ຕອນເຊົ້າ ວັນທີ 25 ທັນວາ 2024, ທ່ານ ນາງ ປານີ ຢາທໍ່ຕູ້ ກຳມະການກົມການເມືອງສູນກາງພັກ, ຮອງປະທານປະເທດ, ພ້ອມດ້ວຍການນໍາຂັ້ນນໍາ ແຂວງຈຳປາສັກ ແລະ ຄະນະ ໄດ້ເຄື່ອນໄຫວຢ້ຽມຢາມ ກຸ່ມຫັດຖະກຳການສ່ຽນ,ຈັກສານ,ແລະ ເຄື່ອງທີ່ລະນຶກ,ຢູ່ທີ່ບ້ານ ທາງຄົບ ເຂດ 2 ໜອງວຽນ ເມືອງຈຳປາສັກ, ແຂວງຈໍາປາສັກ.
ທ່ານ ນາງວຽງສະໄໝ ນາມແກ່ນທ້າວ ປະທານສະຫະພັນ ແມ່ຍິງເມືອງຈຳປາສັກ ໄດ້ຕ້ອນຮັບ, ພ້ອມທັງບັນຍາຍກ່ຽວກັບຜະລິດຕະພັນໄມ້ທີ່ນຳມາແປຮູບເປັນຫັດຖະກຳ ແລະ ເຄື່ອງຈັກສານເພື່ອມານຳສະເໜີໃຫ້ຄະນະປະທານ ທີ່ໄດ້ລົງມາຢ້ຽມຊົມໃນເທື່ອນີ້ ເຊິ່ງທ່ານ ໄດ້ອະທິບາຍແນະນຳຄອບຄົວຜູ້ຜະລິດ,ໂດຍມີ ຄອບຄົວ ທ່ານ ມຸກດາວັນ ທອງສະຫວ່າງ ປະທານຫົວໜ້າສາມາຄົມໂຮງສ່ຽນ ໄມ້ແປຮູບ ເຄືອງ ທີ່ລະນຶກເມືອງຈຳປາສັກ ທີ່ໄດ້ປະກອບອາຊີບຫຼັກ,ຜະລິດ ໂຕະ,ຕັ່ງ,ໃຈກັນໃຫ່ຍ,ໃຈກັນນ້ອຍ ແລະ ອື່ນໆ ເປັນອາຊີບຫຼັກ ໂດຍມີສະມາຊິກ 12 ຄອບຄົວທີ່ໄດ້ຮ່ວມເຂົ້າເປັນກຸ່ມສາມາຄົມ,ແລະ ມີຄອບຄົວ ທ້າວ ສົມພອນ ສີລີສັກ ,ຄອບຄົວນາງ ປານິນ ດວງສີ ແລະ ອີກຫຼາຍຄອບຄົວທີ່ໄດ້ເຂົ້າຮ່ວມ.ນອກຈາກນີ້ແລ້ວຍັງມີຄອບຄົວ ນາງ ມະໄລລັກ ທະວົງສີ ບ້ານທາງຄົບ ທີ່ໄດ້ມີຜະລິດຕະພັນການຈັກສານເຄື່ອງທີ່ລະ ນຶກ ເປັນຕົ້ນແມ່ນການຈັກສານ, ສານກະຕ່າ, ສານກະເປົ່າທີ່ເປັນສີມືຂອງບ້ານທາງຄົບ,
ທ່ານ ນາງ ປານີ ຢາທໍ່ຕູ້ ຮອງປະທານປະເທດ ໄດ້ສະແດງຄວາມຍ້ອງຍໍ ແລະ ຊົມເຊີຍມາຍັງການຈັດຕັ້ງທຸກພາກສ່ວນ ຮັກສາທາງດ້ານສີມື ແລະ ວັດທະນະທຳ ແລະ ຊຸກຍູ້ການຜະລິດຫັດຖະກຳການສ່ຽນ ,ຈັກສານ ແບບ ຄອບຄົວທີ່ສາມາດສ້າງລາຍຮັບໄດ້ດີ ແລະ ສາມາດສ້າງເສດຖະກິດຄອບຄົວໄດ້ ແລະ ເປັນຄອບຄົວຕົວແບບຕາມທິດ ເສດຖະກິດ ເອກກະລາດ ເປັນເຈົ້າຕົນເອງໃນໄລຍະໃໜ່.
ຂ່າວ: ມະໂນລັດ ສຍຂ.
