ວຽກງານການເມືອງ-ແນວຄິດ ແມ່ນວິທະຍາສາດສັງລວມອັນໜຶ່ງທີ່ກະທົບໃສ່ຈິດໃຈຂອງຄົນ, ເຮັດໃຫ້ຄົນມີຄວາມເຂົ້າໃຈ, ມີສະຕິ, ມີອາລົມຈິດ, ມີທັດສະນະຫຼັກໝັ້ນ, ມີຄວາມເຊື່ອໝັ້ນ, ມີອຸດົມການ ແລະ ປະຕິບັດຕາມຄວາມຕ້ອງການຕ່າງໆຂອງສັງຄົມ. ພັກເຮົາຖືວ່າວຽກງານການເມືອງ-ແນວຄິດເປັນວຽກງານທໍາອິດ, ເປັນວຽກກົກ ແລະ ສອດຫ້ອຍໄປນໍາທຸກຂົງເຂດວຽກງານ. ປະທານ ໄກສອນ ພົມວິຫານ ຖືວຽກງານການເມືອງ-ແນວຄິດ ແມ່ນວຽກງານທີ່ພົວພັນກັບຄົນ, ແມ່ນວຽກເພື່ອເອົາຊະນະຈິດໃຈຄົນ, ວຽກງານການເມືອງ-ແນວຄິດຂອງພັກ ແມ່ນວຽກທີ່ນໍາເອົາທັດສະນະແນວທາງ, ແຜນນະໂຍບາຍຂອງພັກ ລົງສູ່ມະຫາຊົນ, ເຮັດໃຫ້ກາຍເປັນການກະທໍາຂອງມະຫາຊົນ.
ພັກປະຊາຊົນ ປະຕິວັດລາວ ໄດ້ຖືວ່າວຽກງານການເມືອງ-ແນວຄິດ ເປັນສ່ວນປະກອບທີ່ສໍາຄັນໃນການກໍ່ສ້າງພັກ, ສ້າງພະນັກງານ; ເປັນພາຫະນະອັນແຫຼມຄົມ ເພື່ອສຶກສາອົບຮົມພາຍໃນພັກ ແລະ ພາຍໃນມະຫາຊົນ, ເປັນວຽກທີ່ຕ້ອງເຮັດເປັນປະຈໍາ ແລະ ສອດຫ້ອຍໄປທຸກຂົງເຂດວຽກງານຂອງພັກ-ລັດ, ຂອງການຈັດຕັ້ງມະຫາຊົນ ແລະ ອົງການຈັດຕັ້ງສັງຄົມ, ພັກໄດ້ຢືນຢັນວ່າ: ວຽກງານການເມືອງ-ແນວຄິດເປັນປັດໄຈຮັບປະກັນທຸກໄຊຊະນະຂອງການປະຕິວັດ.
+ ວຽກງານການເມືອງ-ແນວຄິດຂອງພັກ ມີຄວາມສໍາຄັນທີ່ສຸດຕໍ່ທຸກຂະບວນການເຄື່ອນໄຫວຂອງສັງຄົມ ຍ້ອນມັນເປັນວຽກໜຶ່ງທີ່ຕິດພັນກັບການເຄື່ອນໄຫວປະຕິວັດ, ຕິດພັນກັບຂະບວນການວຽກງານຂອງພັກ, ຂອງລັດ, ມີການປະຕິວັດຕ້ອງມີການເຮັດວຽກງານການເມືອງ-ແນວຄິດ.
+ ວຽກງານການເມືອງ-ແນວຄິດ ເປັນສະໜາມຮົບອັນໜຶ່ງແຫ່ງການນໍາພາຂອງພັກເຮົາ, ເປັນວຽກງານທີ່ມີບົດບາດສໍາຄັນໃນການກໍ່ສ້າງພັກທາງດ້ານການເມືອງ-ແນວຄິດ ຄື: ໃນການສ້າງ ແລະ ເຮັດໃຫ້ແນວທາງນະໂຍບາຍຂອງພັກຫັນເປັນລະອຽດ ພ້ອມທັງຈັດຕັ້ງປຸກລະດົມຊີ້ນໍາມະຫາຊົນຈັດຕັ້ງປະຕິບັດໃຫ້ເປັນຈິງ; ພ້ອມກັນນັ້ນ ກໍສະຫຼຸບຖອດຖອນບົດຮຽນ ເພື່ອຮັບໃຊ້ການເຄື່ອນໄຫວໃນທຸກຂົງເຂດຊີວິດສັງຄົມ. ປະທານ ຄໍາໄຕ ສີພັນດອນ ເວົ້າວ່າ: “ວຽກງານການເມືອງ-ແນວຄິດ ຍາມໃດກໍເປັນພື້ນຖານ, ເປັນວຽກງານແຖວໜ້າ ແລະ ເປັນປັດໄຈສໍາຄັນຕົ້ນຕໍ ຮັບປະກັນໃຫ້ມີຜົນສໍາເລັດ ແລະ ໄຊຊະນະໃນການເຄື່ອນໄຫວນໍາພາໃນພາລະກິດປະຕິວັດ”.
ປະທານ ໄກສອນ ພົມວິຫານ ໄດ້ຊີ້ແຈງວ່າ: “ແຕ່ໃດມາ, ພວກເຮົາໄດ້ຖືວ່າວຽກງານການ
ເມືອງ-ແນວຄິດ ແລະ ທິດສະດີ ແມ່ນວຽກງານທີ່ມີຄວາມສໍາຄັນ, ມັນເປັນເສັ້ນໄໝແດງທີ່ສອດຫ້ອຍໄປໃນທຸກວຽກງານຂອງພັກທຸກຂັ້ນ ແລະ ທຸກເວລາ”.
(ຂໍ້ມູນຈາກ: ກົມອົບຮົມ ຄອສພ)
