ກອງປະຊຸມສະຫລຸບວຽກງານປ້ອງກັນຊາດ-ປ້ອງກັນຄວາມສະຫງົບ (ປກຊ-ປກສ) 4 ແຂວງ (ອຸດົມໄຊ, ບໍ່ແກ້ວ, ຫລວງນໍ້າທາ ແລະ ຜົ້ງສາລີ) ແລະ ກອງພົນທະຫານຮາບທີ 3 ປະຈໍາປີ 2024 ແລະ ທິດທາງແຜນການ ປີ 2025 ຈັດຂຶ້ນໃນວັນທີ 9 ມັງກອນ 2025 ຢູ່ແຂວງອຸດົມໄຊ ໂດຍການເປັນປະທານຂອງທ່ານ ພົນເອກ ຈັນສະໝອນ ຈັນຍາລາດ ຮອງປະທານ, ຜູ້ປະຈໍາການ ຄະນະກໍາມະການປ້ອງກັນຊາດ-ປ້ອງກັນຄວາມສະຫງົບສູນກາງ, ຮອງນາຍົກລັດຖະມົນຕີ; ມີບັນດາ ປະທານ ແລະ ຄະນະກໍາມະການປ້ອງກັນຊາດ-ປ້ອງກັນຄວາມສະຫງົບຂັ້ນແຂວງ ຂອງບັນດາແຂວງດັ່ງກ່າວ, ພ້ອມດ້ວຍ ຄະນະບັນຊາກອງພົນທະຫານຮາບທີ 3 ເຂົ້າຮ່ວມ.
ໃນໂອກາດນີ້, ທ່ານ ບຸນຄົງ ຫລ້າຈຽມພອນ ເຈົ້າແຂວງອຸດົມໄຊ, ປະທານຄະນະກໍາມະການປ້ອງກັນຊາດ-ປ້ອງກັນຄວາມສະຫງົບແຂວງ ໄດ້ມີຄຳເຫັນກ່າວຕ້ອນຮັບບັນດາການນຳຈາກສູນກາງ ແລະ ທ້ອງຖິ່ນ, ພ້ອມທັງແຈ້ງໃຫ້ຊາບ ຈຸດປະສົງຂອງຈັດກອງປະຊຸມໃນຄັ້ງນີ້. ຈາກນັ້ນ, ກໍໄດ້ຕາງໜ້າໃຫ້ການນຳບັນດາແຂວງ ແລະ ກອງພົນທະຫານຮາບທີ 3 ລາຍງານໃຫ້ຊາບກ່ຽວກັບຜົນການຈັດຕັ້ງປະຕິບັດວຽກງານປ້ອງກັນຊາດ-ປ້ອງກັນຄວາມສະຫງົບ ໃນຂອບເຂດຄວາມຮັບຜິດຊອບ ແຂວງອຸດົມໄຊ, ບໍ່ແກ້ວ, ຫລວງນໍ່້າທາ, ຜົ້ງສາລີ ແລະ ກອງພົນທະຫານຮາບທີ 3 ໄລຍະ 1 ປີຜ່ານມາ ເຫັນວ່າ ທຸກພາກສ່ວນໄດ້ຕັ້ງໜ້າເປັນເຈົ້າການເຄື່ອນໄຫວປະຕິບັດໜ້າທີ່ສະກັດກັ້ນ ບັນດາປະກົດການຫຍໍ້ທໍ້ໃນສັງຄົມ, ເຮັດໜ້າທີ່ເຄື່ອນໄຫວປ້ອງກັນເວນຍາມໃຫ້ມີຄວາມເປັນລະບຽບ ແລະ ມີຄວາມສະຫງົບ, ປະກອບສ່ວນສຳຄັນເຂົ້າໃນແຜນພັດທະນາເສດຖະກິດ-ສັງຄົມ ເຮັດໃຫ້ 4 ແຂວງ ສືບຕໍ່ມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບປອດໄພ ແລະ ເປັນລະບຽບຮຽບຮ້ອຍ.
ສຳລັບທິດທາງແຜນວຽກຈຸດສຸມປີ 2025 ແມ່ນສືບຕໍ່ເກັບກຳສະພາບການທີ່ເກີດຂຶ້ນຢູ່ສາກົນ ແລະ ພາກພື້ນ, ຕິດຕາມການເຄື່ອນໄຫວຂອງກຳລັງອິດທິປໍລະປັກ, ກຸ່ມຄົນບໍ່ດີທີ່ເຄື່ອນໄຫວຢູ່ພາຍໃນ ແລະ ຕ່າງປະເທດ ເພື່ອສືບຕໍ່ຮັບປະກັນຮັກສາໄດ້ຄວາມສະຫງົບປອດໄພ, ສັງຄົມຄົມມີສະຖຽນລະພາບຢ່າງໜັກແໜ້ນ, ຕັ້ງໜ້າແກ້ໄຂຢ່າງເດັດຂາດ ຕໍ່ບັນດາໜໍ່ແໜງທີ່ພາໃຫ້ເກີດຄວາມບໍ່ສະຫງົບຢູ່ 4 ແຂວງ ຕົກໄປຢ່າງສິ້ນເຊີງ, ສືບຕໍ່ຫັນລົງກໍ່ ສ້າງຮາກຖານການເມືອງ ຕາມ 4 ເນື້ອໃນ, 4 ຄາດໝາຍ, ປົກປັກຮັກສາຄວາມສະຫງົບຕາມຂອບເຂດຊາຍແດນ ແລະ ເພີ່ມທະວີການນໍາພາ-ຊີ້ນໍາ ຂອງຄະນະກຳມະການ ປກຊ-ປກສ ແຕ່ລະຂັ້ນ ໃຫ້ມີຄວາມໜັກແໜ້ນທາງດ້ານການເມືອງ-ແນວຄິດ, ມີຊື່ສັດ ແລະ ຈົງຮັກພັກດີຕໍ່ພັກ-ຕໍ່ປະເທດຊາດ. ໃນໂອກາດນີ້, ກອງປະຊຸມຍັງໄດ້ຮັບຟັງການປະກອບຄໍາຄິດ, ຄໍາເຫັນຈາກບັນດາຜູ້ຕາງໜ້າຄະນະກໍາມະການ ປກຊ-ປກສ ບັນດາແຂວງ, ບັນດາອົງການຂອງ 2 ກະຊວງ ປກຊ-ປກສ.
