ສະຫາຍ ທອງລຸນ ສີສຸລິດ ເລຂາທິການໃຫຍ່ ປະທານປະເທດ ແຫ່ງ ສປປ ລາວ ໄດ້ອ່ານສານອວຍພອນ ເນື່ອງໃນໂອກາດສົ່ງທ້າຍປີເກົ່າ ຄສ 2024, ຕ້ອນຮັບປີໃໝ່ສາກົນ ຄສ 2025 ເຊິ່ງມີເນື້ອໃນດັ່ງນີ້:
ພີ່ນ້ອງຮ່ວມຊາດ, ເພື່ອນມິດສະຫາຍ ທີ່ຢູ່ໃກ້ ແລະ ໄກ ທີ່ນັບຖື ຮັກແພງ ທັງຫລາຍ,
ເນື່ອງໃນໂອກາດສົ່ງທ້າຍປີເກົ່າ ຄສ 2024 ແລະ ຕ້ອນຮັບປີໃໝ່ ຄສ 2025 ນີ້, ຂ້າພະເຈົ້າ ຂໍຕາງໜ້າໃຫ້ການນໍາ ຂອງພັກ ແລະ ລັດ ແລະ ໃນນາມສ່ວນຕົວ ຂໍສົ່ງຄຳອວຍພອນອັນປະເສີດມາຍັງ ພະນັກງານ, ລັດຖະ ກອນ, ນາຍ ແລະ ພົນທະຫານ, ນາຍ ແລະ ພົນຕຳຫລວດ ທີ່ກຳລັງປະຕິບັດໜ້າທີ່ ແລະ ບັນດາສະຫາຍອ້າຍເອື້ອຍນ້ອງ ທີ່ກຳລັງພັກຜ່ອນຮັບບຳນານທຸກຖ້ວນໜ້າ, ປວງຊົນລາວທຸກເພດໄວ ແລະ ຊັ້ນຄົນຕ່າງໆ ໃນທົ່ວປະເທດ, ລວມທັງຊາວລາວ ທີ່ກຳລັງດຳລົງຊີວິດຢູ່ຕ່າງປະເທດທຸກຖ້ວນໜ້າ. ຄຳອວຍພອນອັນປະເສີດນີ້, ຂໍສົ່ງເຖິງເພື່ອນມິດຊາວຕ່າງປະເທດ ທີ່ກຳລັງດຳລົງຊີວິດ ແລະ ປະຕິບັດວຽກງານ ຢູ່ ສປປ ລາວ, ພ້ອມກັນນີ້ ຂໍສົ່ງພອນອັນປະເສີດ ໄປເຖິງບັນດາການນຳ ແລະ ປະຊາຊົນຂອງບັນດາປະເທດເພື່ອນມິດທຸກຖ້ວນໜ້າ ມານະໂອກາດນີ້ດ້ວຍ.
ພໍ່ແມ່ພີ່ນ້ອງ, ເພື່ອນມິດສະຫາຍ ທີ່ຮັກແພງ ທັງຫລາຍ,
ໃນປີ 2024 ທີ່ໄດ້ຜ່ານພົ້ນໄປນີ້, ຍັງເປັນອີກປີໜຶ່ງສຳລັບປະເທດ ແລະ ປະຊາຊົນເຮົາ ທີ່ໄດ້ຜະເຊີນກັບອຸປະສັກນາໆປະການ, ແຕ່ຍ້ອນຄວາມສາມັກຄີເປັນປຶກແຜ່ນຂອງທົ່ວພັກ, ທົ່ວປວງຊົນເຮົາ, ພວກເຮົາສາມາດຜ່ານຜ່າຄວາມຫຍຸ້ງຍາກຕ່າງໆມາໄດ້, ສະແດງອອກໃນການຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ແລະ ແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ IX ໄດ້ຮັບຜົນສຳເລັດໃນບາດກ້າວສຳຄັນ. ປະເທດເຮົາ ສາມາດຮັກສາໄດ້ສະຖຽນລະພາບທາງການເມືອງ, ສັງຄົມມີຄວາມສະຫງົບປອດໄພ, ການແກ້ໄຂບັນຫາເສດຖະກິດ ໄດ້ມີບາດກ້າວດີຂຶ້ນເປັນລຳດັບ ເຊິ່ງໄດ້ເປັນການສ້າງກຳລັງແຮງສຳຄັນໃຫ້ແກ່ການກ້າວຂຶ້ນໃນປີຕໍ່ໆໄປ. ການເຄື່ອນ ໄຫວຕ່າງປະເທດ ໄດ້ມີຜົນສຳເລັດທີ່ພົ້ນເດັ່ນ, ພິເສດຄື ການເປັນປະທານໝູນວຽນ ອາຊຽນ 2024 ຂອງ ສປປ ລາວ ທີ່ຈະໝົດວາລະ ນັບແຕ່ມື້ນີ້ເປັນຕົ້ນໄປນັ້ນ ໄດ້ມີຜົນສຳເລັດອັນຈົບງາມ ເປັນທີ່ພາກພູມໃຈຂອງປະຊາຊົນເຮົາ ແລະ ໄດ້ຮັບການຊົມເຊີຍຈາກເພື່ອນມິດສາກົນ. ບັນດາຜົນສຳເລັດເຫລົ່ານັ້ນ ບໍ່ພຽງແຕ່ເປັນຄວາມເອກອ້າງທະນົງໃຈ, ແຕ່ຍັງເປັນສິ່ງປຸກລະດົມກໍາລັງໃຈອັນແຮງກ້າໃຫ້ພວກເຮົາ ສືບຕໍ່ກ້າວຂຶ້ນຢ່າງໜັກແໜ້ນ ບົນເສັ້ນທາງແຫ່ງການປົກປັກຮັກສາ ແລະ ພັດທະນາປະເທດຊາດອັນແສນຮັກ ຂອງ ພວກເຮົາອີກດ້ວຍ.
