ວັນທີ 20 ທັນວາ 2024 ທີ່ຫ້ອງວ່າການນະຄອນຫຼວງວຽງຈັນ (ນວ) ທ່ານ ອາດສະພັງທອງ ສີພັນດອນ ເຈົ້າຄອງນະຄອນຫຼວງວຽງຈັນ ໄດ້ຕ້ອນຮັບການເຂົ້າຢ້ຽມຄຳນັບ ແລະ ພົບປະຂອງທ່ານ ຫງວຽນ ມີ່ງເຕີມ ໃນໂອກາດທີ່ມາເປັນເອກອັກຄະລັດຖະທູດຫວຽດນາມປະຈຳລາວຄົນໃໝ່ ມີສຳນັກງານສະຖານ ທູດຕັ້ງຢູ່ ນວ.
ໂອກາດນີ້ທ່ານເຈົ້ຄອງ ນວ ໄດ້ຕາງໜ້າໃຫ້ຄະນະພັກ-ອົງການປົກຄອງ ພ້ອມດ້ວຍປະຊາຊົນ ນວ ສະແດງຄວາມຕ້ອນຮັບ ແລະ ຊົມເຊີຍຕໍ່ທ່ານ ຫງວຽນ ມີ່ງ ເຕີມ ທີ່ໄດ້ຖືກແຕ່ງຕັ້ງໃຫ້ມາດໍາລົງຕໍາແໜ່ງເປັນເອກອັກຄະລັດຖະທູດຫວຽດນາມປະຈໍາລາວຄົນໃໝ່ຢູ່ລາວກໍ່ຄື ນວ ຄັ້ງນີ້ ເຊິ່ງສະແດງໃຫ້ເຫັນເຖິງຄວາມໄວ້ເນື້ອເຊື່ອໃຈຈາກພັກລັດຖະບານ ແລະ ປະຊາຊົນຫວຽດນາມໃຫ້ມາປະຕິບັດໜ້າທີ່ການທູດຢູ່ລາວ ເພື່ອສືບຕໍ່ເສີມຂະຫຍາຍສາຍພົວພັນມິດຕະພາບອັນເປັນມູນເຊື້ອມິດຕະພາບທີ່ຍິ່ງໃຫຍ່ ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງລາວ ແລະ ຫວຽດນາມເວົ້າລວມ ເວົ້າສະເພາະສາຍພົວພັນຮ່ວມມືລະຫວ່າງ ນວ ກັບນະຄອນຫຼວງຮ່າໂນ້ຍ ນະຄອນໂຮ່ຈີມິນ ແຂວງແຄ່ງຮວາ ແລະ ບັນດາແຂວງຂອງຫວຽດນາມ ໃນຜ່ານມາການເຄື່ອນໄຫວໄປມາຫາສູ່ຂອງຄະນະຜູ້ແທນ ນວ ແລະ ຄະນະຜູ້ແທນບັນດານະຄອນ ແຂວງຂອງຫວຽດນາມ ລວມໄປເຖິງໂຄງການຮ່ວມມື ການຊ່ວຍເຫຼືອຕ່າງໆ ທີ່ໄດ້ຮັບການຈັດຕັ້ງປະຕິບັດແມ່ນລ້ວນແລ້ວແຕ່ມີການປະກອບສ່ວນໃນການປະສານສົມທົບວຽກງານການສ້າງເງື່ອນອຳນວຍຄວາມສະດວກຕ່າງໆ ໃຫ້ຈະເລີນງອກງາມຍິ່ງຂຶ້ນ.
ພ້ອມນີ້ທ່ານເຈົ້າຄອງ ນວ ຍັງໄດ້ລາຍງານໂດຍຫຍໍ້ກ່ຽວກັບສະພາບການພັດທະນາເສດຖະະກິດ-ສັງຄົມຂອງ ນວ ການລົງທຶນຂອງຫົວໜ່ວຍທຸລະກິດຫວຽດນາມຢູ່ ນວ ການກຽມເຫດການສຳຄັນຕ່າງໆຂອງ ນວ ໃນປີ 2025 ພ້ອມນີ້ທ່ານເຈົ້າຄອງ ນວ ຍັງມີຄວາມຄວາມມຸ້ງມາດປາດຖະໜາ ແລະ ເຊື່ອໝັ້ນຢ່າງຍິ່ງວ່າສອງຊາດລາວ-ຫວຽດນາມ ແລະ ຫວຽດນາມ-ລາວ ຈະໄດ້ພ້ອມກັນເພີ່ມທະວີສາຍພົວພັນອັນສະໜິດແໜ້ນຢ່າງເລິກເຊີ່ງຂື້ນກວ່າເກົ່າ ເພື່ອຍົກບົດບາດ ສາຍພົວພັນມິດຕະພາບທີ່ຍິງໃຫຍ່ ຄວາມສາມັກຄີແບບພິເສດທີ່ເປັນມູນເຊື້ອ ແລະ ການຮ່ວມມືຍຸດທະສາດຮອບດ້ານລະຫວ່າງສອງພັກ ສອງລັດ ແລະ ປະຊາຊົນສອງຊາດລາວ-ຫວຽດນາມ ເວົ້າລວມເວົ້າສະເພາະລະຫວ່າງ ນວ ແລະ ບັນດານະຄອນ ແຂວງ ມິດຕະພາບຂອງຫວຽດນາມຈົ່ງໝັ້ນຄົງຂະໜົງແກ່ນ ສວຍສົດງົດງາມຕະຫຼອດກາລະນານ ອວຍພອນໄຊໃຫ້ທ່ານ ຫງວຽນ ມີ່ງ ເຕີມ ໃນໂອກາດທີ່ເດີນທາງມາປະຕິບັດໜ້າທີ່ການທູດຢູ່ລາວເຊິ່ງເປັນໜ້າທີ່ອັນມີກຽດ ແລະ ສໍາຄັນທີ່ພັກ-ລັດຖະບານຫວຽດນາມໄດ້ມອບໃຫ້ສຳເລັດທຸກປະການ.
ຕອນທ້າຍທ່ານທູດຫວຽດນາມປະຈຳລາວຄົນໃໝ່ ໄດ້ສະແດງຄວາມຂອບອົກຂອບໃຈຕໍ່ການຕ້ອນຮັບອັນອົບອຸ່ນຂອງທ່ານເຈົ້າຄອງ ນວ ພ້ອມຄະນະນໍາ ນວ ໃນຄັ້ງນີ້ ແລະ ໃຫ້ຄຳໝັ້ນສັນຍາວ່າຈະສືບຕໍ່ເຮັດພາກິດທີ່ພັກ-ລັດຖະບານ ແລະ ປະຊາຊົນຫວຽດນາມມອບໝາຍໃຫ້ໃນການມາປະຕິບັດໜ້າທີ່ຄັ້ງນີ້ຢູ່ລາວ ເພື່ອສືບຕໍ່ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືຮອບດ້ານຂອງສອງພັກສອງລັດໃຫ້ມີຜົນສຳເລັດເປັນກ້າວໆ.
