ປະທານ ໄກສອນ ພົມວິຫານ ແມ່ນກຳເນີດຂຶ້ນ ແລະ ຖືກຊຸບຫລໍ່ພາຍໃຕ້ລັດທິມາກ-ເລນິນ ແລະ ໃນແປວໄຟຂອງສົງຄາມຕໍ່ສູ້ ເພື່ອຍາດເອົາເອກະລາດ ແລະ ປົດປ່ອຍປະເທດຊາດ ໂດຍເລີ່ມຈາກສະພາບແວດລ້ອມທີ່ປະເທດຊາດ ຕົກເປັນຫົວເມືອງຂຶ້ນ ຂອງຈັກກະພັດທັງເກົ່າ, ໃໝ່ ແລະ ການປົກຄອງ ຂອງລະບອບສັກດີນາ, ໂດຍສະເພາະແມ່ນເພິ່ນໄດ້ຄົ້ນຄວ້າດ້ານທິດສະດີ, ຮ່ຳຮຽນເອົາແບບຢ່າງ ແລະ ແວ່ນແຍງອັນໃສ່ແຈ້ງໃນການຕໍ່ສູ້ເພື່ອປົດປ່ອຍຄົນຂອງກາກມາກ, ອັງແກນ, ເລນິນ ແລະ ປະທານ ໂຮ່ຈີ່ມິງ ທີ່ມີຄວາມເສຍສະລະອັນສູງສົ່ງ, ຜ່ານທຸກອຸປະສັກ ແລະ ສິ່ງທ້າທ້າຍທົດສອບນາໆປະການເພື່ອສ້າງມານະຈິດປະຕິວັດ, ຄຸນສົມບັດ, ສິນທຳປະຕິວັດ ແລະ ແບບຢ່າງໃນການເຄື່ອນຂອງຕົນ.
ຈາກຄວາມຮູ້ຄວາມສາມາດ, ຄວາມສະຫລາດຫລັກແຫລມຂອງພວກເພິ່ນທີ່ເປັນປັນຍາຊົນ, ຮັກຊາດ, ຮັກຊົນຊັ້ນຜູ້ຖືກກົດຂີ່ຂູດຮີດໄດ້ຕໍ່ສູ້ຕະຫລອດຊີວິດຂອງຕົນ ເພື່ອປົດປ່ອຍຊົນຊັ້ນກຳມະກອນ ແລະ ຊາວຜູ້ອອກແຮງານໃຫ້ພົ້ນຈາກການກົດຂີ່ຂູດຮີດ, ສ້າງສັງຄົມໃໝ່ສັງຄົມນິຍົມອັນນັ້ນໄດ້ສົ່ງຜົນສະທ້ອນຢ່າງຕັ້ງໜ້າ ປະທານ ໄກສອນ ພົມວິຫານ ມີບາດກ້າວເດີນອັນສະຫວ່າງສະໄຫວ, ດ້ວຍຈິດໃຈປະຕິວັດທີ່ແນ່ວແນ່ ແລະ ຄວາມເຊື່ອໝັ້ນອັນໜັກແໜ້ນຕໍ່ອຸດົມການ ບໍ່ຫວັ່ນໄຫວຄອນແຄນຕໍ່ຄວາມຫຍຸ້ງຍາກ, ສິ່ງທ້າທາຍທົດສອບໃດໆ ເຊິ່ງສະແດງອອກຢູ່ທີ່ປະທານໄດ້ອຸທິດ, ສຸມທຸກສະຕິປັນຍາ, ກຳລັງກາຍ, ກຳລັງໃຈຂອງເພິ່ນເພື່ອພັກ, ເພື່ອລັດ ແລະ ເພື່ອປະຊາຊົນ ກໍຄືປະເທດຊາດຢ່າງໝົດຈິດໝົດໃຈ ແລະ ສຸດກົກສຸດປາຍ.
ນ້ຳໃຈຮັກຊາດອັນຍິ່ງໃຫຍ່ຂອງປະທານ ໄກສອນ ພົມວິຫານ ແມ່ນການຮັກທ້ອງຖິ່ນ ແລະ ຮັກປະເທດຊາດຢ່າງຮອບດ້ານ, ຮັກວັດທະນະທຳບັນດາເຜົ່າ ແລະ ວັດທະນະທຳຂອງຊາດ. ນຳ້ໃຈຮັກຊາດດັ່ງກ່າວແມ່ນໄດ້ກຽມພ້ອມນຳເອົາຄວາມຮູ້, ຄວາມສາມາດຂອງຕົນເອງ ເພື່ອຮັບໃຊ້ປະເທດຊາດ ເປັນຕົ້ນແມ່ນຮັບໃຊ້ການປົດປ່ອຍຊາດ, ປົກປັກຮັກສາ ແລະ ພັດທະນາປະເທດຊາດ. ນ້ຳໃຈຮັກຊາດທີ່ເປັນເອກະລັກຂອງເພິ່ນແມ່ນເວລາໃດນຳ້ໃຈຮັກຊາດກໍສະແດງອອກໃນການກະທຳ, ໃນວຽກງານຕົວຈິງ, ຕໍ່ສູ້ຢ່າງເດັດດ່ຽວເດັດຂາດ ບໍ່ປານິປາມອນຕໍ່ແນວຄິດ ແລະ ການກະທຳທີ່ທຳລາຍການປະຕິວັດລາວ ແລະເປັນການກະທຳຢ່າງຕັ້ງໜ້າຂອງປະເທດຊາດ; ນ້ຳໃຈຮັກຊາດຂອງເພິ່ນແມ່ນຍັງຂຶ້ນກັບລະບົບແນວຄິດທີ່ກ້າວໜ້າ, ປະຕິວັດ ແລະ ປະຫວັດສາດຂອງຍຸກສະໄໝ. ທັງໝົດນີ້ແມ່ນໄດ້ປະສົມກົມກຽວຕິດແໜ້ນລະຫວ່າງ ຊົນຊັ້ນກຳມະກອນ ແລະ ປະຊາຊົນລາວບັນດາເຜົ່າ. ສຳລັບປະທານ ໄກສອນ ພົມວິຫານ ແມ່ນນອນຢູ່ໃນຊື່ສຽງຜູ້ທີ່ຍິ່ງໃຫຍ່, ໃນການເຄື່ອນໄຫວປະຕິວັດຂອງເພິ່ນແມ່ນມີຜົນງານຢ່າງຫລວງຫລາຍ, ໂດດເດັ່ນທີ່ສຸດ ເຊິ່ງຫລາຍຄົນຮັບຮູ້, ຍອມຮັບຕໍ່ຜົນງານດ່ັງກ່າວນັບທັງຢູ່ພາຍໃນ ແລະ ຕ່າງປະເທດ.
