ໃນຕອນແລງວັນທີ 25 ທັນວາ 2024 ທີ່ຫໍປະຊຸມແຫ່ງຊາດ, ທ່ານ ສອນໄຊ ສີພັນດອນ, ນາຍົກລັດຖະມົນຕີ ໄດ້ໃຫ້ກຽດຕ້ອນຮັບ ການເຂົ້າຢ້ຽມຂໍ່ານັບ ຂອງທ່ານ ພັນເອກ ທະວີ ສອດ ສ່ອງ, ລັດຖະມົນຕີກະຊວງຍຸຕິທຳ ແຫ່ງ ຣາຊະອານາຈັກໄທ ພ້ອມດ້ວຍຄະນະ ໃນໂອກາດເດີນທາງມາຢ້ຽມຢາມ ແລະ ເຂົ້າ ຮ່ວມກອງປະຊຸມສອງຝ່າຍ ລາວ-ໄທ ລະດັບລັດຖະມົນຕີ ວ່າດ້ວຍການຮ່ວມມື ເພື່ອຄວບຄຸມຢາເສບຕິດ ຄັ້ງທີ 20 ໃນລະ ຫວ່າງວັນທີ 23-25 ທັນວາ 2024.
ໃນໂອກາດນີ້, ທ່ານ ນາຍົກລັດຖະມົນຕີ ກໍ່ໄດ້ກ່າວສະແດງຄວາມຍິນດີຕ້ອນຮັບ ແລະ ຊົມເຊີຍ ຕໍ່ທ່ານ ລັດຖະມົນຕີກະ ຊວງຍຸຕິທຳ ແຫ່ງ ຣາຊະອານາຈັກໄທ ແລະ ຄະນະ ທີ່ໄດ້ເດີນທາງມາເຂົ້າຮ່ວມກອງປະຊຸມສອງຝ່າຍ ຢູ່ ສປປ ລາວ ໃນຄັ້ງນີ້, ຊຶ່ງເປັນການປະກອບສ່ວນອັນສຳຄັນ ເຂົ້າໃນການເສີມສ້າງສາຍພົວພັນມິດຕະພາບ ຖານບ້ານໃກ້ເຮືອນຄຽງທີ່ດີ ລະຫວ່າງ ສອງລັດຖະບານ ແລະ ປະຊາຊົນສອງຊາດ ລາວ-ໄທ ໃຫ້ຈະເລີນງອກງາມຍິ່ງໆຂຶ້ນ; ໄດ້ຕີລາຄາສູງ ຕໍ່ການພົວພັນຮ່ວມມື ລະຫວ່າງ ກະຊວງຍຸຕິທຳ ແຫ່ງ ຣາຊະອານາຈັກໄທ ກັບກະຊວງປ້ອງກັນຄວາມ ສະຫງົບ ແລະ ກະຊວງຍຸຕິທຳ ແຫ່ງ ສປປ ລາວ ໃນໄລຍະຜ່ານມາ ເວົ້າລວມ, ເວົ້າສະເພາະ ແມ່ນຜົນສຳເລັດໃນການດຳເນີນກອງປະຊຸມສອງຝ່າຍ ລາວ-ໄທ ລະດັບລັດຖະມົນຕີ ວ່າດ້ວຍການຮ່ວມມື ເພື່ອຄວບຄຸມຢາເສບຕິດ ຄັ້ງທີ 20 ນີ້, ຊຶ່ງຈະເປັນພື້ນຖານອັນສຳຄັນ ໃຫ້ແກ່ການສືບຕໍ່ຮ່ວມມືກັນແກ້ໄຂບັນຫາຢາເສບຕິດ ໃຫ້ມີປະສິດທິພາບ ແລະ ປະສິດທິຜົນຫຼາຍຂຶ້ນ; ໄດ້ສະແດງຄວາມຂອບໃຈ ຕໍ່ລັດຖະບານ ກໍ່ຄືກະຊວງຍຸຕິທຳ ແລະ ພາກສ່ວນທີ່ກ່ຽວຂ້ອງ ຂອງຣາຊະອານາຈັກໄທ ທີ່ໄດ້ໃຫ້ການສະໜັບສະໜູນຊ່ວຍເຫຼືອທາງດ້ານຕ່າງໆ ໃຫ້ແກ່ຂະແໜງການ ແລະ ທ້ອງຖິ່ນກ່ຽວຂ້ອງ ຂອງ ສປປ ລາວ ໃນໄລຍະຜ່ານມາ; ໄດ້ຝາກຄຳຢ້ຽມຢາມຖາມຂ່າວ ແລະ ຄຳອວຍພອນອັນດີງາມ ໄປຍັງທ່ານນາຍົກລັດຖະມົນຕີ ແລະ ຄະນະລັດຖະບານ ແຫ່ງ ຣາຊະອາ ນາຈັກໄທ; ໄດ້ສະເໜີກະຊວງຍຸຕິທຳ ແຫ່ງ ຣາຊະອານາຈັກໄທ ແລະ ຂະແໜງການກ່ຽວຂ້ອງ ຂອງ ສປປ ລາວ ສືບຕໍ່ປະສານ ແລະ ຮ່ວມມືກັນ ແກ້ໄຂບັນຫາຢາເສບຕິດ ແລະ ບັນດາປະກົດ ການຫຍໍ້ທໍ້ຕ່າງໆ ເພື່ອປະກອບສ່ວນເຮັດໃຫ້ຂົງເຂດພາກພື້ນອາຊຽນ ປອດຢາເສບຕິດ ເປັນກ້າວໆ, ທັງມີຄວາມສະຫງົບປອດໄພດີ.
ໃນໂອກາດດຽວກັນ, ທ່ານ ລັດຖະມົນຕີກະຊວງຍຸຕິທຳ ແຫ່ງ ຣາຊະອານາຈັກໄທ ກໍ່ໄດ້ກ່າວສະແດງຄວາມຂອບໃຈ ຕໍ່ການຕ້ອນ ຮັບອັນອົບອຸ່ນ ຂອງທ່ານ ນາຍົກລັດຖະມົນຕີ ແລະ ພາກສ່ວນທີ່ກ່ຽວຂ້ອງ ຂອງ ສປປ ລາວ ໃນຄັ້ງນີ້, ພ້ອມທັງ ແຈ້ງໃຫ້ຊາບ ກ່ຽວກັບຜົນສຳເລັດ ໃນການພົວພັນຮ່ວມມື ລະຫວ່າງ ກະຊວງຍຸຕິທຳ ແຫ່ງຣາຊະອານາຈັກໄທ ກັບຂະແໜງການກ່ຽວຂ້ອງ ຂອງ ສປປ ລາວ ໃນໄລຍະຜ່ານມາ, ລວມທັງ ຜົນສຳເລັດ ໃນການເຮັດວຽກຮ່ວມກັນ ຢູ່ ສປປ ລາວ ໃນຄັ້ງນີ້; ໄດ້ຕີລາຄາສູງ ຕໍ່ຜົນສຳ ເລັດ ໃນການນຳພາ ແລະ ຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ຂອງ ສປປ ລາວ ຕະຫຼອດໄລຍະທີ່ຜ່ານມາ, ລວມທັງ ຜົນສຳເລັດໃນການເປັນເຈົ້າພາບ ຈັດກອງປະຊຸມສຸດຍອດອາຊຽນ ຄັ້ງທີ 44, 45 ແລະ ກອງປະຊຸມ ສຸດຍອດທີ່ກ່ຽວຂ້ອງ ຕະຫຼອດຮອດ ຜົນສຳເລັດ ໃນການພັດ ທະນາເສດຖະກິດ-ສັງຄົມ ເຮັດໃຫ້ ສປປ ລາວ ໄດ້ຮັບການພັດ ທະນາ ມີໃບໜ້າອັນໃໝ່ຫຼາຍດ້ານ; ນອກນັ້ນ, ຍັງໄດ້ນຳເອົາຄຳຢ້ຽມຢາມຖາມຂ່າວ ຂອງທ່ານ ນາຍົກລັດຖະມົນຕີ ແຫ່ງ ຣາຊະອານາຈັກໄທ ມາຍັງທ່ານ ນາຍົກລັດຖະມົນຕີ ແຫ່ງ ສປປ ລາວ ຕື່ມອີກ.
