ໃນວັນທີ 10 ມັງກອນ 2025 ນີ້, ສະຫາຍ ບຸນທອງ ຈິດມະນີ ກໍາມະການກົມການເມືອງ, ຜູ້ປະຈໍາການຄະນະເລຂາທິການສູນກາງພັກ, ຮອງປະທານປະເທດ ໄດ້ຕ້ອນຮັບ ສະຫາຍ ຟ້າມ ມິງ ຈິງ ກໍາມະການກົມການເມືອງ, ນາຍົກລັດຖະມົນຕີ ແຫ່ງ ສສ ຫວຽດນາມ ພ້ອມດ້ວຍຄະນະ ໃນໂອກາດ ເດີນທາງມາຢ້ຽມຢາມ ແລະ ເຮັດວຽກ ຢູ່ ສປປ ລາວ ໃນລະຫວ່າງວັນທີ 9-10 ມັງກອນ 2025.
ໂອກາດນີ້, ສະຫາຍ ບຸນທອງ ຈິດມະນີ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງ ຕໍ່ສະຫາຍ ຟ້າມ ມິງ ຈິງ ທີ່ໄດ້ນຳພາຄະນະ ເດີນທາງມາຢ້ຽມຢາມ ແລະ ເຮັດວຽກ ຢູ່ ສປປ ລາວ ໃນຄັ້ງນີ້ ເຊິ່ງເປັນການສະ ແດງເຖິງການມີຊີວິດຊີວາ ຂອງການພົວພັນ ລະຫວ່າງ ການນໍາຂັ້ນສູງ ສອງພັກ, ສອງລັດ ລາວ-ຫວຽດນາມ, ທັງເປັນການປະກອບສ່ວນສໍາຄັນ ຕໍ່ການເພີ່ມພູນຄູນສ້າງ ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ໃຫ້ນັບມື້ແໜ້ນແຟ້ນ ແລະ ເລິກເຊິ່ງ. ພ້ອມນີ້, ຍັງໄດ້ ຕີລາຄາສູງ ແລະ ສະແດງຄວາມຊົມເຊີຍ ຕໍ່ບັນດາໄຊຊະນະ, ຜົນສໍາເລັດອັນສໍາຄັນ, ໃຫຍ່ຫລວງ, ຮອບດ້ານ ແລະ ມີຄວາມໝາຍປະຫວັດສາດ ທີ່ພັກ, ລັດ ແລະ ປະຊາຊົນຫວຽດນາມອ້າຍນ້ອງ ຍາດມາໄດ້ຕະຫລອດໄລຍະຜ່ານມາ ອັນໄດ້ເຮັດໃຫ້ ສສ ຫວຽດນາມ ມີສະຖຽນລະພາບທາງດ້ານການເມືອງ ຢ່າງໜັກແໜ້ນ, ວຽກງານປ້ອງກັນຊາດ, ປ້ອງກັນຄວາມສະຫງົບ ມີຄວາມເຂັ້ມແຂງ, ເສດຖະກິດ ມີການຂະຫຍາຍຕົວດ້ວຍຈັງຫວະສູງ ແລະ ຕໍ່ເນື່ອງ, ຊີວິດການເປັນຢູ່ຂອງປະຊາຊົນ ໄດ້ຮັບການປັບປຸງດີຂຶ້ນ, ການພົວພັນຮ່ວມມື ແລະ ເຊື່ອມໂຍງສາກົນ ສືບຕໍ່ໄດ້ຮັບການເປີດກວ້າງ, ບົດບາດອິດທິພົນຂອງ ພັກ ແລະ ລັດ ຫວຽດນາມ ນັບມື້ນັບສູງເດັ່ນຂຶ້ນໃນເວທີພາກພື້ນ ແລະ ສາກົນ, ອັນພົ້ນເດັ່ນ ໃນໄລຍະທີ່ສະຫາຍ ຟ້າມ ມິງຈິງ ຂຶ້ນເປັນນາຍົກລັດຖະມົນຕີ ຂອງ ສສ ຫວຽດນາມ ເຫັນວ່າການພັດທະນາເສດຖະກິດ-ສັງຄົມ ຂອງຫວຽດນາມ ມີການຂະຫຍາຍຕົວຫລາຍດ້ານ ຄື: ດ້ານຄົມມະນາຄົມ, ດ້ານວິທະຍາສາດເຕັກໂນໂລຊີ, ນະວັດຕະກໍາ, ການຫັນເປັນດີຈິຕອນ, ຫັນເປັນສີຂຽວ, ພັດທະນາເສດຖະກິດສີຂຽວ, ເສດຖະກິດຄົບວົງຈອນ, ເສດຖະກິດຄວາມຮູ້, ເສດຖະກິດແບ່ງປັນ.
