ເປັນເກມການແຂ່ງຂັນທີ່ສ້າງຄວາມປະທັບໃຈໃຫ້ກັບກອງເຊຍຂ້າງສະໜາມ ຢ່າງມ່ວນຊື່ນ, ຄືກຄື້ນ ແລະ ໄດ້ໃຈກອງເຊຍ ກິລາບານເຕະຊາຍ ແຂວງສາລະວັນ ບຸກຊະນະ ແຂວງສະຫວັນນະເຂດ ແບບສຸດມັນ ດ້ວຍປະຕູ 2 – 0, ຮອບຮອງຊະນະເລີດ, ໃນມະຫາກຳກິລານັກຮຽນມັດທະຍົມສຶກສາທົ່ວປະເທດ ຄັ້ງທີ VII ທີ່ແຂວງສາລະວັນ ເປັນເຈົ້າພາບ. ການແຂ່ງຂັນໄດ້ເລີ່ມຂຶ້ນໃນເວລາ 13:00 ໂມງ, ໃນວັນທີ 19 ທັນວານີ້, ເກມການແຂ່ງຂັນ ມີຄວາມດຸເດືອດ, ສຸດມັນ, ຕ່າງຝ່າຍຕ່າງບຸກເຂົ້າໃສ່ກັນ, ແຂວງສາລະວັນ ບຸກຍິງເກືອບໄດ້ປະຕູຫລາຍຄັ້ງ ແລະ ມາໄດ້ປະຕູຂຶ້ນນຳກ່ອນ ໃນນາທີ 45+2 ຈາກລູກຍິງຂອງ ໂກສີ ພົງສະຫວາດ ໝາຍເລກ 40 ແລະ ຈົບການແຂ່ງຂັນໃນເຄີ່ງເວລາທຳອິດ ແຂວງສາລະວັນ ນຳໄປກ່ອນ 1 ປະຕູຕໍ່ 0. ເລີ່ມແຂ່ງຂັນໃນເຄີ່ງເວລາທີ 2 ແຂວງສາລະວັນ ມາໄດ້ປະຕູທີ 2 ດ້ວຍການຍິງໄກຂອງ ກໍສິດ ອິນທະວົງ ໝາຍເລກ 25 ໃນນາທີ 71 ແລະ ໄດ້ບຸກຍິງກັນຫລາຍຄັ້ງ, ຜູ້ຮັກສາປະຕູປ້ອງກັນໄວ້ໄດ້ ຈົບເກມ 90 ນາທີ, ແຂວງສາລະວັນ ສາມາດບຸກບຽດເອົາຊະນະ ແຂວງສະຫວັນນະເຂດ ໄປດ້ວຍ 2 ປະຕູຕໍ່ 0, ຜ່ານເຂົ້າຮອບຊິງຊະນະເລີດ ກັບ ແຂວງອັດຕະປື ທີ່ເອົາຊະນະ ແຂວງຄຳມ່ວນ ໄປໄດ້ດ້ວຍປະຕູ 3 – 2 ຢ່າງສຸດມັນເຊັ່ນກັນ.
ເກມການແຂ່ງຂັນຮອບຊິງຊະນະເລີດ, ຊີງຫລຽນຄຳ ລະຫວ່າງ ແຂວງສາລະວັນ ພົບກັບ ແຂວງອັດຕະປື, ຈະແຂ່ງໃນວັນທີ 21 ທັນວານີ້, ທີ່ສະໜາມກິລາຂອງແຂວງ ແລະ ເປັນການພົບກັນຂອງສອງທິມ ໃນສາຍດຽວກັນ.
ຂ່າວ-ພາບ: ວິໄລວອນ ສິດທິໄຊ
