ໃນຕອນຄ່ຳວັນທີ 31 ທັນວາ 2024 ນີ້, ນະຄອນຫລວງວຽງຈັນ (ນວ) ໄດ້ຈັດງານສະເຫລີມສະຫລອງສົ່ງທ້າຍປີເກົ່າ 2024 ຕ້ອນຮັບປີໃໝ່ 2025 ຢູ່ສວນປະຕູໄຊ ນວ ໃຫ້ກຽດເຂົ້າຮ່ວມມີ ທ່ານ ອາດສະພັງທອງ ສີພັນດອນ ເຈົ້າຄອງນະຄອນຫລວງວຽງຈັນ, ບັນດາລັດຖະມົນຕີ, ຮອງລັດຖະມົນຕີ ພ້ອມດ້ວຍ ມວນຊົນ ທັງພາຍໃນ ແລະ ຕ່າງປະເທດ ເຂົ້າຮ່ວມ ຢ່າງຄຶກຄື້ນ.
ການສະເຫລີມສະຫລອງສົ່ງທ້າຍປີເກົ່າ ຕ້ອນຮັບປີໃໝ່ ໃນຄັ້ງນີ້, ຈັດຂຶ້ນ ຢ່າງຄຶກຄື້ນ ມ່ວນຊີື່ນ ຮັກສາໄດ້ວັດທະນະທຳ, ຮີດຄອງປະເພນີ ແລະ ຄວາມສະຫງົບປອດໄພ ເຊິ່ງພາຍໃນງານ ໄດ້ຈັັດໃຫ້ມີຫລາກຫລາຍກິດຈະກຳ ເປັນຕົ້ນ ສະແດງສິລະປະ, ຊົມການສະແດງເສບດົນຕີພື້ນເມືອງ ປະສົມພື້ນບ້ານ, ຮ້ອງເພງ ລາວ-ສາກົນ, ກິດຈະກຳຟ້ອນລຳວົງລາວ ທີ່ໄດ້ຮັບຮອງເປັນມໍລະດົກທາງດ້ານວັດທະນະທຳ ໃນຈັ່ງຫວະຕ່າງໆ, ພ້ອມທັງຈົກສະຫລາກມອບລາງວັນ ໃຫ້ມວນຊົນ ຜູ້ທີ່ລົງທະບຽນໃນການເຂົ້າມາຮ່ວມ ກ່ອນຈະມີການນັບຖ້ອຍຫລັງເພື່ອກ້າວເຂົ້າສູ່ປີໃໝ່ 2025 ແລະ ໄດ້ຮັບຊົມວິດີໂອອວຍພອນປີໃໝ່ຂອງທ່ານ ທອງລຸນ ສີສຸລິດ ເລຂາທິການໃຫຍ່ ປະທານປະເທດ ແຫ່ງ ສປປ ລາວ ເນື່ອງໃນໂອກາດສົ່ງທ້າຍປີເກົ່າ ຄສ 2024 ຕ້ອນຮັບປີໃໝ່ສາກົົນ ຄສ 2025.
ຈຸດເດັ່ນຂອງງານໃນຄັ້ງນີ້, ໄດ້ມີການນັບຖອຍຫລັງຮ່ວມກັນ ເພື່ອກ້າວເຂົ້າສູ່ປີໃໝ່ 2025 ແລະ ຊົມການສະແດງຮູບພາບຕ່າງໆ ໂດຍການບິນໂດຣນ ແລະ ຈຸດພຸດອກໄມ້ໄຟ.
ນອກນີ້, ພາຍໃນງານ ຍັງມີການຈັດງານຂາຍອາຫານ, ເຄື່ອງດື່ມ ແລະ ຕົບແຕ່ງສະຖານທີ່ຮ້ານອາຫານ, ບ່ອນນັ່ງຊົມວິວ, ມູມຖ່າຍຮູບ, ບ່ອນນັ່ງຮັບປະທານອາຫານ, ມີການວາງສະແດງ ແລະ ຂາຍສິນຄ້າ ໂອດັອບ, ເຄື່ອງທີ່ລະນຶກຈຳນວນໜຶ່ງ ແລະ ມີເວທີເປີດເພງ ລາວ-ສາກົນ ເພື່ອສ້າງບັນຍາກາດ ໃຫ້ນັກທ່ອງທ່ຽວ ໄດ້ເຂົ້າມາຊົມ, ມາຊື້, ມາຊິມ ແລະ ສຳຜັດ ກັບບັນຍາກາດປະຕູໄຊ ໃນຍາມກາງເວັນ ແລະ ກາງຄືນ.
