ວັນທີ 5 ທັນວາ 2024 ນີ້, ກະຊວງປ້ອງກັນປະເທດ ຈັດພິທີມອບ-ຮັບໜ້າທີ່ ການນໍາຂັ້ນສູງ ຂອງກະຊວງປ້ອງກັນປະເທດ ລະຫວ່າງ ສະຫາຍ ພົນເອກ ຈັນສະໝອນ ຈັນຍາລາດ ກຳມະ ການກົມການເມືອງສູນກາງພັກ, ເລຂາຄະນະບໍລິຫານງານພັກກະຊວງ, ຮອງນາຍົກລັດຖະມົນຕີ, ລັດ ຖະມົນຕີກະຊວງປ້ອງກັນປະເທດ (ຜູ້ເກົ່າ) ແລະ ສະຫາຍ ພົນໂທ ຄໍາລຽງ ອຸທະໄກສອນ ກຳມະການສູນກາງພັກ, ເລຂາຄະນະບໍລິຫານງານພັກກະຊວງ, ລັດຖະມົນຕີກະຊວງປ້ອງກັນປະເທດ (ຜູ້ໃໝ່) ໂດຍການເປັນປະທານຂອງ ສະຫາຍ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກ, ປະທານປະເທດ.
ໃນໂອກາດນີ້, ສະຫາຍ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກ, ປະທານປະເທດ ໄດ້ສະແດງຄວາມຍິນດີ, ຊົມເຊີຍ ແລະ ຕີລາຄາສູງຕໍ່ບັນດາຜົນງານອັນພົ້ນເດັ່ນຂອງວຽກງານປ້ອງກັນປະເທດ ທີ່ຍາດມາໄດ້ ໃນໄລຍະຜ່ານມາ ພາຍໃຕ້ການນຳພາ-ຊີ້ນຳຂອງ ສະຫາຍ ພົນເອກ ຈັນສະໝອນ ຈັນຍະລາດ, ທີ່ເປັນລັດຖະມົນຕີກະຊວງປ້ອງກັນປະເທດ ເຊິ່ງສະຫາຍໄດ້ຊີ້ນຳ-ນຳ ພາການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ກໍຄື ມະຕິກອງປະຊຸມໃຫຍ່ ຄັ້ງທີ V ຂອງອົງຄະນະພັກ ກະຊວງປ້ອງກັນປະເທດ ໂດຍສະເພາະແມ່ນ 4 ໜ້າທີ່ໃຫຍ່, 26 ແຜນງານ ຂອງກະຊວງປ້ອງກັນປະເທດ ເຂົ້າສູ່ວຽກງານຕົວຈິງ ຂອງທຸກກົມກອງ, ເຫລົ່າຮົບໃນທົ່ວກອງທັບ ໃຫ້ມີບາດກ້າວຂະຫຍາຍຕົວທີ່ພົ້ນເດັ່ນຫລາຍດ້ານ.
ສະຫາຍ ເລຂາທິການໃຫຍ່, ປະທານປະເທດ ຍັງໄດ້ເນັ້ນໃນພິທີວ່າ: ດ້ວຍຄວາມຮຽກ ຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່, ກົມການເມືອງສູນກາງພັກ ຈຶ່ງໄດ້ເອກະພາບກັນຕົກ ລົງຈັດວາງ, ສັບຊ້ອນພະນັກງານການນຳຂັ້ນສູງບາງຕຳແໜ່ງຢູ່ບາງຂົງເຂດວຽກງານຄືນໃໝ່. ໃນນີ້, ໄດ້ຍົກຍ້າຍ ສະຫາຍ ພົນເອກ ຈັນສະໜອນ ຈັນຍາລາດ ກໍາມະການກົມການເມືອງສູນກາງພັກ, ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດ ໄປປະຈໍາຢູ່ສໍານັກງານນາຍົກລັດຖະມົນຕີ ໃນຖານະຮອງນາຍົກລັດ ຖະມົນຕີ ແລະ ແຕ່ງຕັ້ງ ສະຫາຍ ພົນໂທ ຄໍາລຽງ ອຸທະໄກສອນ ກໍາມະການສູນກາງພັກ, ຮອງລັດຖະມົນຕີ ກະຊວງປ້ອງກັນປະເທດ, ຫົວໜ້າກົມໃຫຍ່ເສນາທິການກອງທັບຂຶ້ນເປັນລັດຖະມົນຕີ ກະຊວງປ້ອງກັນປະເທດ ແທນນັ້ນ ແມ່ນການຄົ້ນຄວ້າປຶກສາຫາລື ຢ່າງມີປະຊາທິ ປະໄຕ ແລະ ການຕົກລົງ ຢ່າງເປັນເອກະພາບສູງຂອງກົມການເມືອງສູນກາງພັກ, ຍ້ອນວ່າ ສະຫາຍ ພົນເອກ ຈັນສະໝອນ ຈັນຍາລາດ ໄດ້ດຳລົງຕຳແໜ່ງເປັນເລຂາຄະນະພັກ ກະຊວງປ້ອງກັນປະເທດ ທີ່ດໍາລົງຕໍາແໜ່ງເປັນລັດຖະມົນຕີ ກະຊວງປ້ອງກັນປະເທດສະໄໝນີ້ ຕິດຕໍ່ກັນເປັນສະໄໝທີ 2 ແລ້ວ, ອີງຕາມລະບຽບການແມ່ນຈະບໍ່ສາມາດດໍາລົງຕໍາແໜ່ງນີ້ ເປັນຄັ້ງທີ 3 ໄດ້ອີກ. ການທີ່ກົມການເມືອງສູນກາງພັກ ຕົກລົງໃຫ້ ສະຫາຍ ຍົກຍ້າຍໄປປະຈຳການ ຢູ່ສຳນັກງານນາຍົກລັດຖະມົນຕີ ໃນຖານະເປັນຮອງນາຍົກລັດຖະມົນຕີ, ຮັບຜິດຊອບຊ່ວຍນາຍົກລັດຖະມົນຕີ ກ່ຽວກັບວຽກງານຄວາມໝັ້ນຄົງ, ທັງຍັງເປັນຮອງປະທານ ຜູ້ປະຈຳການຄະນະກໍາມະການປ້ອງກັນຊາດ-ປ້ອງກັນຄວາມສະຫງົບ ສູນກາງ, ປະ ທານຄະນະກໍາມະການຄຸ້ມຄອງໄພພິບັດຂັ້ນສູນກາງ ແລະ ປະຕິບັດການຊີ້ນໍາວຽກງານທີ່ສໍາຄັນຈຳນວນໜຶ່ງຕື່ມອີກ ທີ່ຖືກແບ່ງງານໃຫ້ນັ້ນແມ່ນການຕົກລົງ ທີ່ຖືກຕ້ອງ ແລະ ສອດຄ່ອງກັບສະພາບການ, ເພາະສະຫາຍເອງກໍຮັບຮູ້ວ່າ ການຕັດສິນໃຈປ່ຽນໜ້າທີ່ເປັນ ລັດຖະມົນຕີປ້ອງກັນປະ ເທດ ໃຫ້ຜູ້ທີ່ຈະມາສືບທອດຕົນ ເພື່ອໃຫ້ໄດ້ຮຽນຮູ້ຈາກພຶດຕິກຳຕົວຈິງ ໃນການເປັນການນໍາຂອງກະ ຊວງນີ້ ຕ້ອງໄດ້ໃຊ້ເວລາໄລຍະໜຶ່ງ ເພື່ອກຽມໃສ່ກອງປະຊຸມໃຫຍ່ ຄັ້ງທີ VI ຂອງອົງຄະນະພັກກະຊວງປ້ອງກັນປະເທດ. ຂ້າພະເຈົ້າ, ກໍຂໍຊື່ນຊົມຄວາມຕັດສິນໃຈຍົກຍ້າຍຂອງ ສະຫາຍ ພົນເອກ ຈັນສະໝອນ ຈັນຍາລາດ ເອງ ຕາມຄຳເຫັນຂອງກົມການເມືອງນັ້ນ ເປັນການຕັດສິນໃຈທີ່ສະແດງໃຫ້ເຫັນຄວາມມີທາດແທ້ຂອງນັກປະຕິວັດ ແລະ ນັກຮົບປະຕິວັດຢ່າງແທ້ຈິງ.