ປະທານ ໄກສອນ ພົມວິຫານ ໄດ້ທຸ້ມເທເຫື່ອແຮງ, ສະຕິປັນຍາ, ຄວາມຮູ້, ຄວາມສາມາດຂອງຕົນ ເພື່ອພາລະກິດປະຕິວັດຢ່າງບໍ່ຮູ້ອິດຮູ້ເມື່ອຍ ເຖິງວ່າຈະມີຄວາມຫຍຸ້ງຍາກລຳບາກພຽງໃດ ເພ່ິນກໍມີຄວາມອົດທົນເສຍສະຫລະຄວາມສຸກສ່ວນຕົວ ເພື່ອຄວາມສຸກ ແລະ ຜົນປະໂຫຍດຂອງຊາດ; ເຖິງວ່າຂະບວນການຕໍ່ສູ້ປະຕິວັດຕົກຢູ່ສະຖານະການຄັບຂັນໃດໆກໍຕາມ ແຕ່ປະທານ ໄກສອນ ພົມວິຫານ ພ້ອມດ້ວຍບັນດານັກຮັກຊາດທີ່ແທ້ຈິງ ໄດ້ຍຶດໝັ້ນອຸດົມການ ແລະ ແນວທາງຕໍ່ຕ້ານສັດຕູຈົນເຖິງທີ່ສຸດ. ດ້ວຍນ້ຳໃຈຮັບໃຊ້ປະຊາຊົນດ້ວຍຄວາມບໍລິສຸດໃຈ, ປະທານ ໄກສອນ ພົມວິຫານ ຍາມໃດເພິ່ນກໍຍຶດໝັ້ນເດີນຕາມແນວທາງມະຫາຊົນ, ຖືປະຊາຊົນເປັນກົກ, ເສີມຂະຫຍາຍບົດບາດເປັນເຈົ້າຂອງປະຊາຊົນສຸດຂີດ, ອີງໃສ່ກຳລັງທີ່ບໍ່ເຫືອດແຫ້ງຂອງປະຊາຊົນ. ປະທານ ໄກສອນ ພົມວິຫານ ເວົ້າວ່າ: ຮາກຖານແມ່ນບັນຫາຍຸດທະສາດ, ການລົງຮາກຖານແມ່ນວິທີປະຕິບັດໜຶ່ງ, ແມ່ນບົດຮຽນໜຶ່ງທີ່ສຳຄັນທີ່ສຸດຂອງການປະຕິວັດ. ເພິ່ນຍັງເນັ້ນວ່າ: ຕ້ອງນຳເອົາຜົນປະໂຫຍດຕົວຈິງ ທັງໃນດ້ານຈິດໃຈ ແລະ ວັດຖຸມາໃຫ້ປະຊາຊົນ ຖ້າວຽກໃດຫາກມີຜົນປະໂຫຍດໃຫ້ຊາດ ແລະ ປະຊາຊົນແລ້ວ ຈະໜັກ ຫລື ເບົາ, ນ້ອຍ ຫລື ໃຫຍ່, ສະດວກ ຫລື ຫຍຸ້ງຍາກກໍຕ້ອງເຮັດ. ຖ້າປະຊາຊົນບໍ່ພ້ອມ ເຮັດຫຍັງກໍ່ບໍ່ເກີດ, ການປະຕິວັດລາວເຕີບໃຫຍ່ ແລະ ໄດ້ຮັບໄຊຊະນະ ກໍຍ້ອນປະຊາຊົນໃຫ້ການສະໜັບສະໜູນ ແລະ ເຂົ້າຮ່ວມ, ພາລະກິດປະຕິວັດແມ່ນຂອງປະຊາຊົນ, ຕ້ອງນຳຜົນປະໂຫຍດມາໃຫ້ປະຊາຊົນ, ຕ້ອງເຮັດໃຫ້ປະຊາຊົນຕື່ນຕົວຮັກຊາດ ເຮັດການປະຕິວັດ; ຂະບວນການມະຫາຊົນ, ຮາກຖານປະຊາຊົນ ແມ່ນໂຮງຮຽນວິທະຍາໄລສຳລັບພະນັກງານປະຕິວັດ.
ຄັດຈາກ: ປຶ້ມແນວຄິດ ປະທານ ໄກສອນ ພົມວິຫານ
