ທ່ານ ບຸນທອງ ຈິດມະນີ ກຳມະການກົມການເມືອງສູນກາງພັກ ຜູ້ປະຈຳການຄະນະເລຂາທິການສູນກາງພັກ ຮອງປະທານປະເທດແຫ່ງ ສປປລາວ ພ້ອມດ້ວຍຄະນະໄດ້ລົງຢ້ຽມຢາມໂອ້ລົມພະນັກງານຫຼັກແຫຼ່ງເມືອງໝອກ ແຂວງຊຽງຂວາງ ໃນວັນທີ 21 ທັນວາ ຜ່ານມາ, ໂດຍການຕອນຮັບຂອງທ່ານ ບຸນຈັນ ສີວົງພັນ ກຳມະການສູນກາງພັກ ເລຂາພັກແຂວງ ເຈົ້າແຂວງໆຊຽງຂວາງ ພ້ອມດ້ວຍການນຳຂອງແຂວງ ແລະ ເມືອງ.
ທ່ານ ພັນເອກ ມີສຸກ ຂັນທະຍົງທອງ ເຈົ້າເມືອງໆໝອກ ໄດ້ລາຍງານການພັດທະນາເສດຖະກິດ-ສັງຄົມຂອງເມືອງໃນໄລຍະຜ່ານມາວ່າ: ທົ່ວເມືອງມີ 28 ບ້ານ, ມີ 4 ກຸ່ມ, ມີ 1 ຈຸດສຸມພັດທະນາຂອງກະຊວງປ້ອງກັນປະເທດ, ມີ 2,590 ຄອບຄົວ, ມີ 16,430 ຄົນ ຍິງ7,947 ຄົນ, ລາຍຮັບບັນລຸ 239.59 ຕື້ກີບ, ເສດຖະກິດຂະຫຍາຍຕົວ 5.25%, ທຽບໃສ່ແຜນການຫຼຸດຄາດໝາຍ 0.25%, ສະເລ່ຍໄດ້ 14.071.181 ກີບຕໍ່ຄົນຕໍ່ປີ ທຽບໃສ່ແຜນການປີປະຕິບັດໄດ້ 98.65%.
ໂອກາດນີ້, ທ່ານ ບຸນທອງ ຈິດມະນີ ໄດ້ມີຄຳຄິດເຫັນໂອ້ລົມ ຊຶ່ງທ່ານໄດ້ສະແດງຄວາມຊົມເຊີຍຕໍ່ຜົນງານການພັດທະນາເສດຖະກິດ-ສັງຄົມໃນໄລຍະຜ່ານມາພ້ອມທັງເນັ້ນໜັກໃຫ້ກວດຄືນບັນດາທ່າແຮງຂອງເມືອງເພື່ອວາງແຜນການພັດທະນາໃຫ້ຖຶກກັບທ່າແຮງ ແລະ ຈຸດພິເສດຂອງແຕ່ລະບ້ານ, ເອົາໃຈໃສ່ວຽກງານປ້ອງກັນຊາດ-ປ້ອງກັນຄວາມສະຫົງບເປັນບັນຫາສຳຄັນ, ຮູ້ຈຳແນກມິດສັດຕູຈະແຈ້ງ, ມີສະຕິລະວັງຕົວຕໍ່ກົນອຸບາຍຂອງກຸ່ມຄົນທີ່ບໍ່ຫັວງດີ, ເອົາໃຈໃສ່ພັດທະນາພື້ນຖານໂຄງລ່າງ, ເສັ້ນທາງ, ຊຸກຍູ້ ສົ່ງເສີມສະຫະກອນໃນການທຳການຜະລິດແບບໃໝ່ ທັນສະໄໝ, ຈັດຕັ້ງແບ່ງວຽກກຸ່ມສະຫະກອນ, ສົ່ງເສີມຊຸກຍູ້ການປູກ-ການລ້ຽງເປັນຟາມ, ເອົາໃຈໃສ່ວຽກງານສຶກສາສົ່ງເສີມລູກຫຼານເຂົ້າໂຮງຮຽນຕາມເກນອາຍຸ, ສຸມໃສ່ແກ້ໄຂບັນຫາທີ່ຝຶດເຄືອງແກ່ຍາວໃຫ້ວ່ອງໄວ ແລະ ມີຈຸດສຸມ, ການກະກຽມດຳເນີນກອງປະຊຸມໃຫຍ່ຂອງເມືອງໃຫ້ເອົາໃຈໃສ່ວຽກງານຂະບວນການ, ວຽກງານເນື້ອໃນຕ້ອງຖືກຕາມຕົວຈິງ ແລະ ທ່າແຮງໃນການພັດທະນາຂອງເມືອງ, ວຽກງານບຸກຄະລາກອນໃຫ້ປະຕິບັດຕາມຄຳແນະນຳ, ນິຕິກຳຂອງຂັ້ນເທິງ. ຈາກນັ້ນ, ກໍໄດ້ໄປຢ້ຽມຢາມຫ້ອງການຈຸດສຸມພັດທະນາກຸ່ມບ້ານຄັງວຽງ ເມືອງໝອກຂອງກະຊວງປ້ອງກັນປະເທດ ແລະ ຢ້ຽມຢາມໂຮງໝໍກຸ່ມບ້ານຄັງວຽງ ພ້ອມດຽວກັນນີ້ ກໍໄດ້ມອບຜ້າຫົ່ມຈຳນວນ 200 ຜືນ, ເສື້ອກັນໜາວ 200 ຜືນ, ສາດ 50 ຜືນໃຫ້ເມືອງ ແລະ ມອບເງິນຈຳນວນໜຶ່ງໃຫ້ເມືອງ ແລະ ໂຮງໝໍນ້ອຍກຸ່ມບ້ານຄັງວຽງ.
(ຂ່າວ: ບຸນມີ ແສງທຸມມີ)