ການສັບຊ້ອນເທື່ອນີ້ ບໍ່ສະເພາະມີແຕ່ ສະຫາຍ ພົນເອກ ຈັນສະໝອນ ຈັນຍາລາດ, ແຕ່ລວມໄປເຖິງ ສະຫາຍ ສະເຫລີມໄຊ ກົມມະສິດ ທີ່ມີລັກສະນະດຽວກັນນີ້, ສອງສະຫາຍ ຮອງນາຍົກລັດ ຖະມົນຕີ ລ້ວນແຕ່ໄດ້ດຳລົງຕຳແໜ່ງເປັນລັດຖະມົນຕີ ຂອງ ສອງກະຊວງມາເປັນສະໄໝທີ 2 ແລ້ວ, ສອງສະຫາຍ ໄດ້ປະຕິບັດໜ້າທີ່ຢ່າງເຕັມສ່ວນຂອງຕົນ, ສ້າງຜົນງານຢ່າງຫລວງຫລາຍ ໃຫ້ສອງຂົງເຂດວຽກງານ (ປ້ອງກັນປະເທດ ແລະ ການຕ່າງປະເທດ) ໂດຍສະເພາະ ການເປັນປະທານໝູນວຽນອາ ຊຽນ ປີ 2024, ສໍາເລັດກອງປະຊຸມສຸດຍອດ ແລະ ກອງປະຊຸມສຳຄັນອື່ນໆ ທີ່ ສປປ ລາວ ເປັນປະ ທານ ໄດ້ຢ່າງດີເລີດ. ແຕ່ວຽກງານສໍາຄັນ ຂອງລັດຖະບານ ທີ່ກໍາລັງລໍຄອຍໃຫ້ສອງສະຫາຍດັ່ງກ່າວ ໄປຊ່ວຍແກ້ໄຂຮ່ວມກັບສະຫາຍ ນາຍົກລັດຖະມົນຕີ ແລະ ລັດຖະບານ ມີຢ່າງຫລວງຫລາຍ.
ສະຫາຍ ເລຂາທິການໃຫຍ່ ປະທານປະເທດ ໄດ້ສະແດງຄວາມເຊື່ອໝັ້ນວ່າລັດຖະມົນຕີກະ ຊວງປ້ອງກັນປະເທດ (ຜູ້ໃໝ່) ທີ່ໄດ້ຜ່ານການທົດສອບໃນຂະບວນການວຽກງານຕົວຈິງ ແລະ ກາຍ ເປັນຜູ້ບັງຄັບບັນຊາຂັ້ນສູງໃນກອງກຳລັງປະກອບອາວຸດ, ເຄີຍດຳລົງຕໍາແໜ່ງເປັນເລຂາພັກແຂວງ, ເຈົ້າ ແຂວງ ຢູ່ທ້ອງຖິ່ນ, ເປັນຜູ້ທີ່ມີຄວາມຮູ້, ຄວາມສາມາດ ແລະ ປະສົບການນໍາພາທີ່ມີຜ່ານມາ ຈະພ້ອມກັບໝູ່ຄະນະເສີມຂະຫຍາຍມູນເຊື້ອອັນດີງາມຂອງກອງທັບ ສືບຕໍ່ນຳພາຍູ້ແຮງຂະບວນການດ້ານຕ່າງໆທີ່ ສະຫາຍ ພົນເອກ ຈັນສະໝອນ ຈັນຍາລາດ ໄດ້ຄຽງບ່າຄຽງໄຫລ່ ກັບໝູ່ຄະນະນໍາ ສ້າງໄວ້ ແລະ ມີຜົນສໍາເລັດແລ້ວ ຕະຫລອດໄລຍະຫລາຍສິບປີນັ້ນ ໃຫ້ສືບຕໍ່ ຕໍ່ຍອດໃຫ້ຂະຫຍາຍຕົວຂຶ້ນກວ່າເກົ່າ.
ນອກນັ້ນ, ສະຫາຍ ທອງລຸນ ສີສຸລິດ ຍັງມີບາງຄໍາເຫັນເນັ້ນໃຫ້ກະຊວງປ້ອງກັນປະເທດ ເອົາ ໃຈໃສ່ ຕັ້ງໜ້າສຶກສາອົບຮົມການເມືອງ-ນໍາພາແນວຄິດໃຫ້ສະມາຊິກພັກ, ພະນັກງານ-ນັກຮົບ ເຊື່ອມ ຊຶມ, ກຳແໜ້ນແນວທາງປ່ຽນແປງໃໝ່ຂອງພັກ, ໜ້າທີ່ການເມືອງຂອງກອງທັບ, ມີຄວາມເຊື່ອໝັ້ນຕໍ່ອຸດົມການຂອງພັກ, ຈົ່ງຮັກພັກດີຕໍ່ປະເທດຊາດ ແລະ ຕໍ່ປະຊາຊົນ; ມີຄວາມເອກອ້າງທະນົງໃຈຕໍ່ມູນ ເຊື້ອ, ວິລະກໍາການຕໍ່ສູ້ ແລະ ສູ້ຮົບມີໄຊທີ່ສະຫງ່າອົງອາດຂອງກອງທັບເຮົາ, ທັງຮູ້ຕັ້ງໜ້າເສີມຂະ ຫຍາຍທາດແທ້ມູນເຊື້ອປະຕິວັດ ຂອງແຕ່ລະກົມກອງ ຂອງແຕ່ລະນັກຮົບ, ນາຍ ແລະ ພົນທະຫານ ໃຫ້ສູງເດັ່ນຂຶ້ນຢ່າງບໍ່ຢຸດຢັ້ງ; ພັກເຮົາ, ກອງທັບເຮົາ ເວລາໃດກໍຖືສໍາຄັນ ແລະ ເອົາໃຈໃສ່ຄວາມສາມັກຄີ, ຄວາມເປັນເອກະພາບພາຍໃນ ໃຫ້ໜັກແໜ້ນຢູ່ສະເໝີ, ຖືບັນຫາດັ່ງກ່າວ ເປັນປັດໄຈສໍາຄັນ, ທັງເປັນກໍາລັງແຮງໃນການຄໍ້າປະກັນ ຜົນສຳເລັດແຫ່ງການ ນໍາພາຊີ້ນໍາ ຂອງພັກເຮົາ; ຂໍໃຫ້ບັນດາສະຫາຍສືບຕໍ່ປົກປັກຮັກສາ ແລະ ເສີມສ້າງຄວາມສາມັກຄີເປັນປຶກແຜ່ນໂດຍສະເພາະ ຢູ່ພາຍໃນຄະນະພັກ-ຄະນະປະຈຳພັກ ກະຊວງໃຫ້ມີຄວາມໜັກແໜ້ນ, ມີຄວາມເປັນເອກະພາບສູງ ເພື່ອສືບຕໍ່ເປັນຫລັກແຫລ່ງ, ເປັນຄັນທຸງ ແລະ ເປັນແກນນຳໃນການນຳພາເຕົ້າໂຮມຄວາມສາມັກຄີ ໃນຖັນແຖວສະມາຊິກພັກ, ພະ ນັກງານ-ນັກຮົບ ໃນທົ່ວກອງທັບເຮົາ ເພື່ອຢາກໃຫ້ເປົ້າໝາຍດັ່ງກ່າວບັນລຸ ຕ້ອງປັບປຸງ ແບບແຜນວິທີເຮັດວຽກ, ແບບແຜນນຳພາ, ເປີດກວ້າງປະຊາທິປະໄຕ ລວມສູນເປັນເອກະພາບ ໃນການຊີ້ນຳບັນຊາທີ່ເດັດດ່ຽວວ່ອງໄວ, ທັນການ; ສືບຕໍ່ຊີ້ນໍາການປະຕິບັດຍຸດທະສາດຫັນລົງກໍ່ສ້າງຮາກຖານການເມືອງຕິດພັນກັບການພັດທະນາຊົນນະບົດຮອບດ້ານ ແລະ ແກ້ໄຂຄວາມທຸກຍາກ ຂອງປະຊາຊົນຕາມ 4 ເນື້ອໃນ 4 ຄາດໝາຍ; ປັບປຸງຮາກຖານການເມືອງ, ສ້າງທ່າສະໜາມສົງຄາມປະຊາຊົນ 3 ຂັ້ນ, ຊ່ວຍເຫລືອປະຊາຊົນພັດທະນາເສດຖະກິດ-ສັງຄົມ, ແກ້ໄຂບັນດາໜໍ່ແໜງຄວາມບໍ່ສະຫງົບທີ່ເກີດຂຶ້ນ; ຍູ້ແຮງການຜັນຂະຫຍາຍ ທິດນໍາ ໃນການສ້າງເສດຖະກິດ ເອກະລາດເປັນເຈົ້າຕົນເອງ ໃນກອງທັບ ໃຫ້ຟົດຟື້ນ, ສ້າງການຫັນປ່ຽນໃໝ່ໃນການ “ເພິ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ”, ສ້າງ ພະລາທິການກັບທີ່ ເພື່ອສູ້ຊົນສ້າງແຫລ່ງລາຍຮັບໃຫ້ໄດ້ຫລາຍ, ປັບປຸງແກ້ໄຂ ແລະ ຍົກລະດັບຊີວິດການເປັນຢູ່ ໃນກໍາລັງໃຫ້ດີຂຶ້ນເລື້ອຍໆ; ປະຕິບັດແນວທາງການຕ່າງປະເທດຂອງພັກເຮົາ ໃນໄລຍະໃໝ່ຢ່າງຖືກຕ້ອງ, ຄ່ອງແຄ້ວ, ພົວພັນຮ່ວມມືຢ່າງຕັ້ງໜ້າກັບປະເທດເພື່ອນມິດທັງຢູ່ໃກ້ ແລະ ຢູ່ໄກ; ໃຫ້ຊີ້ນໍາການກະກຽມຄວາມພ້ອມ ເພື່ອເຂົ້າຮ່ວມໃນກອງກໍາລັງຮັກສາສັນຕິພາບສາກົນ (ຂອງ ສປຊ) ຂອງກອງທັບເຮົາໃນອະນາຄົດອັນໃກ້ນີ້.
ຂ່າວ-ພາບ: ຫ້ອງວ່າການສູນກາງພັກ
