ຄາເຟອີນ (Caffeine) ແມ່ນສານທີ່ຮ່າງກາຍດູດຊຶມຈາກລະບົບຍ່ອຍອາຫານເຂົ້າສູ່ກະແສເລືອດ ເຊິ່ງມີຜົນຕໍ່ລະບົບຫົວໃຈ ແລະ ການໄຫຼວຽນຂອງເລືອດ.
ຄາເຟອີນມີຢູ່ໃນເຄື່ອງດື່ມຫຼາຍຊະນິດ ເຊັ່ນ: ກາເຟ, ຊາ, ເຄື່ອງດື່ມຊູກຳລັງ ແລະ ນໍ້າອັດລົມ ເຊີ່ງຄາເຟອີນຈະຊ່ວຍເພີ່ມຄວາມຕື່ນຕົວ ແລະ ເພີ່ມສະມາທິ ແຕ່ການບໍລິໂພກຄາເຟອີນຫຼາຍເກີນໄປ ສາມາດເຮັດໃຫ້ເກີດຜົນກະທົບຕໍ່ສຸຂະພາບໄດ້ ດັ່ງນັ້ນ, ທ່ານຄວນລະວັງໃນການດື່ມ ເຄື່ອງດື່ມທີ່ມີຄາເຟອີນ ອາດຈະເຮັດໃຫ້ເກີດອັນຕະລາຍຖ້າໄດ້ຮັບໃນປະລິມານຫຼາຍ ແລະ ດື່ມຕິດຕໍ່ເລື້ອຍໆ.
ຂໍ້ຄວນລະວັງໃນການບໍລິໂພກຄາເຟອີນ
ການບໍລິໂພກປະລິມານທີ່ເຫມາະສົມ ສໍາລັບຜູ້ໃຫຍ່ ຄວນບໍລິໂພກຄາເຟອີນບໍ່ຄວນເກີນ 400 ມິນລີກຣາມຕໍ່ມື້ ຫຼື ປະມານ 4 ຈອກ ການບໍລິໂພກຫຼາຍເກີນໄປສາມາດເຮັດໃຫ້ເກີດຜົນຂ້າງຄຽງເຊັ່ນ: ຫົວໃຈເຕັ້ນໄວ, ອາການຫງຸດຫງິດ, ນອນບໍ່ຫລັບ ແລະ ປວດຮາກ.
ເດັກນ້ອຍ ແລະ ໄວລຸ້ນ ຄວນບໍລິໂພກຄາເຟອີນບໍ່ເກີນ 100 ມິນລີກຣາມຕໍ່ມື້ ຫຼືປະມານ 1 ຈອກການບໍລິໂພກຄາເຟອີນຫຼາຍເກີນໄປໃນອາຍຸນີ້ອາດຈະສົ່ງຜົນກະທົບຕໍ່ການເຕີບໃຫຍ່, ການພັດທະນາແລະ ການນອນຫລັບ.
ຄວາມຄຽດ ແລະ ການວິຕົກກັງວົນ ການບໍລິໂພກຄາເຟອີນຫຼາຍເກີນໄປສາມາດເຮັດໃຫ້ເກີດຄວາມຄຽດ ແລະ ການວິຕົກກັງວົນ.
ບັນຫາການນອນຫຼັບ ຄວນຫຼີກເວັ້ນການບໍລິໂພກຄາເຟອີນກ່ອນນອນ ເນື່ອງຈາກວ່າຄາເຟອີນສາມາດລົບກວນການນອນຫຼັບໄດ້ ດັ່ງນັ້ນ ທ່ານຄວນຫຼີກລ່ຽງການດື່ມເຄື່ອງດື່ມທີ່ມີຄາເຟອີນໃນຕອນແລງ ຫຼື ຄວນດື່ມຢ່າງໜ້ອຍ 6 ຊົ່ວໂມງກ່ອນນອນ ເພື່ອປ້ອງກັນການນອນບໍ່ຫຼັບ ແລະ ຜົນກະທົບທາງສຸຂະພາບໃນໄລຍະຍາວ.
ກວດເບິ່ງສ່ວນປະກອບຂອງເຄື່ອງດື່ມ ຄວນອ່ານສະຫຼາກ ແລະ ກວດເບິ່ງປະລິມານຄາເຟອີນໃນເຄື່ອງດື່ມເປັນປະຈຳ ເຄື່ອງດື່ມບາງຊະນິດອາດມີຄາເຟອີນຫຼາຍກວ່າທີ່ຄາດໄວ້ ເຊັ່ນ: ຊາຂຽວ, ຊາດຳ ແລະ ເຄື່ອງດື່ມຊູກຳລັງ.
ຫຼີກເວັ້ນການບໍລິໂພກຄາເຟອີນກັບເຫຼົ້າ ການບໍລິໂພກຄາເຟອີນກັບເຫຼົ້າ ຈະເຮັດໃຫ້ຮູ້ສຶກຕື່ນຕົວ ແລະບໍ່ຮັບຮູ້ຜົນກະທົບຂອງເຫຼົ້າ ຊື່ງອາດຈະສາມາດນໍາໄປສູ່ການດື່ມເຫຼົ້າເກີນຂະໜາດ ແລະ ສ່ຽງອຸປະຕິເຫດ.
ຄວນລະວັງຄົນທີ່ມີບັນຫາສຸຂະພາບ ຜູ້ທີ່ມີບັນຫາສຸຂະພາບເຊັ່ນ: ພະຍາດຫົວໃຈ, ຄວາມດັນເລືອດສູງ ຫຼື ພະຍາດກະເພາະອາຫານ ຄວນປຶກສາຫາລືກັບທ່ານຫມໍກ່ອນທີ່ຈະບໍລິໂພກເຄື່ອງດື່ມທີ່ມີຄາເຟອີນ ຍ້ອນວ່າຄາເຟອີນອາດຈະເຮັດໃຫ້ສຸຂະພາບມີອາການຮ້າຍແຮງຂຶ້ນ.
ຫຼີກເວັ້ນການບໍລິໂພກຄາເຟອີນໃນລະຫວ່າງການຖືພາ ແມ່ຍິງຖືພາຄວນຈໍາກັດການໄດ້ດື່ມຄາເຟອີນ ຄວນດື່ມບໍ່ໃຫ້ເກີນ 200 ມິນລີກຣາມຕໍ່ມື້ ການບໍລິໂພກຄາເຟອີນຫຼາຍເກີນໄປອາດຈະສ່ຽງຕໍ່ການຫຼຸລູກ ຫຼື ບັນຫາສຸຂະພາບຂອງເດັກ.
ຄວນບໍລິໂພກຄາເຟອີນຄວນຈະຢູ່ໃນປະລິມານທີ່ເໝາະສົມ ແລະ ສອດຄ່ອງກັບສະພາບຮ່າງກາຍຂອງຕົນເອງ ເພື່ອໃຫ້ປະໂຫຍດສູງສຸດ ແລະ ຫຼຸດຜ່ອນຄວາມສ່ຽງຕໍ່ຜົນກະທົບທາງລົບ.