ຂ້າພະເຈົ້າ ຂໍສະແດງຄວາມຂອບໃຈຢ່າງຈິງໃຈ ແລະ ຂໍສະແດງຄວາມຍ້ອງຍໍຊົມເຊີຍຢ່າງສຸດອົກສຸດໃຈ ຕໍ່ການປະກອບສ່ວນຂອງປະຊາຊົນລາວທຸກທົ່ວໜ້າ ແລະ ການຮ່ວມມື, ການຊ່ວຍເຫລືອຢ່າງມີປະສິດທິຜົນຈາກເພື່ອນມິດສາກົນ ທີ່ໄດ້ປະກອບສ່ວນອັນສໍາຄັນ ເຂົ້າໃນຜົນສຳເລັດດັ່ງກ່າວມານັ້ນ.
ພີ່ນ້ອງຮ່ວມຊາດ, ບັນດາເພື່ອນມິດ ທີ່ ຮັກແພງທັງຫລາຍ,
ປີ 2025 ທີ່ຈະມາເຖິງນີ້, ເປັນປີທີ່ມີຄວາມໝາຍສໍາຄັນ ສໍາລັບ ສປປ ລາວ ເພາະເປັນປີມ້ວນທ້າຍການ ຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງພັກ ແລະ ແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ IX, ພ້ອມກັນນັ້ນ ກໍເປັນປີສະເຫລີມສະຫລອງບັນດາວັນສຳຄັນຂອງພັກ ແລະ ຂອງຊາດ, ຂ້າພະເຈົ້າ ຂໍຖືໂອກາດນີ້ ຮຽກຮ້ອງມາຍັງທົ່ວພັກ, ທົ່ວລັດ, ທົ່ວກຳລັງປະກອບອາວຸດ ແລະ ທົ່ວປວງຊົນລາວທັງຊາດ ຈົ່ງສືບຕໍ່ເສີມຂະຫຍາຍມູນເຊື້ອຮັກຊາດ, ມູນເຊື້ອແຫ່ງຄວາມສາມັກຄີເປັນຈິດໜຶ່ງໃຈດຽວ, ສຸມທຸກກໍາລັງແຮງ ແລະ ສະຕິປັນຍາ ເຂົ້າໃນການສ້າງການຫັນປ່ຽນໃໝ່ ບົນຈິດໃຈການສ້າງມານະຈິດ ແຫ່ງຄວາມເປັນເຈົ້າປະເທດຊາດ, ຍູ້ແຮງແນວທາງນະໂຍບາຍສ້າງເສດຖະກິດເອກະລາດ ເປັນເຈົ້າຕົນເອງ ຢ່າງແຂງແຮງ, ພ້ອມກັນພັດທະນາປະເທດຊາດອັນແສນຮັກ ຂອງພວກເຮົາ ໃຫ້ມີຄວາມເຂັ້ມແຂງ ໝັ້ນທ່ຽງ ແລະ ຈະເລີນຮຸ່ງເຮືອງຍິ່ງໆຂຶ້ນ.
ໃນໂອກາດປີໃໝ່ອັນເປັນສິລິມຸງຄຸນນີ້, ຂໍອວຍພອນໃຫ້ ພໍ່ແມ່ພີ່ນ້ອງ ແລະ ເພື່ອນມິດສະຫາຍ ທັງຫລາຍ ຈົ່ງມີສຸຂະພາບເຂັ້ມແຂງ, ມີຄວາມຜາສຸກ ແລະ ປະສົບຜົນສໍາເລັດໃນໜ້າທີ່ວຽກງານທຸກປະການ.
ຂໍອວຍພອນໃຫ້ປະຊາຊົນໃນທົ່ວໂລກ ຈົ່ງໄດ້ດຳລົງຊີວິດຢູ່ຮ່ວມກັນຢ່າງມີຄວາມສຸກ-ສັນຕິ ຕະຫລອດປີໃໝ່ ແລະ ຕະຫລອດໄປດ້ວຍເທີ້ນ.
