ພິທີສະເຫລີມສະຫລອງ ວັນຄົບຮອບ 60 ປີ ທີ່ ສປປ ລາວ ເຂົ້າເປັນສະມາຊິກ ຂອງ ອົງການແຮງງານສາກົນ (23/01/1964) ຈັດຂຶ້ນໃນວັນທີ 5 ທັນວາ 2024 ຢູ່ຫໍວັດທະນະທຳແຫ່ງຊາດ ໂດຍມີ ທ່ານ ກິແກ້ວ ໄຂຄຳພິທູນ ຮອງນາຍົກລັດຖະມົນຕີ, ມີລັດຖະມົນຕີ, ຮອງລັດຖະມົນຕີ, ຫົວໜ້າກົມ, ຮອງກົມ, ຜູ້ຕາງໜ້າຈາກ ອົງການຈັດຕັ້ງຜູ້ໃຊ້ແຮງງານ, ອົງການຈັດຕັ້ງຜູ້ອອກແຮງງານ, ອົງການແຮງງານສາກົນ ແລະ ພາກສ່ວນກ່ຽວຂ້ອງ ເຂົ້າຮ່ວມ.
ໂອກາດດັ່ງກ່າວ, ທ່ານ ກິແກ້ວ ໄຂຄຳພິທູນ ໄດ້ມີຄຳເຫັນ ໄດ້ຕີລາຄາສູງຕໍ່ອົງການແຮງງານສາ ກົນ ແລະ ຢືນຢັນວ່າ ສປປ ລາວ ຈະເປັນປະເທດໜຶ່ງທີ່ຍາດໄດ້ຜົນສຳເລັດ ໃນການຈັດຕັ້ງປະຕິບັດມາດຕະຖານຂອງອົງການແຮງງານສາກົນ ໂດຍສະເພາະ ບັນດາມາດຕະຖານແຮງານສາກົນວາງອອກ ທີ່ ສປປ ລາວ ໄດ້ເຂົ້າເປັນພາຄີແລ້ວ ແລະ ຈະສືບຕໍ່ຮ່ວມມືກັບອົງການສາມຝ່າຍ ເພື່ອຄົ້ນຄວ້າຄວາມເປັນໄປໄດ້ໃນການເຂົ້າເປັນພາຄີ ຂອງສົນທິສັນຍາສະບັບອື່ນໆ ຂອງອົງການ ທີ່ເຫັນວ່າມີຄວາມສອດສ່ອງ ແລະ ເປັນຜົນປະໂຫຍດໃຫ້ແກ່ປະເທດຊາດ ແລະ ຊາວຜູ້ແຮງງານລາວ. ພ້ອມທັງ, ສະແດງຄວາມຫວັງວ່າ ອົງການແຮງງານສາກົນ, ອົງການ ແລະ ປະເທດ ເພື່ອນມິດຈະໃຫ້ການຮ່ວມມື, ສະໜັບສະໜູນ ແກ່ ສປປ ລາວ ໃນການປະຕິບັດພາລະກິດ ດັ່ງກ່າວ, ໃຫ້ມີຄວາມສໍາເລັດ.
ສປປ ລາວ ໄດ້ເຂົ້າເປັນສະມາຊິກຂອງອົງການແຮງງານສາກົນ ນັບແຕ່ເດືອນມັງກອນ 1964 ເປັນຕົ້ນມາ, ຕະຫລອດໄລຍະເວລາ 60 ປີຜ່ານມາ ອົງການສາມຝ່າຍຂອງປະເທດ ໄດ້ຮ່ວມກັນປຶກສາຫາລື ຄົ້ນຄວ້າບັນດາມາດຕະຖານຂອງອົງການແຮງງານສາກົນ ແລະ ໄດ້ໃຫ້ສັດຕະຍາບັນແລ້ວ ທັງໝົດ 12 ສະບັບ ພ້ອມທັງໄດ້ຜັນຂະຫຍາຍມາເປັນມາດຕະຖານແຮງງານ ໂດຍສະເພາະທີ່ສ້າງແລ້ວ ແລະ ນຳໃຊ້ຢູ່ແມ່ນກົດໝາຍວ່າດ້ວຍແຮງງານ, ກົດໝາຍວ່າດ້ວຍການປະກັນສັງຄົມ ແລະ ກົດໝາຍວ່າດ້ວຍການຈັດຫາງານ ເຊິ່ງໄດ້ນຳໃຊ້ເປັນເຄື່ອງມືໃຫ້ແກ່ການປັບປຸງເງື່ອນໄຂ ແລະ ສະພາບແວດລ້ອມໃນສະ ຖານທີ່ເຮັດວຽກ ເພື່ອເພີ່ມທະວີຄວາມຍຸຕິທຳໃນສັງຄົມ, ສົ່ງເສີມການມີວຽກເຮັດທີ່ມີຄຸນຄ່າ ແລະ ເປັນທໍາ, ເປັນວຽກເພື່ອອະນາຄົດທີ່ສົດໃສ ໃຫ້ແກ່ຜູ້ອອກແຮງງານ.
