ວິທະຍຸໂທລະພາບສູນກາງຈີນ CMG ໄດ້ລາຍງານວ່າ: ເນື່ອງໃນ ໂອກາດປີໃໝ່ສາກົນ 2025 ໃກ້ຈະວຽນມາເຖິງ, ທ່ານ ສີຈິ້ນຜິງ ປະທານປະເທດຈີນ ໄດ້ກ່າວຄຳອວຍພອນປີໃໝ່ ໂດຍຜ່ານວິທະຍຸ ໂທລະພາບສູນກາງຈີນ ຫລື CMG ແລະ ທາງອິນເຕີເນັດ. ທ່ານ ໄດ້ສະຫລຸບ ເຫດການທີ່ບໍ່ທຳມະດາຂອງປະເທດຈີນ ກໍຄືຂອງໂລກໃນປີ 2024 ຜ່ານມາ ພ້ອມທັງອວຍພອນໃຫ້ທຸກຄົນສົມຫວັງດັ່ງໃຈປາດຖະໜາທຸກປະການ, ມີຄວາມເບິກບານມ່ວນຊື່ນ ແລະ ຜາສຸກຕະຫລອດໄປ.
ທ່ານ ສີຈິ້ນຜິງ ໄດ້ກ່າວເຖິງປີ 2024 ທີ່ເຮັດໃຫ້ຄົນທັງຫລາຍຮູ້ສຶກໜ້າອຸ ທານ ແລະ ລືມບໍ່ລົງດ້ວຍຄຳວ່າ: “ຮ່ວມກັນກ້າວຜ່ານຟ້າຝົນລົມແຮງ ແລະ ຊື່ນຊົມພາບຟ້າຫລັງຝົນ.” ທ່ານ ໄດ້ສະຫລຸບຜົນງານທີ່ຈີນ ຍາດມາໄດ້ໃນ ໄລຍະໜຶ່ງປີຜ່ານມາດ້ວຍ 3 ຕົວເລກຄື: ໜຶ່ງ, ລວມຍອດຜະລິດຕະພັນ ພາຍໃນ ຫລື GDP ຄາດວ່າຈະບັນລຸຫລາຍກວ່າ 130.000 ຕື້ຢວນ, ສະແດງ ໃຫ້ເຫັນເຖິງເສດຖະກິດຈີນ ໄດ້ຟື້ນຟູດີຂຶ້ນ; ສອງ, ຜົນຜະລິດພືດພັນ ທັນຍາຫານໄດ້ລື່ນກາຍ 700 ລ້ານໂຕນ, ສະບຽງອາຫານຂອງຈີນ ສາມາດ ກຸ້ມຕົນເອງໄດ້; ສາມ, ປະລິມານການຜະລິດລົດພະລັງງານໃໝ່ ໄດ້ລື່ນກາຍ 10.000.000 ຄັນຕໍ່ປີເປັນຄັ້ງທຳອິດ, ອຸດສາຫະກຳໃໝ່, ຮູບແບບ ອຸດສາຫະກຳໃໝ່ ແລະ ຮູບແບບທຸລະກິດໃໝ່ໄດ້ປາກົດອອກຢ່າງບໍ່ຢຸດຢັ້ງ.
ທ່ານ ສີຈິ້ນຜິງ ໄດ້ຍົກໃຫ້ເຫັນການເຄື່ອນໄຫວຢ້ຽມຢາມຂອງຕົນຢູ່ ທ້ອງຖິ່ນຕ່າງໆພາຍໃນປະເທດໃນໜຶ່ງປີຜ່ານມາ, ເມື່ອໄດ້ພົບເຫັນຊີວິດ ການເປັນຢູ່ຂອງປະຊາຊົນທັງຫລາຍມີຊີວິດຊີວາ ແລະ ມີຫລາກຮູບ ຫລາຍສີ, ປະຊາຊົນມີຄວາມຮູ້ສຶກໄດ້ຮັບຜົນປະໂຫຍດເພີ່ມຫລາຍຂຶ້ນຕື່ມ, ທ່ານ ຮູ້ສຶກດີໃຈຫລາຍ. ທ່ານ ກ່າວວ່າ: ບໍ່ວ່າວຽກບ້ານການເຮືອນ, ວຽກລວມຂອງປະເທດຊາດກໍຄືວຽກງານຂອງໂລກ, ການເຮັດໃຫ້ປະຊາຊົນ ມີຊີວິດການເປັນຢູ່ທີ່ມີຄວາມສຸກແມ່ນເປັນສິ່ງສຳຄັນທີ່ສຸດ.
