ໃນວັນທີ 27 ທັນວາ 2024 ຜ່ານມາ, ທ່ານ ພັອ ຄໍາສອນ ສີດາວົງ ຫົວໜ້າກົມຕຳຫລວດຈະລາ ຈອນ ໄດ້ຖະແຫລງການກຽມຄວາມພ້ອມວຽກງານປ້ອງກັນ, ສະກັດກັ້ນອຸບັດເຫດຈະລາຈອນທາງບົກ ໄລຍະການສະເຫລີມ ສະຫລອງສົ່ງທ້າຍປີເກົ່າ 2024 ແລະ ຕ້ອນຮັບປີໃໝ່ສາກົນ ປະຈຳປີ 2025 ວ່າ: ເພື່ອສະກັດກັ້ນການລະເມີດລະບຽບການ, ດຳລັດວ່າດ້ວຍກົດຈະລາຈອນທາງບົກ ແລະ ອື່ນໆ, ເພື່ອຫລຸດຜ່ອນ ການເກີດອຸບັດເຫດ ກົມຕຳຫລວດຈະລາຈອນ ໄດ້ອອກຄໍາແນະນໍາ ເຖິງພະແນກຕຳຫລວດຈະລາອຈນ ປກສ ແຂວງ, ນະຄອນຫລວງ ແລະ ເຂດເສດຖະກິດພິເສດສາມຫລ່ຽມຄໍາ ໃຫ້ເອົາໃຈໃສ່ຊີ້ນໍາກໍາລັງຂອງຕົນ ປະຕິບັດໜ້າທີ່ ອໍານວຍຄວາມສະດວກໃຫ້ຜູ້ໃຊ້ລົດໃຊ້ຖະໜົນ ແລະ ການກວດກາ ບັງຄັບໃຊ້ກົດໝາຍຕໍ່ຜູ້ທີ່ລະເມີດກົດຈະລາຈອນ ເພື່ອ ເປັນການປ້ອງກັນສະກັດກັ້ນບໍ່ໃຫ້ການເກີດອຸບປະຕິເຫດ ໃນໄລຍະການສົ່ງທ້າຍປີເກົ່າ 2024 ແລະ ຕ້ອນຮັບປີໝ່ ປີ 2025 ຢ່າງເຂັ້ມງວດ.
ກົມຕຳຫລວດຈະລາຈອນ ໄດ້ອອກແຈ້ງການເຖິງ ພໍ່ແມ່ປະຊາຊົນ, ພະນັກງານ, ທະຫານ, ຕຳຫລວດ ແລະ ຜູ້ໃຊ້ລົດ-ໃຊ້ຖະໜົນ ທີ່ສັນຈອນໄປມາ ໃຫ້ເຄົາລົບກົດຈະລາຈອນ ແລະ ໃຫ້ຄວາມຮ່ວມມືຕໍ່ການປະຕິບັດໜ້າທີ່ຂອງເຈົ້າໜ້າທີ່ ໂດຍຜູ້ຂັບຂີ່ລົດຕ້ອງກຽມຄວາມພ້ອມ ດ້ານສຸຂະພາບຮ່າງກາຍ, ເອກະສານຂອງຜູ້ຂັບຂີ່ ແລະ ພາຫະນະ ໃຫ້ຄົບຊຸດ ຕາມລະບຽບການ ເຊັ່ນ: ໃບຂັບຂີ່, ໃບທະບຽນ, ໃບກວດກາເຕັກນິກ, ໃບຢັ້ງຢືນເສຍຄ່າຄໍານຽມທາງ, ປະກັນໄພ ແລະ ໃບອະນຸຍາດດໍາເນີນທຸລະກິດ ສໍາລັບລົດຂົນສົ່ງສິນຄ້າ ແລະ ລົດໂດຍສານ; ຜູ້ຂັບຂີ່ລົດຈັກ ຕ້ອງໃສ່ໝວກກັນກະທົບ ທັງຜູ້ຂັບ ແລະ ຜູ້ຊ້ອນທ້າຍ ເພື່ອຄວາມປອດໄພຂອງທ່ານ, ຜູ້ຂັບຂີ່ລົດໃຫຍ່ ຕ້ອງຮັດສາຍແອວນິລະໄພ ເພື່ອຮັບປະກັນຄວາມປອດໄພໃຫ້ແກ່ຜູ້ຂັບຂີ່ ແລະ ຜູ້ໂດຍສານ; ກ່ອນຈະນໍາໃຊ້ພາຫະ ນະຕ້ອງກວດສະພາບເຕັກນິກ ແລະ ຄວາມພ້ອມຂອງພາຫະນະໃຫ້ມີຄວາມຮັບປະກັນ ເປັນຢ່າງດີ, ລົດຂົນສົ່ງໂດຍສານທາງໄກຕ້ອງມີໂຊເຟີສຳຮອງທຸກຄັ້ງໃນເວລາເດີນທາງ. ສະເພາະເສັ້ນທາງດ່ວນ, ການໃຊ້ຄວາມໄວສູງສຸດບໍ່ໃຫ້ເກີນ 120 km/ ຊົ່ວໂມງ ແລະ ຄວາມໄວຕໍ່າສຸດບໍ່ໃຫ້ຫລຸດ 80 km/ຊົ່ວໂມງ, ຜູ້ຂັບຂີ່ພາຫະນະຕ້ອງເຄົາລົບ ແລະ ປະຕິບັດຕາມກົດລະບຽບຈະລາຈອນ ຢ່າງເຂັ້ມງວດ, ກໍລະນີລະເມີດ ທາງເຈົ້າໜ້າທີ່ຈະນໍາໃຊ້ມາດຕະການສຶກສາອົບຮົມ, ລະເມີດຫລາຍມາດຕາແມ່ນຈະຂຽນໃບສັ່ງກັກເອກະສານທີ່ ກ່ຽວຂ້ອງໄວ້ (ຖ້າຫາກລະເມີດຮ້າຍແຮງມີຄວາມສ່ຽງທີ່ຈະພາໃຫ້ເກີດອຸບັດເຫດ ເຈົ້າໜ້າທີ່ຈະໄດ້ກັກ ພາຫະນະໄວ້ຊົ່ວຄາວ). ພ້ອມນີ້, ກໍໄດ້ມີຂໍ້ຫ້າມສໍາລັບຜູ້ຂັບຂີ່ພາຫະນະຄື: ຫ້າມຜູ້ຂັບຂີ່ພາຫະນະ ນໍາໃຊ້ໂທລະສັບ ໃນເວລາຂັບຂີ່ ຢ່າງເດັດຂາດ, ຫ້າມຜູ້ຂັບຂີ່ດື່ມສິ່ງມຶນເມົາ(ເມົາຫ້າມຂັບຂີ່ລົດ) ຢ່າງເດັດຂາດ ຖ້າຫາກກວດກາພົບເຫັນ ເຈົ້າໜ້າທີ່ຕຳຫລວດ ຈະລາຈອນຈະໄດ້ກັກໄວ້, ສວາງເມົາແລ້ວຈຶ່ງອະນຸຍາດໃຫ້ໄປ ຫລື ໃຫ້ຍາດພີ່ນ້ອງ-ໝູ່ຄູ່ມາຮັບເອົາ ເພື່ອຮັບປະກັນ ຄວາມປອດໄພ, ຫ້າມຂັບຂີ່ລົດໄວເກີນກົດໝາຍກຳນົດ (ສໍາລັບລົດຂົນສົ່ງໂດຍສານ ຫ້າມແລ່ນໄວເກີນ 80 Km/h ຕາມເສັ້ນທາງຫລວງ ສະເພາະຢູ່ເຂດນອກເມືອງ), ຫ້າມຜູ້ຂັບຂີ່ດັດແປງສະພາບເຕັກນິກຍານພາຫະນະ ໂດຍການຕິດຕັ້ງອຸປະກອນປະ ເພດໄຟສະປອດໄລ້ທີ່ມີ ຄວາມສະຫວ່າງສູງ (ສົ່ງຜົນກະທົບຕໍ່ຜູ້ຂັບຂີ່ທີ່ສັນຈອນຕາມເສັ້ນທາງໃນຍາມກາງຄືນ), ຫ້າມຂັບຂີ່ພາຫະນະ ເປັນພຶງເປັນແພ, ຊ່ວງຊີງກັນຕາມເສັ້ນທາງ ຢ່າງເດັດຂາດ, ຫ້າມນໍາໃຊ້ລົດກະບະບັນທຸກຄົນໂດຍສານໃສ່ກະບະຢ່າງເດັດຂາດ, ຫ້າມນໍາໃຊ້ລົດຂົນສົ່ງໂດຍສານ ບັນທຸກສິນຄ້າ ແລະ ບັນທຸກຜູ້ໂດຍສານເກີນກຳນົດ ແລະ ຊ່ວງຊີງເອົາ ຜູ້ໂດຍສານຢ່າງເດັດຂາດ, ຫ້າມຜູ້ປົກຄອງປະປ່ອຍໃຫ້ເດັກນ້ອຍ ທີ່ອາຍຸບໍ່ເຖິງກະສຽນ ຂັບຂີ່ພາຫະນະຢ່າງເດັດຂາດ, ຫ້າມຈອດລົດຕາມເສັ້ນທາງດ່ວນຢ່າງເດັດຂາດ (ຍົກເວັ້ນກໍລະນີພາຫະນະເປ່ເພ), ພ້ອມນີ້, ເຈົ້າໜ້າທີ່ຈະໄດ້ເພີ່ມມາດຕະການກວດກາ ຖ້າບຸກຄົນໃດລະເມີດ ຈະຖືກສຶກສາອົບຮົມ ແລະ ປັບໃໝຕາມ ລະບຽບກົດໝາຍຢ່າງເຂັ້ມງວດ, ສ່ວນການສະເຫລີມສະຫລອງປີໃໝ່ ແມ່ນໃຫ້ຈັດຕັ້ງປະຕິບັດຕາມແຈ້ງການ ຂອງອໍານາດການປົກຄອງທ້ອງຖິ່ນ ຂອງຕົນໄດ້ກຳນົດໄວ້. ຖ້າບຸກຄົນໃດທີ່ລະເມີດຕໍ່ດໍາລັດວ່າດ້ວຍກົດຈະລາຈອນທາງບົກ ຈະຖືກສຶກສາອົບຮົມ ແລະ ປັບໃໝຕາມລະບຽບ ກົດໝາຍ ຢ່າງເຂັ້ມງວດ.
ທ່ານ ພັອ ຄໍາສອນ ສີດາວົງ ຍັງໃຫ້ຮູ້ຕື່ມວ່າ: ເພື່ອເຮັດໃຫ້ການສະເຫລີມສະຫລອງ ສົ່ງທ້າຍປີເກົ່າ-ຕ້ອນຮັບປີໃໝ່ ສາກົນ 2025 ໃຫ້ມີຄວາມເບີກບານມ່ວນຊື່ນ ແລະ ປະສະຈາກໄດ້ ຜົນເສຍຫາຍທາງດ້ານ ຊີວິດ, ສຸຂະພາບ ແລະ ຊັບສິນ ທີ່ເກີດຈາກອຸບັດເຫດຈະລາຈອນ ທາງບົກ ຂໍຮຽກຮ້ອງມາຍັງພໍ່ແມ່ປະຊາຊົນ, ພົນລະເມືອງ, ຜູ້ປົກຄອງ, ອໍານາດການປົກຄອງບ້ານ, ພະນັກງານ, ທະຫານ, ຕຳຫລວດ ແລະ ຜູ້ໃຊ້ລົດ-ໃຊ້ຖະໜົນ ທີ່ສັນຈອນໄປມາ ໃຫ້ເປັນເຈົ້າການໃນການສຶກສາອົບຮົມ, ແນະນໍາລູກຫລານ ແລະ ພະນັກງານທີ່ຢູ່ໃນ ຄວາມຮັບຜິດຊອບ ໃຫ້ເປັນເຈົ້າການປ້ອງກັນຕົນເອງ ເພື່ອປະສາຈາກການເກີດອຸບັດເຫດ.
