວຍງາມ ແລະ ເປັນລະບຽບຮຽບຮ້ອຍດີ, ທັງຮັບປະກັນບໍ່ໃຫ້ມີອຸບັດຕິເຫດເກີດຂຶ້ນ
BT, ວສລ
