ນະຄອນຫຼວງວຽງຈັນ ຄອງເຈົ້າຫຼຽນຄຳ ກີລານັກຮຽນມັດທະຍົມສຶກສາທົ່ວປະເທດ ຄັ້ງທີ 7 ທີ່ແຂວງສາລະວັນ ເປັນເຈົ້າພາບ ລະຫວ່າງວັນທີ 13-22 ທັນວາ 2024 ດ້ວຍຜົນງານ 26 ຫຼຽນຄຳ, 21 ຫຼຽນເງິນ ແລະ 29 ຫຼຽນທອງ ລວມ 76 ຫຼຽນ, ແຂວງຈຳປາສັກ ຢູ່ອັນດັັບ2 ແລະ ເຈົ້າພາບສາລະວັນ ອັນດັບ 3 ມະຫະກຳກີລານັກຮຽນມັດທະຍົມສຶກສາທົ່ວປະເທດ ຄັ້ງທີ VII ທີ່ແຂວງສາລະວັນ ເປັນເຈົ້າພາບ ປິດລົງດວ້ຍຜົນສໍາເລັດຢ່າງຈົບງາມ ພາຍຫຼັງດໍາເນີນມາເປັນເວລາ 10 ວັນ ຄືເລີ່ມແຕ່ວັນທີ 13-22 ທັນວາ 2024.
ທ່ານ ດາວວົງ ພອນແກ້ວ ເຈົ້າແຂວງສາລະວັນ ປະທານຈັດງານ ໄດ້ກ່າວປິດງານວ່າ: ໃນນາມຕ່າງໜ້າໃຫ້ອົງການປົກຄອງແຂວງສາລະວັນ ແລະ ລັດຖະບານແຫ່ງ ສປປ ລາວ ຂໍສະແດງຄວາມຍ້ອງຍໍຊົມເຊີຍຜົນສຳເລັດຂອງຄະນະຮັບຜິດຊອບຈັດງານ, ບັນດາທ່ານຄະນະນຳນັກກີລາ, ຄູຝຶກ, ກຳມະການຕັດສີນ, ຜູ້ປະກອບການ, ຜູ້ອຸປະຖຳຕະຫຼອດຮອດຄູອາຈານ ແລະ ປະຊາຊົນບັນດາເຜົ່າຊາວແຂວງສາລະວັນ ທີ່ໄດ້ປະກອບສ່ວນເປັນເຈົ້າພາບທີ່ດີໃນງານຄັ້ງນີ້, ເຮັດໃຫ້ການຈັດງານຄັ້ງນີ້ມີຜົນສຳເລັດຕາມລະດັບຄາດໝາຍທີ່ວາງໄວ້.
ຈາກນັ້ນ ກໍໄດ້ມີການສະແດງສິລະປະ-ວັນນະຄະດີ, ຄື ລາຍການສະແດງສຽງແຄນແດນສາລະວັນ, ໄວໜຸ່ມຍຸກສະໄໝໃສ່ໃຈສຸຂະພາບ, ເຊກອງຍິນດີຕ້ອນຮັບ, ມ່ວນຊື່ນສະຫຼອງໄຊກີລາສາລະວັນ ເເລະ ຂະບວນສວນສະໜາມຂອງນັກກິລາ ແລະມີພິທີເຊີນທຸງຊາດ ແລະ ທຸງກີລາ ລົງຈາກຍອດເສົາ, ພ້ອມດຽວກັນກັບໄຟອ່າງທວນໄຟຄ່ອຍໆມອດລົງ ແລະ ມອບທຸງກີລາໃຫ້ແຂວງເຊກອງ ເປັນເຈົ້າພາບໃນງານມະຫະກຳກີລານັກຮຽນມັດທະຍົມສຶກສາທົ່ວປະເທດຄັ້ງທີ VIII ໃນປີ 2027.
