ສຸຂະພາບແມ່ ແລະ ເດັກ ຄືຮາກຖານສຳຄັນຂອງການພັດທະນາສັງຄົມ ເພາະແມ່ຄືຜູ້ໃຫ້ຊີວິດ ແລະ ເດັກນ້ອຍຄືອະນາຄົດຂອງພວກເຮົາ ແຕ່ໃນຫຼາຍພື້ນທີ່ຂອງປະເທດເຮົາ ການເຂົ້າເຖິງບໍລິການສຸຂະພາບ ຍັງຄົງແມ່ນຄວາມທ້າທາຍໃຫຍ່ທີ່ຕ້ອງແກ້ໄຂ
ອົງການຢູນີເຊັບ ໄດ້ເຮັດວຽກຮ່ວມກັບລັດຖະບານ ເພື່ອປັບປຸງການບໍລິການສຸຂະພາບ ໂດຍສະເພາະໃນເຂດຊົນນະບົດ ເພື່ອສົ່ງເສີມສຸຂະພາບແມ່ ບໍ່ວ່າຈະເປັນ ການເບິ່ງແຍງດູແລກ່ອນ ແລະ ຫຼັງເກີດລູກ, ການສັກວັກຊີນ ແລະ ການແນະນຳເລື່ອງໂພຊະນານທີ່ດີໃຫ້ກັບແມ່ ແລະ ເດັກ. ສຸຂະພາບແມ່ ແລະ ເດັກຄືພື້ນຖານຂອງອະນາຄົດທີ່ແຂງແຮງ, ຢູນິເຊັບຈະຍັງຄົງເດີນໜ້າສ້າງການປ່ຽນແປງພຶດຕິກຳ ເພື່ອໃຫ້ທຸກຄົນມີໂອກາດເທົ່າທຽມກັນ ໂດຍສະເພາະໃຫ້ເດັກໄດ້ຮັບສິດ ແລະ ຜົນປະໂຫຍດຂອງຕົນ.
ຄືດັ່ງໃນກົດໝາຍວ່າດ້ວຍການປົກປ້ອງສິດ ແລະ ຜົນປະໂຫຍດຂອງເດັກ ໃນມາດຕາທີ 4 ໄດ້ລະບຸໄວ້ວ່າ: ເດັກທຸກຄົນມີສິດ ແລະ ຜົນປະໂຫຍດ ຄື: ດຳລົງຊີວິດຢ່າງປອດໄພ ແລະ ໄດ້ຮັບການພັດທະນາທາງດ້ານຮ່າງກາຍ, ຈິດໃຈ ແລະ ມັນສະໜອງ, ໄດ້ຮັບການເບິ່ງແຍງດ້ານສຸຂະພາບ, ການປິ່ນປົວ ແລະ ຟື້ນຟູສຸຂະພາບໃນເວລາເຈັບເປັນ.
ເມື່ອພວກເຮົາເຂົ້າໃຈແລ້ວວ່າ: ສຸຂະພາບແມ່ ແລະ ເດັກສຳຄັນ,ພວກເຮົາສາມາດຊ່ວຍໄດ້ຫຼາຍວິທີ ເຊັ່ນ: ການໃຫ້ຄວາມຮູ້ແກ່ແມ່ແລະເດັກຫຼາຍຂຶ້ນ ລວມເຖິງຕົວຂອງແມ່ ແລະ ເດັກເອງກໍຕ້ອງໃຫ້ຄວາມສຳຄັນເລື່ອງຂອງການກວດສຸຂະພາບ, ການກິນອາຫານທີ່ມີປະໂຫຍດ, ແມ່ມືໃໝ່ກໍຕ້ອງປຶກສາກັບແພດໝໍເລື້ອຍໆຮັບຄຳອະທິບາຍຢ່າງລະອຽດໃນການເບິ່ງແຍງຮັກສາສຸຂະພາບ.
