ໃນວັນທີ 6-7 ມັງກອນ 2025 ທີ່ສະພາແຫ່ງຊາດ (ສພຊ) ໄດ້ມີກອງປະຊຸມຮຽບຮຽງເນື້ອໃນສອງຮ່າງກົດໝາຍຄື: ກົດໝາຍວ່າດ້ວຍທີ່ຢູ່ອາໄສ (ສ້າງໃໝ່) ແລະ ກົດໝາຍວ່າດ້ວຍທະນາຄານແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ (ປັບປຸງ) ໂດຍການເປັນປະທານຂອງທ່ານ ສົມມາດ ພົລເສນາ ຮອງປະທານສະພາແຫ່ງຊາດ ເຊິ່ງມີບັນດາທ່ານປະທານ ແລະ ຮອງປະທານກໍາມາທິການທີ່ກ່ຽວຂ້ອງຂອງ ສພຊ, ຮອງລັດຖະມົນຕີກະຊວງໂຍທາທິການ ແລະ ຂົນສົ່ງ, ຮອງລັດຖະມົນຕີກະຊວງຍຸຕິທໍາ, ຮອງຫົວໜ້າຫ້ອງວ່າການສໍານັກງານປະທານປະເທດ, ຮອງຫົວໜ້າຫ້ອງວ່າການສຳນັກງານນາຍົກລັດຖະມົນຕີ, ຮອງຜູ້ວ່າການທະນາຄານແຫ່ງ ສປປລາວ ພ້ອມດ້ວຍຄະນະກົມ, ຄະນະພະແນກ ແລະ ພະນັກງານຈາກ ສພຊ ແລະ ພາກສ່ວນທີ່ກ່ຽວຂ້ອງ; ທັງນີ້, ກໍເພື່ອນຳເອົາຄຳເຫັນຂອງສະມາຊິກສະພາແຫ່ງຊາດ (ສສຊ) ທີ່ໄດ້ປະກອບໃສ່ຮ່າງກົດໝາຍສອງສະບັບນີ້ ມາພິຈາລະນາ, ປັບປຸງໃສ່ເນື້ອໃນສອງຮ່າງກົດໝາຍ ໃຫ້ມີຄວາມຈະແຈ້ງ, ຄົບຖ້ວນ ແລະ ຮັດກຸມ.
ທ່ານ ສົມມາດ ພົລເສນາ ກ່າວວ່າ: ກອງປະຊຸມຄັ້ງນີ້ ແມ່ນການຄົ້ນຄວ້າບັນດາຄຳເຫັນຂອງສະມາຊິກສະພາແຫ່ງຊາດ ທີ່ເຫັນວ່າມີເຫດມີຜົນເພື່ອປັບປຸງໃສ່ກົດໝາຍ 2 ສະບັບດັ່ງກ່າວ ແນໃສ່ເຮັດໃຫ້ເນື້ອໃນຂອງ 2 ກົດໝາຍ ມີຄວາມຄົບຖ້ວນ, ສົມບູນ ແລະ ສາມາດຈັດຕັ້ງປະຕິບັດໄດ້; ເພື່ອຮັບປະກັນໃຫ້ບັນດາຄໍາເຫັນທີ່ສະມາຊິກສະພາແຫ່ງຊາດ ໄດ້ປະກອບໃສ່ ໄດ້ຮັບການຄົ້ນຄວ້າພິຈາລະນາຢ່າງເລິກເຊິ່ງນັ້ນ ໃຫ້ພ້ອມກັນຄົ້ນຄວ້າຕື່ມຕໍ່ຄໍາເຫັນທີ່ບໍ່ສາມາດປັບປຸງໄດ້ນັ້ນ ຄະນະຮັບຜິດຊອບໄດ້ໃຫ້ເຫດຜົນພຽງພໍແລ້ວບໍ່ ຫຼື ຄວນຕ້ອງໄດ້ປັບປຸງຄືແນວໃດ.
ຜູ້ເຂົ້າຮ່ວມໄດ້ສຸມສະຕິປັນຍາຄົ້ນຄວ້າ, ພິຈາລະນາຄືນແຕ່ລະບັນຫາທີ່ ສສຊ ຕັ້ງຂຶ້ນ ແລະ ບັນຫາອື່ນໆ ຢ່າງເລິກເຊິ່ງ ແລະ ຮອບດ້ານໃສ່ເນື້ອໃນ 2 ກົດໝາຍດັ່ງກ່າວ.
ທີ່ມາ: ຂ່າວຜູ້ແທນປະຊາຊົນ