ໃນໂອກາດດຽວກັນ, ທ່ານ ຮອງນາຍົກລັດຖະມົນຕີ ກໍໄດ້ສະແດງຄວາມຊົມເຊີຍຕໍ່ຜົນສຳເລັດ ໃນການປະຕິບັດວຽກງານ ປ້ອງກັນຊາດ-ປ້ອງກັນຄວາມສະຫງົບ ໃນໄລຍະ 1 ປີຜ່ານມາ ຢູ່ 4 ແຂວງດັ່ງກ່າວ. ອັນສໍາຄັນ, ທ່ານ ຮອງນາຍົກລັດຖະມົນຕີ ໄດ້ມີຄຳເຫັນເນັ້ນໜັກໃຫ້ຄະນະປ້ອງກັນຊາດ-ປ້ອງກັນຄວາມສະຫງົບ 4 ແຂວງ ຈົ່ງພ້ອມກັນປະຕິບັດແນວທາງປ້ອງກັນຊາດ-ປ້ອງກັນຄວາມສະຫງົບ ທົ່ວປວງຊົນຮອບດ້ານຢ່າງໜັກແໜ້ນ, ກຳແໜ້ນວຽກງານຕ່າງໆ; ຕໍ່ຕ້ານ, ທັບມ້າງກົນອຸບາຍ ແລະ ຍຸດທະສາດເຄື່ອນໄຫວຂອງກໍາລັງອິດທິປໍລະປັກ, ກຸ່ມຄົນບໍ່ດີ; ຮັບປະກັນພື້ນທີ່ຂອບເຂດຂອງ 4 ແຂວງ ມີຄວາມສະຫງົບ, ມີສະຖຽນລະພາບທາງການເມືອງ ຢ່າງໜັກແໜ້ນ, ສັງຄົມມີຄວາມເປັນລະບຽບຮຽບຮ້ອຍ; ສຸມທຸກກໍາລັງແຮງເຂົ້າໃສ່ວຽກງານຮາກຖານການເມືອງ ໃຫ້ມີຄຸນນະພາບ; ເອົາໃຈໃສ່ພິເສດຕໍ່ບັນດາເມືອງ ແລະ ບ້ານ ທີ່ມີຄວາມຫລໍ່ແຫລມ; ສະກັດກັ້ນກຸ່ມຄົນບໍ່ດີ ທີ່ໂຄສະນາຊວນເຊື່ອ, ຍຸແຍ່ແກ່ດຶງປະຊາຊົນ ເຄື່ອນໄຫວໄປໃນທາງທີ່ບໍ່ຖືກຕ້ອງ, ແກ້ໄຂບັນຫາຄົນບໍ່ດີທີ່ຫລົບລີ້ຢູ່ຕາມບ້ານ ແລະ ພື້ນທີ່ຕ່າງໆ ດ້ວຍບັນດາມາດຕະການ ຢ່າງຄ່ອງແຄ້ວ ແລະ ເດັດຂາດ; ຕອບຕ້ານທຸກການລະເມີດລ່ວງລໍ້າ ເຊື່ອມຍຶດຊາຍແດນ; ປັບປຸງກໍ່ສ້າງພັກ ໃນກຳລັງປະກອບອາວຸດ ໃຫ້ໜັກແໜ້ນທາງດ້ານການເມືອງ-ແນວຄິດ, ສືບຕໍ່ຮັບປະກັນທາງດ້ານພາລາທິການ-ເຕັກນິກ ໃຫ້ບັນດາກົມກອງ ແລະ ທ້ອງຖິ່ນ; ເອົາໃຈໃສ່ພົວພັນ ແລະ ຮ່ວມມືກັບຕ່າງປະເທດ ໂດຍສະເພາະ ບັນດາປະເທດເພື່ອນມິດ ໃນການແລກປ່ຽນຂໍ້ມູນຂ່າວສານ, ການຮັກສາຄວາມສະຫງົບ ແລະ ຄວາມເປັນລະບຽບຮຽບຮ້ອຍຕາມຊາຍແດນ, ຍາດແຍ່ງການຊ່ວຍເຫລືອດ້ານຕ່າງໆ ເພື່ອປັບປຸງ ແລະ ພັດທະນາກໍາລັງ ປກຊ-ປກສ ໃຫ້ມີຄວາມໜັກແໜ້ນເຂັ້ມແຂງຂຶ້ນບໍ່ຢຸດຢັ້ງ.
ຂ່າວ-ພາບ: ກົມປະຊາສຳພັນ, ຫສນຍ.
