ວິທະຍຸໂທລະພາບສູນກາງຈີນ CMG ໄດ້ລາຍງານວ່າ: ວັນທີ 3 ທັນວາປີນີ້ ແມ່ນວັນຄົບຮອບ 3 ປີ ແຫ່ງການເປີດນຳໃຊ້ທາງລົດໄຟ ຈີນ-ລາວ. ໃນຮອບ 3 ປີຜ່ານມາ, ທາງລົດໄຟ ຈີນ-ລາວ ໄດ້ສ້າງຜົນງານທີ່ພົ້ນເດັ່ນຫລາຍຢ່າງເຂົ້າໃນການຊຸກຍູ້ການພັດທະນາເສດຖະກິດການຄ້າຂອງພາກພື້ນ. ປະລິມານຂົນສົ່ງຜູ້ໂດຍສານໃນວັນດຽວໄດ້ເພີ່ມຂຶ້ນຈາກ 2 ໝື່ນເທື່ອຄົນເປັນສູງສຸດ 1 ແສນເທື່ອຄົນ, ສິນຄ້າທີ່ຂົນສົ່ງໄດ້ເພີ່ມຈາກ 10 ກວ່າຊະນິດຂຶ້ນເປັນ 3.000 ກວ່າຊະນິດ; ພາຍໃຕ້ການຊຸກຍູ້ຂອງທາງລົດໄຟ ຈີນ-ລາວ, ໃນ 6 ເດືອນຕົ້ນປີ 2024, ຍອດມູນຄ່າການຄ້າລະຫວ່າງ ຈີນ ກັບ 5 ປະເທດຕາມລຳແມ່ນ້ຳຂອງ ໄດ້ລື່ນກາຍ 200 ຕື້ໂດລາ, ເພີ່ມຂຶ້ນທົບເທົ່າເມື່ອທຽບໃສ່ 10 ປີກ່ອນ ແລະ ສ້າງສະຖິຕິໃນລະດັບໃໝ່.
ຫວ່າງບໍ່ດົນມານີ້, ພາກພາສາລາວຂອງວິທະຍຸໂທລະພາບສູນກາງຈີນ ຫລື CMG ໄດ້ວາງແຜນລາຍງານຂ່າວໂດຍຜ່ານສື່ຊ່ອງທາງຕ່າງໆ ເນື່ອງໃນໂອກາດເປີດນຳໃຊ້ທາງລົດໄຟ ຈີນ-ລາວ ຄົບຮອບ 3 ປີ, ໂດຍລົງເກັບກຳຂໍ້ມູນຢູ່ໃນຂະບວນລົດ ເປັນເວລາ 1 ອາທິດ ແລະ ສຳພາດຄົນຮ້ອຍຄົນ ເຊິ່ງສາມາດສຳຜັດໄດ້ເຖິງບົດບາດຂອງ ທາງລົດໄຟ ຈີນ-ລາວ ທີ່ມີຕໍ່ການພັດທະນາເສດຖະກິດການຄ້າຂອງພາກພື້ນໃນຮອບ 3 ປີຜ່ານມາ ໂດຍຜ່ານຈາກເລື່ອງລາວທີ່ມີຊີວິດຊີວາຕ່າງໆ.
