ບັນດາຄູຝຶກບານສົ່ງລາວ ສາຍເລືອດໃໝ່ ຈຳນວນ 12 ຄົນ ທີ່ມາຈາກ 9 ສະໂມສອນອ້ອມຂ້າງ ນະຄອນຫຼວງວຽງຈັນ ໄດ້ຮັບການຍົກລະດັບຄວາມຮູ້ຄວາມສາມາດຈາກຊ່ຽວຊານຈາກສະຫະພັນບານສົ່ງ ອາຊີ ຫຼື AVC Coaching Course 2024 ລະຫວ່າງວັນທີ 3-8 ທັນວາ 2024.
ພິທີເປີດຝຶກອົບຮົມໃນຄັ້ງນີ້ ຈັດຂຶ້ນ ໃນຕອນເຊົ້າວັນທີ 3 ທັນວານີ້ ທີ່ສະໂມສອນກິລາບານສົ່ງໃນຮົ່ມ ກະຊວງປ້ອງກັນປະເທດ ຫຼື ກອງທັບ ໂດຍໃຫ້ກຽດເຂົ້າຮ່ວມເປັນປະທານໂດຍທ່ານ ບຸນມາ ທຳມະວົງ ຫົວໜ້າພະແນກພັດທະນາກິລາ ກົມກິລາລະດັບສູງ ກະຊວງສຶກສາທິການ ແລະ ກິລາ, ທ່ານ ນັດທະພົງ ເກສາພັນ ເລຂາທິກາສະຫະພັນບານສົ່ງແຫ່ງປະເທດໄທ ທັງເປັນຊ່ຽວຊານຈາກ AVC, ທ່ານ ທິບພົງພັດ ມະນິວົງ ຮອງເລຂາທິການສະຫະພັນບານສົ່ງແຫ່ງຊາດລາວ ແລະ ທ່ານ ຖາວອນ ກະມຸດສີ ຊ່ຽວຊານຈາກ AVC ແລະ ມີບັນດາສຳມະນາກອນ ທີ່ມາຈາກບັນດາສະໂມສອນກິລາບານຕ່າງໆ ອ້ອມຂ້າງສູນ, ໂຮງຮຽນຊົນເຜົ່າ ກອງທັບ ແລະ ກອງກິລາ ກອງທັບເຂົ້າຮ່ວມ 10 ກວ່າຄົນ.
ຕະຫຼອດໄລຍະການດຳເນີນກອງປະຊຸມຝຶກອົບຮົມ 6 ວັນ ລະຫວ່າງວັນທີ 3-8 ທັນວາ 2024 ສຳມະນາກອນ ແມ່ນໄດ້ຮຽນຮູ້ທັງພາກທິດສະດີ ແລະ ພາກປະຕິບັດຕົວຈິງ ຕະຫຼອດຮອດບົດບາດການເປັນຄູຝຶກກິລາດັ່ງກ່າວ ເພື່ອສົ່ງເສີມໃຫ້ເຂົາເຈົ້າ ທີ່ຈະເປັນກຳລັງສຳຄັນທີ່ຂຶ້ນມາໃໝ່ ໄດ້ຮຽນຮູ້ ແລະ ນຳໃຊ້ບົດຮຽນ ແລະ ປະສົບການນຳໄປຜັນຂະຫຍາຍສ້າງຄົນຮຸ່ນຫຼັງໃຫ້ນັບມື້ເຕີບໃຫຍ່ຢ່າງກວ້າງຂວາງຂຶ້ນເລື້ອຍໆ.
ສຳລັບສຳມະນາກອນ ຈຳນວນ 12 ຄົນ ທີ່ຕາງໜ້າຄູຝຶກບານສົ່ງຄົນລາວ ເຂົ້າຮ່ວມແມ່ນມຈາກສະໂມສອນ ລາວສະກາຍເວ, ສະໂມສອນ ວຽງຈັນ ວີຊີ, ກົມໃຫຍ່ພະລາທິການ ກອງທັບ, ໂຮງຮຽນຊົນເຜົ່າ ກອງທັບ, ສະໂມສອນ ກະຊວງປ້ອງກັນປະເທດ ຫຼື ກອງທັບ, ກອງກິລາ ກອງທັບ, ສະໂມສອນ ເອັດອີຊີ ວີຊີ, ສະໂມສອນ ໂກຣ-ອັບ ວີຊີ ແລະ ມະຫາວິທະຍາໄລວິທະຍາສາດ ສຸຂະພາບ.
ສ່ວນບົດຮຽນທີ່ຄູຝຶກສາຍເລືອດໃໝ່ ໄດ້ຮຽນຮູ້ກ່ຽວກັບການເລີ່ມຕົ້ນຂອງການເປັນຄູຝຶກ, ການສະພາບຟິດຂອງຮ່າງກາຍ, ອົບອຸ່ນຮ່າງກາຍ, ທັກສະພື້ນຖານ, ການຢຽດກ້າມເນື້ອ ພາຍຫຼັງການຝຶກຊ້ອມ, ການຝຶກແອບສະພາບຮ່າງກາຍ, ທັກສະສ່ວນບຸກຄົນ, ການຍົກນ້ຳໜັກ, ຄວາມຄ່ອງຕົວ, ການເຄື່ອນໄຫວຂັ້ນພື້ນຖານ-ທັກສະສ່ວນບຸກຄົນ, ຄວາມໄວ & ຄວາມຄ່ອງໂຕ, ການວາງແຜນທີມ&ລະບົບທີມ ແລະ ການຢຽດກ້າມເນື້ອ ພາຍຫຼັງການຝຶກຊ້ອມສຳເລັດແລ້ວ.
ພາບ-ຂ່າວ ໂດຍສົງການ ພັນແພງດີ
