ສຳລັບງານບຸນກິນຈຽງ ຫລື ບຸນນໍເປ່ເຈົ້າ ທີ່ ສວນພຶກສາ ຈັດຂຶ້ນໃນລະຫວ່າງ ວັນທີ 3-5 ມັງກອນທີ່ຜ່ານມາ ເຊິ່ງສ້າງບັນຍາກາດ ໃຫ້ງານສະເຫລີມສະຫລອງບຸນກິນຈຽງ ມີຄວາມຄຶກຄື້ນມ່ວນຊື່ນ, ຮັກສາໄດ້ຄວາມສາມັກຄີ, ຮັກແພງ, ຮີດຄອງປະເພນີ ຂອງຊົນເຜົ່າມົ້ງ ແລະ ອື່ນໆ. ການຈັດງານໃນຄັ້ງນີ້, ເພື່ອສົ່ງເສີມ ແລະໃຫ້ໂອກາດແກ່ລູກຫລານຊົນເຜົ່າມົ້ງ ທັງຊາວໜຸ່ມ ຍິງ ແລະ ຊາຍ ໃຫ້ມີບ່ອນສະແດງຄວາມສາມາດຮອບດ້ານ ຂອງເຂົາເຈົ້າ ທາງດ້ານປັນຍາສຶກສາ, ສິລະປະສຶກສາ ແລະ ອື່ນໆ ຈາກລະດັບທ້ອງຖິ່ນສູ່ລະດັບຊາດ ແລະ ກ້າວສູ່ສາກົນ, ທັງເປັນການ ສົ່ງເສີມສິນຄ້າບັນດາເຜົ່າ. ພ້ອມນີ້, ຍັງເປັນການສ້າງຄວາມສາມັກຄີພາຍໃນຂອງຊົນເຜົ່າມົ້ງ ກັບເຜົ່າອື່ນໆ ໄດ້ຊ່ວຍກັນປົກປັກຮັກສາຮີດຄອງປະເພນີອັນລໍ້າຄ່າຂອງຕົນເອງໄວ້ ແລະ ຊ່ວຍກັນສົ່ງເສີມໃຫ້ຢູ່ຄູ່ວັດທະນະທຳລາວ ຕະຫລອດໄປ. ໃນປີນີ້ ມີຄວາມພິເສດຄື ມີການປະກວດນາງສາວເຜົ່າມົ້ງ ນະຄອນຫລວງວຽງຈັນ ແລະ ການປະກວດນັກຮ້ອງສຽງດີ ປະຈຳປີ 2025 ເຊິ່ງກໍ່ໄດ້ຜ່ານການເກັບໂຕ ແລະ ປະກວດໃນຮອບຄັດເລືອກຕ່າງໆຂອງເວທີດັ່ງກ່າວຜູ້ຈົນສາມາດຄັດເລືອກໄດ້ໃນຮອບຕັດສິນ ທີ່ຈັດຂື້ນໃນຄ່ຳຄືນຂອງວັນທີ 4 ແລະ ທີ່ 5 ມັງກອນທີ່ຜ່ານມາ.
ເຊິ່ງການປະກວດນາງສາວເຜົ່າມົ້ງນະຄອນຫລວງວຽງຈັນ ປະຈຳປີ 2025 ຜົນປະກົດວ່າ: HM16 ນາງ ປີຍະດາ ຕົງນາມມະວົງ ຈາກນະຄອນຫຼວງວຽງຈັນ ໄດ້ຮັບຕຳແໜ່ງ ນາງສາວເຜົ່າມົ້ງ ນະຄອນຫຼວງວຽງຈັນ ປະຈຳປີ 2025, HM15 ນາງ ເກ້ຍ ຢ່າງ ຈາກແຂວງວຽງຈັນ ໄດ້ຮັບຕຳແໜ່ງຮອງອັນດັບ1 ນາງສາວເຜົ່າມົ້ງ ນະຄອນຫຼວງວຽງຈັນ ປະຈຳປີ 2025, HM07 ນາງ ມະລີ ຢ່າງແສນໄຊ ຈາກແຂວງຫລວງພະບາງ ໄດ້ຮັບຕຳແໜ່ງຮອງອັນດັບ2 ນາງສາວເຜົ່າມົ້ງ ນະຄອນຫຼວງວຽງຈັນ ປະຈຳປີ 2025 ແລະ ສ່ວນວ່າ ຕຳແໜ່ງຮອງອັນດັບ3 ແມ່ນມີ 2 ຄົນ ຄື HM02 ນາງ ນາຮາລີ ຈາກແຂວງໄຊສົມບູນ ແລະ HM12 ນາງ ດໍຈີ ລາວຮົວ ຈາກນະຄອນຫລວງວຽງຈັນ ໄດ້ຮັບຕຳແໜ່ງຮອງອັນດັບ3 ນາງສາວເຜົ່າມົ້ງ ນະຄອນຫຼວງວຽງຈັນ ປະຈຳປີ 2025.
ສຳລັບ ຜົນຂອງການປະກວດນັກຮ້ອງສຽງດີ ປະຈຳປີ 2025 ຜົນປະກົດວ່າ ໝາຍເລກ 06 ນາງ ຈັນພອນ ຊົງໃຈຍົ້ວ ຄວ້າຕຳແຫນ່ງ ນັກຮ້ອງສຽງດີ ປະຈຳປີ 2025ຂອງ ສວນພຶກສາໄປຄອງ ດ້ວຍນຳສຽງທີ່ຊົງພະລັງ ແລະ ມີຄວາມອອນຊອນໃນນຳສຽງ ຈຶ່ງຍາດໄດ້ຕຳແຫ່ງດັ່ງກ່າວ, ໝາຍເລກ 13 ທ້າວ ກ້ອງເມັ້ງ ທ່າວ ຍາດໄດ້ຮອງຊະນະເລີດ ອັນດັບ 1 ແລະ ໝາຍເລກ 19 ທ້າວ ຢົງລູເຮີ່ ລຽວເຊີ ຍາດໄດ້ຮອງຊະນະເລີດ ອັນດັບ 2 ນັກຮ້ອງສຽງດີ ປະຈຳປີ 2025.
ໃຫ້ກຽດເຂົ້າຮ່ວມກ່າວເປີດງານປະກວດນາງສາວງາມເຜົ່າມົ້ງ ນະຄອນຫລວງວຽງຈັນ ປະຈຳປີ 2025 ໃນງານບຸນກິນຈຽງ ຫລື ບຸນນໍເປ່ເຈົ້າ ທີ່ ສວນພຶກສາ ຂອງທ່ານ ຈະເລີນ ເຢ່ຍປາວເຮີ ຮອງປະທານສະພາແຫ່ງຊາດ, ມີທ່ານ ເຍ່ຍເກີຢ່າ ຫນໍ່ຈໍ່ຈົງຕົວ ຮອງປະທານສູນກາງແນວລາວສ້າງຊາດ, ທ່ານ ພູວົງ ພະມີສິດ ປະທານຮ້ານຄຳພູວົງ ແລະ ເຈົ້າຂອງສວນພຶກສາ, ທ່ານເຈົ້າເມືອງນາຊາຍທອງ, ຄະນະກຳມະການ, ແຂກຖືກເຊີນ ແລະ ມ່ວນຊົນເຂົ້າຮ່ວມຢ່າງຄຶກຄືນມ່ວນຊື້ນ ແລະ ມີຄວາມຫມາຍ.
