ວັນທີ 19 ທັນວາ 2024 ທີ່ສຳນັກງານປົກຄອງນະຄອນຫຼວງວຽງຈັນ ທ່ານ ອາດສະພັງທອງ ສີພັນດອນ ເຈົ້າຄອງນະຄອນຫຼວງວຽງຈັນ ໄດ້ຕ້ອນຮັບການເຂົ້າຢ້ຽມຄຳ ນັບຂອງ ທ່ານ ນາງ ຟາງ ຫົງ (Fang Hong) ເອກອັກຄະລັດຖະທູດ ແຫ່ງ ສາທາ ລະນະລັດ ປະຊາຊົນຈີນ ພ້ອມຄະນະ ເນື່ອງໃນໂອກາດມາດຳລົງຕຳແໜ່ງເປັນເອກອັກ ຄະລັດຖະທູດແຫ່ງ ສປ ຈີນ ປະຈຳ ສປປ ລາວ ຄົນໃໝ່.
ທ່ານ ອາດສະພັງທອງ ສີພັນດອນ ໄດ້ສະແດງຄວາມຕ້ອນຮັບ ແລະ ຊົມເຊີຍຕໍ່ທ່ານທູດຄົນໃໝ່ ທີ່ໄດ້ມາປະຕິບັດໜ້າທີ່ອັນມີກຽດປະຈຳຢູ່ ສປປ ລາວ ກໍຄືຢູ່ໃນນະຄອນ ຫຼວງວຽງຈັນ ທ່ານເຈົ້າຄອງເຊື່ອໝັ້ນວ່າພາຍໃຕ້ການປະຕິບັດໜ້າທີ່ກໍຄືການສືບຕໍ່ພົວພັນການຮ່ວມມື ລະຫວ່າງສອງຊາດ ລາວ-ຈີນ ຈະໄດ້ຮັບການພັດທະນາໄປຕາມທິດທາງທີ່ສອງພັກ ສອງລັດ ແລະ ປະຊາຊົນສອງຊາດ ມີຄວາມມຸ້ງຫວັງຮ່ວມກັນ ພ້ອມດຽວກັນນີ້ ທ່ານເຈົ້າຄອງນະຄອນຫຼວງກໍໄດ້ລາຍງາຍຫຍໍ້ກ່ຽວກັບແຜນພັດທະ ນາເສດຖະກິດ-ສັງຄົມຂອງນະຄອນຫຼວງວຽງຈັນໄລຍະທີ່ຜ່ານມາ ພ້ອມອວຍພອນໄຊໃຫ້ທ່ານທູດຈົ່ງປະສົບຜົນສຳເລັດ ໃນການປະຕິບັດໜ້າທີ່ວຽກງານຂອງຕົນຢູ່ ສປປ ລາວ.
ໂອກາດດຽວກັນນີ້ ນາງ ຟາງ ຫົງ (Fang Hong) ກໍໄດ້ສະແດງຄວາມຂອບໃຈອັນລໍ້າຄ່າຕໍ່ການຕ້ອນຮັບອັນອົບອຸ່ນຂອງທ່ານເຈົ້າຄອງນະຄອນຫຼວງວຽງຈັນ ໃນຄັ້ງນີ້ ພ້ອມທັງຢືນຢັນວ່າຈະຕັ້ງໜ້າປະຕິ ບັດໜ້າທີ່ຂອງຕົນໃຫ້ປະສົບຜົນສຳເລັດ ເພື່ອປະກອບສ່ວນເສີມສ້າງສາຍພົວພັນມິດຕະພາບ ແລະ ການຮ່ວມມືລະຫວ່າງສອງຊາດຈີນ-ລາວ ກໍຄືນະຄອນຫຼວງ ແລະ ບັນດາເມືອງ ໃຫ້ນັບມື້ຂະຫຍາຍຕົວກວ້າງ ຂວາງ ແລະ ນຳເອົາຜົນປະໂຫຍດຕົວຈິງມາສູ່ປະຊາຊົນສອງຊາດ.
