ວິທະຍຸກະຈາຍສຽງຫວຽດນາມລາຍງານວ່າ: ເມື່ອບໍ່ດົນມານີ້, ສະຫະສະມາຄົມວິສາຫະກິດເອີຣົບ ປະຈຳ ຫວຽດນາມ (EuroCham Viet Nam) ໄດ້ປະກາດດັດຊະນີຄວາມເຊື່ອໝັ້ນດຳເນີນທຸລະກິດ ຢູ່ ຫວຽດນາມ (BCI). ໂດຍ BCI ບັນລຸລະດັບສູງສຸດໃນ 2 ປີຜ່ານມາ, ເພີ່ມຂຶ້ນ 46.3 ໃນໄຕມາດທີ IV/2023 ຂຶ້ນເປັນ 61.8 ໃນໄຕມາດທີ IV 2024. ໝາກຜົນດັ່ງກ່າວ ເປັນການພິສູດໃຫ້ເຫັນຄວາມສາມາດຟື້ນຟູທີ່ໜ້າປະທັບໃຈຂອງ ຫວຽດນາມ ຕໍ່ໜ້າການຜັນແປຂອງທົ່ວໂລກ, ພ້ອມທັງຢັ້ງຢືນທີ່ຕັ້ງທີ່ນັບມື້ນັບພົ້ນເດັ່ນຂອງປະເທດ ຄືເປັນສູນການຄ້າ ແລະ ການລົງທຶນຂອງພາກພື້ນ.
ຂ່າວລະບຸວ່າ: ຜົນການສຳຫຼວດໄດ້ສະແດງໃຫ້ເຫັນວ່າ 42% ຂອງຜູ້ຕາງໜ້າວິສາຫະກິດເອີຣົບ ຢູ່ ຫວຽດນາມ ໃຫ້ຮູ້ວ່າ: ເຂົາເຈົ້າຮູ້ສຶກໄດ້ເຖິງຄວາມຕັ້ງໜ້າກ່ຽວກັບສະພາບການດຳເນີນທຸລະກິດໃນປັດຈຸບັນ, ໃນຂະນະທີ່ 47% ມີຄວາມຫວັງວ່າ ເງື່ອນໄຂດຳເນີນທຸລະກິດຈະສືບຕໍ່ສະດວກໃນໄຕມາດຕໍ່ໄປ. ຄຽງຄູ່ກັນນັ້ນ, 56% ຄາດຄະເນວ່າ ຄວາມຫວັງຕໍ່ເສດຖະກິດມະຫາພາກຂອງ ຫວຽດນາມ ໃນໄຕມາດທຳອິດຂອງປີ 2025 ໄດ້ຮັບການປົວແປງ.
ຈຸດພົ້ນເດັ່ນທີ່ສຸດໃນບົດລາຍງານແມ່ນ 75% ການນຳວິສາຫະກິດເຂົ້າຮ່ວມການສຳຫຼວດໃຫ້ຮູ້ວ່າ ເຂົາເຈົ້າຈະແນະນຳ ຫວຽດນາມ ຄືສະຖານທີ່ລົງທຶນທີ່ໜ້າຈັບໃຈ. ສິ່ງດັ່ງກ່າວ ໄດ້ເນັ້ນໜັກກ່ຽວກັບຄວາມສຳຄັນຍຸດທະສາດຂອງ ຫວຽດນາມ ທີ່ນັບມື້ນັບເພີ່ມຂຶ້ນ ຄືເປັນສູນລົງທຶນໃນພາກພື້ນ ອາຊີຕາເວັນອອກສ່ຽງໃຕ້.