ທ່ານ ນາງ ໃບຄໍາ ຂັດທິຍະ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ໄດ້ໃຫ້ຮູ້ວ່າ: ຂະແໜງແຮງງານ ແລະ ສະຫວັດດີການສັງຄົມ ໃນຖານະເປັນຕົວແທນໃຫ້ແກ່ລັດຖະບານ ໃນການດັດສົມສາຍພົວພັນລະຫວ່າງຜູ້ອອກແຮງງານ ແລະ ຜູ້ໃຊ້ແຮງງານ ເພື່ອເປັນການປົກປ້ອງສິດຜົນ ປະໂຫຍດອັນຊອບທຳຂອງຜູ້ອອກແຮງງານ ແລະ ຜູ້ໃຊ້ແຮງງານ. ນອກນັ້ນ, ຍັງມີການເຄື່ອນໄຫວຢ່າງຫ້າວຫັນ ເປັນຕົ້ນ ໄດ້ຄົ້ນຄວ້າ ແລະ ຜັນຂະຫຍາຍບັນດາສົນທິສັນຍາທີ່ ສປປ ລາວ ໄດ້ໃຫ້ ສັດຕະຍາ ບັນມາເປັນນະໂຍບາຍ, ມາເປັນກົດໝາຍ ແລະ ນິຕິກຳຍ່ອຍ ເພື່ອເປັນບ່ອນອີງໃນການຈັດຕັ້ງປະຕິບັດ.
ຜູ້ອໍານວຍການໃຫຍ່ ຂອງອົງການແຮງງານສາກົນ ໄດ້ສະແດງຄວາມຊົມເຊີຍ ຕໍ່ການຮ່ວມມື ໃນໄລຍະ 60 ປີ ຜ່ານມາ ຜ່ານທາງອອນລາຍ ໂດຍທ່ານໄດ້ສະແດງຄວາມຂອບໃຈ ມາຍັງອົງການຈັດ ຕັ້ງສາມຝ່າຍຂອງພວກເຮົາ ສໍາລັບການຮ່ວມມື, ການເປັນຄູ່ຮ່ວມງານ ແລະ ຄວາມພະຍາຍາມທີ່ໂດດເດັ່ນຂອງບັນດາທ່ານ ໃນການສົ່ງເສີມວຽກທີ່ມີຄຸນຄ່າ, ເປັນທຳ ແລະ ຍຸຕິທຳທາງສັງຄົມ. ພ້ອມທັງ ສະແດງຄວາມຍິນດີ ຕໍ່ກັບ ສປປ ລາວ ທີ່ໄດ້ຖືກເລືອກເປັນສະມາຊິກ ຮອງຄະນະກຳມະການປົກຄອງ ຂອງ ອົງການແຮງງານສາກົນ (ILO) ເຊິ່ງແມ່ນການຮັບຮອງ ເຖິງຄວາມກ້າວໜ້າທີ່ໄດ້ບັນລຸ ລວມທັງການປະກອບສ່ວນ ເຂົ້າໃນການສ້າງນະໂຍບາຍ ແລະ ການປະຕິບັດດ້ານແຮງງານ ໃນທົ່ວໂລກ.