ກ່ຽວກັບສະພາບການສາກົນ, ທ່ານ ສີຈິ້ນຜິງ ຊີ້ໃຫ້ເຫັນວ່າ: ໂລກປັດຈຸບັນ ມີຄວາມປັ່ນປ່ວນ ແລະ ຜັນແປໄປຢ່າງສັບສົນ, ປະເທດຈີນ ໃນຖານະເປັນ ປະເທດໃຫຍ່ທີ່ມີຄວາມຮັບຜິດຊອບ, ໄດ້ຕັ້ງໜ້າຊຸກຍູ້ການປະຕິຮູບການ ບໍລິຫານໂລກ, ລົງເລິກຄວາມສາມັກຄີ ແລະ ການຮ່ວມມືຂອງບັນດາ ປະເທດເຂດໂລກໃຕ້. ຊຸກຍູ້ການຮ່ວມກັນສ້າງ “ໜຶ່ງແລວໜຶ່ງເສັ້ນທາງ” ທີ່ມີຄຸນນະພາບສູງໃຫ້ໄດ້ຮັບການເສີມຂະຫຍາຍລົງສູ່ລວງເລິກຢ່າງເປັນຮູບປະທຳ; ໄດ້ຈັດກອງປະຊຸມສຸດຍອດເວທີປຶກສາຫາລືການຮ່ວມມື ຈີນ-ອາຟຣິກາ ຢູ່ປັກກິ່ງ ຢ່າງສຳເລັດຜົນ, ສະເໜີຈຸດຢືນຂອງຈີນ ຢ່າງຊັດ ເຈນຢູ່ໃນໂອກາດກອງປະຊຸມຂອບສອງຝ່າຍ ແລະ ຫລາຍຝ່າຍຕ່າງໆ, ໄດ້ເພີ່ມພະລັງທີ່ສ້າງສັນຫລາຍກວ່າເກົ່າໃຫ້ແກ່ການຮັກສາສັນຕິພາບ ແລະ ສະຖຽນລະພາບຂອງໂລກ.
ເມື່ອເບິ່ງປີ 2025, ທ່ານ ສີຈິ້ນຜິງ ເຕັມໄປດ້ວຍຄວາມໝັ້ນໃຈ. ທ່ານ ກ່າວວ່າ: ປີ 2025, ຈີນ ຈະສຳເລັດໜ້າທີ່ຕາມແຜນພັດທະນາເສດຖະກິດ ສັງຄົມແຫ່ງຊາດ 5 ປີ ຄັ້ງທີ 14 ຢ່າງຮອບດ້ານ, ຄວາມທັນສະໄໝແບບຈີນ ຍ່ອມຈະສາມາດສ້າງອະນາຄົດທີ່ກວ້າງຂວາງກວ່າເກົ່າໃນຂະບວນການປະຕິຮູບ ແລະ ເປີດປະຕູສູ່ພາຍນອກ. ຈີນ ຈະຍົກລະດັບການສ້າງສາ ແລະ ຄຸ້ມຄອງສັງຄົມໃຫ້ສູງຂຶ້ນຢ່າງບໍ່ຢຸດຢັ້ງ, ແກ້ໄຂບັນຫານ້ອຍໃຫຍ່ຕ່າງໆ ທີ່ກ່ຽວຂ້ອງກັບປະຊາຊົນໃຫ້ດີ, ເຮັດໃຫ້ປະຊາຊົນທັງຫລາຍມີຮອຍຍີ້ມ ຫລາຍຂຶ້ນ ແລະ ມີຄວາມຮູ້ສຶກອົບອຸ່ນໃຈຫລາຍກວ່າເກົ່າ.
ທ່ານ ສີຈິ້ນຜິງ ຊີ້ໃຫ້ເຫັນວ່າ: ສະພາບການປ່ຽນແປງໃຫຍ່ໃນຮອບຮ້ອຍ ປີຜ່ານມາ ໄດ້ຜັນແປເລັ່ງໄລຂຶ້ນ, ສະນັ້ນຈຶ່ງຕ້ອງການແກ້ໄຂຄວາມຂັດແຍ້ງ ດ້ວຍຈິດໃຈອັນກວ້າງຂວາງ ແລະ ມີຄວາມຫ່ວງໃຍນຳຊາຕາກຳຂອງມວນ ມະນຸດດ້ວຍຄວາມໂອບເອື້ອອາລີ. ຈີນ ຍິນດີຮ່ວມກັບປະເທດຕ່າງໆໃນການ ເປັນຜູ້ປະຕິບັດຕົວຈິງແຫ່ງການເສີມຂະຫຍາຍການຮ່ວມມືຢ່າງມີໄມຕີຈິດມິດຕະພາບ, ເປັນຜູ້ຊຸກຍູ້ການຖອດຖອນບົດຮຽນເຊິ່ງກັນ ແລະ ກັນດ້ານ ອະລິຍະທຳ ແລະ ເປັນຜູ້ມີສ່ວນຮ່ວມໃນການສ້າງປະຊາຄົມຮ່ວມຊາຕາກຳ ຂອງມວນມະນຸດເພື່ອຮ່ວມກັນສ້າງອະນາຄົດທີ່ດີງາມຂອງໂລກ.