ນັບແຕ່ເປີດນຳໃຊ້ 3 ປີຜ່ານມາ, ປະລິມານຂົນສົ່ງສິນຄ້າຕາມທາງລົດໄຟ ຈີນ-ລາວ ໄດ້ເພີ່ມຂຶ້ນຢ່າງຕໍ່ເນື່ອງ. ວັນທີ 24 ພະຈິກ 2024, ຢູ່ຕາມທາງລົດໄຟ ຈີນ-ລາວ ໄດ້ເປີດບໍລິການຂະບວນລົດໄຟຂົນສົ່ງໂດຍໃຊ້ຕູ້ແຊ່ເຢັນສາກົນຢ່າງເປັນທາງການ. ມື້ດຽວກັນ, ຂະບວນລົດໄຟຂົນສົ່ງ ໂດຍໃຊ້ຕູ້ແຊ່ເຢັນສາກົນ (ນະຄອນຫລວງວຽງຈັນ-ຄຸນໝິງ-ເມືອງຜິງກູ ນະຄອນຫລວງປັກກິ່ງ) ແລະ “ທາງລົດໄຟ ປັກກິ່ງ-ຢຸນນານ ແມ່ນ້ຳລ້ານຊ້າງ ແມ່ນ້ຳຂອງ” ໄດ້ໃຊ້ຮູບແບບການຂົນສົ່ງສິນຄ້າແບບບັນຈຸໃນຕູ້ເດີມ ແລະ ແຊ່ເຢັນຕະຫລອດເສັ້ນທາງບັນທຸກໝາກກ້ວຍລາວ ເກືອບ 450 ໂຕນ ເດີນທາງອອກຈາກນະຄອນຫລວງວຽງຈັນຂອງລາວ ຂົນສົ່ງໄປຮອດເມືອງຜິງກູ ນະຄອນຫລວງປັກກິ່ງ. ວັນທີ 3 ທັນວາ 2024, ຂະບວນລົດໄຟຂົນສົ່ງ ໂດຍໃຊ້ຕູ້ແຊ່ເຢັນສາກົນ ອີກຂະບວນໜຶ່ງທີ່ບັນຈຸກ້ວຍສົດລາວ ປະມານ 500 ໂຕນ ໄດ້ເດີນທາງໄປຮອດນະຄອນຫລວງປັກກິ່ງ ຢ່າງວ່ອງໄວປອດໄພ, ເຊິ່ງເປັນຂີດໝາຍສະແດງໃຫ້ເຫັນວ່າ ຂະບວນລົດໄຟຂົນສົ່ງ ໂດຍໃຊ້ຕູ້ແຊ່ເຢັນສາກົນແຕ່ ນະຄອນຫລວງວຽງຈັນ-ຄຸນໝິງ-ເມືອງຜິງກູ ນະຄອນຫລວງປັກກິ່ງ ໄດ້ເປີດບໍລິການຢ່າງເປັນທາງການແລ້ວ.
ທ່ານ ເສີນເພີ້ຍ ຮອງຜູ້ອຳນວຍການໃຫຍ່ ກຸ່ມບໍລິສັດທາງລົດໄຟແຫ່ງຊາດຈີນ ສາຂາຄຸນໝິງ ໃຫ້ຮູ້ວ່າ ການເປີດນຳໃຊ້ຂະບວນລົດໄຟຂົນສົ່ງ ໂດຍໃຊ້ຕູ້ແຊ່ເຢັນສາກົນ ເຮັດໃຫ້ການຄ້າຂາຍຜົນຜະລິດດ້ານກະສິກຳ ຈີນ-ລາວ ກາຍເປັນຮອບໝູນວຽນທີ່ດີ. ການນຳເຂົ້າໝາກໄມ້ຈາກເຂດຮ້ອນ, ສົ່ງອອກໝາກໄມ້ ແລະ ຜັກ ຈາກເຂດອຸ່ນ ໄດ້ກາຍເປັນຮອບໝູນວຽນທີ່ເປັນປົກກະຕິແລ້ວ. ສິນຄ້າບາງຢ່າງທີ່ເມື່ອກ່ອນບໍ່ມີການຂົນສົ່ງມາຂາຍ ມາຮອດປັດຈຸບັນຄ່ອຍໆປາກົດເຫັນວ່າ ທາງລົດໄຟ ຈີນ-ລາວ ຍັງສາມາດໃຫ້ບໍລິການຂົນສົ່ງມາຂາຍໄດ້.
ການເປີດນຳໃຊ້ຂະບວນລົດໄຟຂົນສົ່ງ ໂດຍໃຊ້ຕູ້ແຊ່ເຢັນສາກົນເປັນຂີດໝາຍອີກຢ່າງໜຶ່ງທີ່ສ່ອງແສງເຖິງຄວາມຈະເລີນຮຸ່ງເຮືອງຂອງການຂົນສົ່ງສິນຄ້າຕາມທາງລົດໄຟ ຈີນ-ລາວ. ນັບແຕ່ເປີດນຳໃຊ້ທາງລົດໄຟ ຈີນ-ລາວ ເປັນເວລາ 3 ປີຜ່ານມາ ໄດ້ກາຍເປັນເສັ້ນທາງສາຍໄໝເຫລັກກ້າ ທີ່ເຊື່ອມຕໍ່ການພັດທະນາຂອງພາກພື້ນ, ຊະນິດສິນຄ້າທີ່ຂົນສົ່ງໄດ້ເພີ່ມຂຶ້ນເປັນ 3000 ກວ່າຊະນິດ. ມັນດ້າງ, ໝາກມັງຄຸດ, ໝາກຖົ່ວລຽນ, ໝາກມ່ວງ ແລະ ໝາກໄມ້ອື່ນໆ.
