ຂ່າວຕ່າງປະເທດລາຍງານ ຫວ່າງມໍ່ໆມານີ້ວ່າ: ຕະຫຼາດຊິບທົ່ວໂລກຈະຂະຫຍາຍຕົວ 11.2% ເປັນ 697.2 ຕື້ໂດລາ ໃນປີ 2025, ຍ້ອນຄວາມຕ້ອງການ semiconductors ສໍາລັບນໍາໃຊ້ໃນສູນຂໍ້ມູນ ແລະ ສະມາດໂຟນ ທີ່ຕິດຕັ້ງເຕັກໂນໂລຊີປັນຍາປະດິດ (AI), ໂດຍອີງຕາມການຄາດຄະເນຂອງອົງການອຸດສາຫະກໍາ ຊຶ່ງທົບທວນປັບໂຕເລກດັ່ງກ່າວເພີ່ມຂຶ້ນ ຈາກການຄາດຄະເນໃນເດືອນມິຖຸນາຜ່ານມາ ທີ່ 687.9 ຕື້ໂດລາ.
ອົງການສະຖິຕິການຄ້າ Semiconductor ໂລກ ຊຶ່ງສ້າງຕັ້ງຂຶ້ນໂດຍກຸ່ມຂອງຜູ້ຜະລິດ chip ທີ່ສໍາຄັນ ລະບຸໃນລາຍງານທ່າອ່ຽງລ້າສຸດວ່າ: ການນໍາໃຊ້ເຕັກໂນໂລຊີ AI ທີ່ເພີ່ມຂຶ້ນພາຍໃນປະເທດ ແລະ ອຸດສາຫະກໍາຕ່າງໆ ໄດ້ກະຕຸ້ນໃຫ້ຄວາມຕ້ອງການຊິບເພີ່ມຂຶ້ນ. ເນື່ອງຈາກບໍລິສັດເຕັກໂນໂລຊີທົ່ວໂລກເລັ່ງຊອກຫາການສະໜອງໃຫ້ພຽງພໍສຳລັບສູນຂໍ້ມູນທີ່ຮອງຮັບການພັດທະນາ generative AI ແລະ ອຸປະກອນທີ່ໃຊ້ເຕັກໂນໂລຊີ AI.
ເມື່ອພິຈາລະນາຕາມປະເພດຜະລິດຕະພັນ ຄາດວ່າຄວາມຕ້ອງການ Semiconductor Logic ຊຶ່ງເຮັດໜ້າທີ່ເປັນສະໝອງຂອງອຸປະກອນເອເລັກໂຕຣນິກ, ຈະຂະຫຍາຍຕົວ 16.8% ເປັນ 243.9 ຕື້ໂດລາ. ໃນຂະນະທີ່ຄວາມຕ້ອງການຊິບໜ່ວຍຄວາມຈໍາ ຊຶ່ງນໍາໃຊ້ໃນການເກັບຮັກສາຂໍ້ມູນ ຄາດວ່າຈະເພີ່ມຂຶ້ນ 13.4% ເປັນ 189.4 ຕື້ໂດລາ.
ສຳລັບຕະຫຼາດ semiconductors ປະເພດຕ່າງໆເຊັ່ນ: ຊິບແອນະລັອກ ຄາດວ່າຈະຂະຫຍາຍຕົວເຊັ່ນດຽວກັນ ເມື່ອເສດຖະກິດໂລກເຕີບໂຕພໍປະມານ.
ເມື່ອພິຈາລະນາຕາມພາກພື້ນ ຄາດວ່າທະວີບອາເມຣິກາ ຈະຂະຫຍາຍຕົວສູງສຸດ ຢູ່ທີ່ 15.4%, ເປັນມູນຄ່າ 215.3 ຕື້ໂດລາ, ຮອງລົງມາຄືພາກພື້ນອາຊີປາຊີຟິກ 10,4% ເປັນມູນຄ່າ 376,3 ຕື້ໂດລາ ແລະ ເອີຣົບ ຄາດວ່າຈະຂະຫຍາຍຕົວຢ່າງໜ້ອຍທີ່ສຸດຢູ່ທີ່ 3.3% ເປັນມູນຄ່າ 53.74 ຕື້ໂດລາ. ສໍາລັບຕະຫຼາດຍີ່ປຸ່ນ, ທາງອົງການດັ່ງກ່າວກ່າວຄາດວ່າຈະຂະຫຍາຍຕົວ 9.4% ເປັນມູນຄ່າ 51.87 ຕື້ໂດລາ. ຕາມການລາຍງານຂອງສຳນັກຂ່າວສານກຽວໂດ.
ທັງນີ້, ອົງການດັ່ງກ່າວຄາດຄະເນວ່າຕະຫຼາດຊິບທົ່ວໂລກໃນປີ 2024 ຈະມີມູນຄ່າປະມານ 62.69 ຕື້ໂດລາ, ເພີ່ມຂຶ້ນ 19.0%, ຍ້ອນວ່າການເຕີບໂຕຂອງຊິບທີ່ກ່ຽວຂ້ອງກັບ AI ໄດ້ຊົດເຊີຍຄວາມຕ້ອງການຂອງຊິບທີ່ໃຊ້ໃນລົດຍົນ ແລະ ອຸປະກອນອຸດສາຫະກໍາ.
