ວິທະຍຸກະຈາຍສຽງຫວຽດນາມ, ສ.ອາເມລິກາ ແມ່ນໜຶ່ງໃນບັນດາຄູ່ຮ່ວມມືການຄ້າໃຫຍ່ສຸດ ຂອງ ສສ ຫວຽດນາມ. ຮອດທ້າຍເດືອນພະຈິກ 2024, ວົງເງິນການຄ້າ ລະຫວ່າງ ສສ ຫວຽດນາມ ແລະ ສ. ອາເມລິກາ ບັນລຸ 135 ຕື້ໂດລາສະຫະລັດ ໃນນັ້ນວົງເງິນສົ່ງອອກຂອງ ສສ ຫວຽດນາມ ບັນລຸ 123 ຕື້ໂດລາສະຫະລັດ, ເພິ້ມຂຶ້ນ 23%; ການນຳເຂົ້າຈາກ ສ.ອາເມລິກາ ບັນລຸ 12 ຕື້ໂດລາສະຫະລັດ, ເພີ່ມຂຶ້ນ 15%. ບັນດາຜະລິດຕະພັນສົ່ງອອກຫລັກແຫລ່ງຂອງ ສສ ຫວຽດນາມ ໄປຍັງ ສ.ອາເມລິກາລວມມີ: ຜະລິດຕະພັນກະສິກຳ, ເຄື່ອງຕ່ຳແຜ່ນ ຕັດຫຍິບ, ເກີບໜັງ, ສິນທະເລ ແລະ ອາໄຫລ່ເຄື່ອງເອເລັກໂຕຣນິກ. ກ່ຽວກັບການລົງທຶນໂດຍກົງຈາກຕ່າງປະເທດ (FDI), ສ.ອາເມລິກາ ແມ່ນໜຶ່ງໃນບັນດານັກລົງທຶນໃຫຍ່ຢູ່ ສສ ຫວຽດນາມ, ດ້ວຍບັນດາໂຄງການພົ້ນເດັ່ນເຊັ່ນ: Intel (1,5 ຕື້ ໂດລາສະຫະລັດ), Amkor (1,6 ຕື້ ໂດລາສະຫະລັດ), ພ້ອມກັບ ການເປີດກວ້າງການເຄື່ອນໄຫວ ຂອງບັນດາກຸ່ມບໍລິສັດ ຄື Synopsys, Nvidia ແລະ Marvel. ໃນໄຕມາດທີ 3 ປີ 2024, ຫວຽດນາມ ດຶງດູດເງິນລົງທຶນ FDI 27,78 ຕື້ ໂດລາສະຫະລັດ, ເພີ່ມຂຶ້ນ 11,6% ເມື່ອທຽບໃສ່ປີກາຍ, ໃນນັ້ນ ສ.ອາເມລິກາ ກໍປະກອບສ່ວນບໍ່ໜ້ອຍເຂົ້າໃນການຊຸກຍູ້ການພັດທະນາເຕັກໂນໂລຊີສູງ ແລະ ການຫັນເປັນດີຈີຕອນ ຢູ່ ສສ ຫວຽດນາມ. ດ້ວຍຂະແໜງເກີບໜັງ, ສ.ອາເມລິກາ ແມ່ນຕະຫລາດຫລັກແຫລ່ງ ຂອງບັນດາວິສາຫະກິດ ຫວຽດນາມ. ອົງການການຄ້າຫວຽດນາມ ປະຈຳ ສ.ອາເມລິກາ ຖືວ່າປີ 2025 ໝັ້ນໝາຍວ່າ: ຈະເປັນປີພັດທະນາຢ່າງແຮງໃນການພົວພັນການຄ້າ ລະຫວ່າງ ສສ ຫວຽດນາມ ແລະ ສ.ອາເມລິກາ, ດ້ວຍຍອດວົງເງິນສົ່ງອອກຄາດວ່າຈະບັນລຸແຕ່ 125 ຕື້ ໂດລາສະຫະລັດ-130 ຕື້ ໂດລາສະຫະລັດ.
(ບັນນາທິການຂ່າວ: ຕ່າງປະເທດ)
ຮຽບຮຽງ ຂ່າວໂດຍ: ສະໄຫວ ລາດປາກດີ