ພ້ອມນີ້, ສະຫາຍ ບຸນທອງ ຈິດມະນີ ຍັງໄດ້ຕີລາຄາສູງ ຕໍ່ຜົນສໍາເລັດການມາຢ້ຽມຢາມເຮັດວຽກ ແລະ ເປັນປະທານຮ່ວມຊີ້ນໍາ ກອງປະຊຸມ ຄັ້ງທີ 47 ຂອງ ຄະນະກໍາມະການຮ່ວມມື ລະຫວ່າງ ສອງລັດຖະບານ ລາວ-ຫວຽດນາມ ປະຈໍາປີ 2025 ຢູ່ ນະຄອນຫລວງວຽງຈັນ ເຊິ່ງສອງລັດຖະບານ ໄດ້ຮ່ວມກັນປຶກສາຫາລື ແລະ ເຫັນດີເປັນເອກະພາບລົງນາມບົດບັນທຶກກອງປະຊຸມ ຄັ້ງທີ 47 ຂອງ ຄະນະກໍາມະການຮ່ວມມືທະວິພາຄີ ລະຫວ່າງ ສອງລັດຖະບານ ລາວ-ຫວຽດນາມ ແລະ ຂໍ້ຕົກລົງວ່າດ້ວຍແຜນການຮ່ວມມື ປະຈໍາປີ 2025 ລະຫວ່າງ ສອງລັດຖະບານ ລາວ-ຫວຽດນາມ ເຊິ່ງເປັນການປະກອບສ່ວນສໍາຄັນເຂົ້າໃນການເພີ່ມພູນຄູນສ້າງ ສາຍພົວພັນມິດຕະ ພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລາວ-ຫວຽດນາມ ແລະ ຫວຽດນາມ-ລາວ, ທັງເປັນການຜັນຂະຫຍາຍ ແລະ ຫັນເປັນອັນລະອຽດ ບັນດາທິດນໍາຂອງການນໍາຂັ້ນສູງສອງພັກ, ສະແດງຄວາມຂອບໃຈ ຕໍ່ພັກ, ລັດ ແລະ ປະຊາຊົນຫວຽດນາມ ອ້າຍນ້ອງ ທີ່ໃຫ້ການສະໜັບສະໜູນຊ່ວຍເຫລືອອັນໃຫຍ່ຫລວງ, ລໍ້າຄ່າ, ທັນການ ແລະ ມີປະສິດທິຜົນ ຕໍ່ການປະຕິວັດປົດປ່ອຍຊາດຂອງປະຊາຊົນລາວ ໃນເມື່ອກ່ອນ ກໍຄື ພາລະ ກິດປົກປັກຮັກສາ ແລະ ສ້າງສາພັດທະນາປະເທດຊາດ ໃນປັດຈຸບັນ, ພິເສດ ໃນປີ 2024, ພັກ, ລັດ ສສ ຫວຽດ ນາມ ໄດ້ໃຫ້ການສະໜັບສະໜູນຊ່ວຍເຫລືອແກ່ ສປປ ລາວ ທັງດ້ານບົດຮຽນ ແລະ ທາງດ້ານວັດຖຸ-ເຕັກນິກຕ່າງໆ ເພື່ອເຮັດໜ້າທີ່ ໃນການເປັນປະທານໝູນວຽນອາຊຽນ ຂອງ ສປປ ລາວ ໄດ້ຮັບຜົນສໍາເລັດຢ່າງຈົບງາມ.
ສະຫາຍ ຟ້າມ ມິງ ຈິງ ກໍໄດ້ສະແດງຄວາມຂອບໃຈ ແລະ ຕີລາຄາສູງ ຕໍ່ສະຫາຍ ບຸນທອງ ຈິດມະນີ ທີ່ໄດ້ໃຫ້ການຕ້ອນຮັບ ຢ່າງອົບອຸ່ນໃນຄັ້ງນີ້, ພ້ອມທັງ ສະແດງຄວາມຊົມເຊີຍ ຕໍ່ຜົນສໍາເລັດຂອງການພົວພັນຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນ ສອງຊາດ ຫວຽດນາມ-ລາວ ໃນໄລຍະຜ່ານມາ ເຊິ່ງໄດ້ປະ ກອບສ່ວນອັນສໍາຄັນ ເຂົ້າໃນການເສີມຂະຫຍາຍສາຍພົວພັນ ແລະ ການຮ່ວມມືສອງຝ່າຍ ໃຫ້ຂະຫຍາຍຕົວຢ່າງບໍ່ຢຸດຢັ້ງ, ພ້ອມທັງໄດ້ສະແດງຄວາມຊົມເຊີຍ ຕໍ່ຜົນສໍາເລັດໃນການເປັນປະທານອາຊຽນ ແລະ ກອງປະຊຸມໄອປາ ຄັ້ງທີ 45 ໃນປີ 2024 ຂອງ ສປປ ລາວ ປະສົບຜົນສຳເລັດຢ່າງຈົບງາມ.
