ການເຝິກຊ້ອມກອບກູ້ໄພພິບັດ 3 ກອງທັບ (ກຳປູເຈຍ-ລາວ-ຫວຽດນາມ) ຈັດຂຶ້ນໃນລະຫວ່າງວັນທີ 15-26 ພະຈິກ 2024, ຢູ່ທີ່ສູນເຝິກ ສາລະວັດທະຫານ ພະນົມໂຈມ ແສນຣິກເຮຍ ແຂວງ ກຳປົງສະນັງ ຣາຊະອານາຈັກກຳປູເຈຍ, ໂດຍການເຂົ້າຮ່ວມ ຂອງ ທ່ານ ພົນເອກ ເຕຍ ໄຊຮາ ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດ ແຫ່ງຣາຊະອານາຈັກກຳປູເຈຍ,ທ່ານ ພົນເອກ ຈັນສະໝອນ ຈັນຍາລາດ ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດ ແຫ່ງ ສປປ ລາວ ແລະ ທ່ານ ພົນເອກ ຟານ ວັນ ຢາງ ລັດຖະມົນຕີກະຊວງປ້ອງກັນປະເທດແຫ່ງ ສສ ຫວຽດນາມ.
ການເຝິກຊ້ອມໄດ້ປະຕິບັດການຊອກຄົ້ນ ແລະ ກອບກູ້ຜູ້ປະສົບໄພພິບັດອາຄານຖະຫຼົ່ມ ເພື່ອຊອກຫາຜູ້ປະສົບໄພທີ່ຕົກຄ້າງຢູ່ໃນ ອາຄານ ແລະ ຍົກຍ້າຍຜູ້ປະສົບໄພ ຫຼື ຜູ້ບາດເຈັບ ໄປຫາເຂດທີ່ປອດໄພແລ້ວນໍາສົ່ງໄປປິ່ນປົວຢູ່ໂຮງໝໍແນວຫຼັງ ດ້ວຍການນໍາໃຊ້ ກຳລັງເຝິກຊ້ອມ ທັງ 3 ກອງທັບ. ເຊິ່ງຜົນສໍາເລັດຂອງການເຝິກຊ້ອມຮ່ວມ 3 ກອງທັບ ພາຍໃຕ້ຫົວຂໍ້: “ການເຝິກຊ້ອມກອບກູ້ ໄພພິບັດ ອາຄານຖະຫຼົ່ມ” ເຊິ່ງໄດ້ແບ່ງອອກເປັນສອງເນື້ອໃນຄື: ໂຮງໝໍພາກສະໜາມຂຶ້ນ 1 ແລະ ໂຮງໝໍພາກສະໜາມຂັ້ນ 2 ໄລຍະເວລາການເຝິກຊ້ອມຮ່ວມ 11 ວັນ ເລີ່ມແຕ່ວັນທີ 16-26 ພະຈິກ 2024 ມີ ກໍາລັງພົນເຂົ້າຮ່ວມທັງໝົດ 698 ຄົນ, ຝ່າຍ ກຳປູເຈຍ 563 ຄົນ, ຝ່າຍ ລາວ 64 ຄົນ, ຝ່າຍຫວຽດນາມ 71 ຄົນ.
ຜ່ານການເຝິກຊ້ອມຮ່ວມກັນເຫັນວ່າ ໄດ້ປະຕິບັດຕາມແຜນການຢ່າງສໍາເລັດຜົນ ແລະ ຮັບປະກັນຄວາມປອດໄພ ທັງຄົນ ແລະ ວັດສະດຸອຸປະກອນ ໄດ້ 100%. ນອກຈາກການເຝິກຊ້ອມຮ່ວມຕາມແຜນການ, ຍັງໄດ້ຈັດຕັ້ງການແຂ່ງຂັນກິລາການທະຫານນັກຮົບ ແຂງແຮງ, ເດີນທາງໄປຢ້ຽມຢາມອະນຸສາວະລີຊະນະ-ຊະນະ, ສະແດງສິລະປະວັດທະນະທຳພື້ນເມືອງ ຂອງກຳປູເຈຍ, ເຂົ້າຮ່ວມ ການອອກກໍາລັງກາຍ, ຊົມໂຄມໄຟ ແລະ ຟ້ອນມ່ວນຊື່ນຮ່ວມກັນ ສ້າງຄວາມສາມັກຄີມິດຕະພາບອັນໃຫຍ່ຫຼວງ ລະຫວ່າງ ສາມ ກອງທັບ, ຜ່ານການເຄື່ອນໄຫວດັ່ງກ່າວ ສະແດງໃຫ້ເຫັນຄວາມສໍາຄັນ ຂອງຄວາມສາມັກຄີ ລະຫວ່າງ ກອງທັບ ກຳປູເຈຍ-ລາວ- ຫວຽດນາມ ເຊິ່ງເປັນປະເທດບ້ານໃກ້ເຮືອນຄຽງທີ່ຊ່ວຍເຫຼືອເຊິ່ງກັນ ແລະ ກັນ ໃນທຸກສະຖານະການ, ເຄົາລົບຮັກແພງເຊິ່ງກັນ ແລະ ກັນ ຮ່ວມມືກັນຢ່າງມີຜົນສໍາເລັດ.
