ກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ IX ໃນວັນທີ 4 ທັນວາ 2024 ພາຍໃຕ້ການເປັນປະທານຂອງ ທ່ານ ຈະເລີຍ ເຍຍປາວເຮີ ຮອງປະທານສະພາແຫ່ງຊາດ, ທ່ານ ນາງ ວຽງທອງ ສີພັນດອນ ປະທານສານປະຊາຊົນສູງສຸດ ໄດ້ສະເໜີກ່ຽວກັບການປັບປຸງກົດໝາຍວ່າດ້ວຍການດຳເນີນຄະນະດີແພ່ງ ໂດຍໄດ້ຍົກໃຫ້ເຫັນເຖິງເຫດຜົນ ແລະ ຄວາມຈໍາເປັນໃນການປັບປຸງກົດໝາຍດັ່ງກ່າວ ເຊິ່ງຮ່າງກົດໝາຍວ່າດ້ວຍການດໍາເນີນຄະດີແພ່ງ(ສະບັບປັບປຸງ) ປະກອບດ້ວຍ XVIII ພາກ, 33 ໝວດ, 386 ມາດຕາ.
ທ່ານ ນາງ ວຽງທອງ ສີພັນດອນ ໄດ້ໃຫ້ຮູ້ວ່າ: ເຫດຜົນ ແລະ ຄວາມຈຳເປັນ ໃນການປັບປຸງກົດໝາຍດັ່ງກ່າວ ແມ່ນເພື່ອໃຫ້ສອດຄ່ອງກັບລັດຖະທຳມະນູນ, ກົດໝາຍທີ່ກ່ຽວຂ້ອງ ແລະ ຄວາມຮຽກ ຮ້ອງຕ້ອງການຂອງໜ້າທີ່ການເມືອງ ກໍຄື ການດໍາເນີນຄະດີແພ່ງໃນໄລຍະໃໝ່; ເພື່ອເຮັດໃຫ້ກົດໝາຍ ສາມາດຈັດຕັ້ງປະຕິບັດໄດ້ງ່າຍ ແລະ ສອດຄ່ອງ ກັບສະພາບຄວາມເປັນຈິງຂອງປະເທດເຮົາ, ແນໃສ່ການດໍາເນີນຄະດີແພ່ງ, ມີຄວາມວ່ອງໄວ, ໂປ່ງໃສ, ຖືກຕ້ອງ, ມີຄວາມເຊື່ອໝັ້ນ ເຊື່ອຖື ແລະ ເຂົ້າເຖິງຂະບວນຍຸຕິທໍາໄດ້ຫລາຍຂຶ້ນ, ການດໍາເນີນຄະດີມີຄຸນນະພາບ ແລະ ມີຜົນສັກສິດໃນການຈັດຕັ້ງປະຕິ ບັດ; ເຮັດໃຫ້ການຄຸ້ມຄອງ, ຕິດຕາມກວດກາສານປະຊາຊົນ ແລະ ຜູ້ພິພາກສາ ແທດເໝາະກັບສະພາບຄວາມເປັນຈິງ. ສຳລັບຄວາມຈໍາເປັນໃນການປັບປຸງ ໄດ້ມີມະຕິສະບັບເລກທີ 037/ກມສພ, ລົງວັນທີ 18 ມິຖຸນາ 2018 ວ່າດ້ວຍການຍົກສູງ ປະສິດທິພາບການຄຸ້ມຄອງລັດ-ຄຸ້ມຄອງສັງຄົມດ້ວຍກົດໝາຍ ແລະ ມະຕິສະບັບເລກທີ 112/ກມສພ, ລົງວັນທີ 02 ມິຖຸນາ 2020 ວ່າດ້ວຍການຍົກສູງຄຸນນະພາບການດໍາເນີນຄະດີຕາມຂະບວນການຍຸຕິທຳ. ສະນັ້ນ, ຈຶ່ງມີຄວາມຈໍາເປັນຕ້ອງໄດ້ມີການປັບປຸງກົດໝາຍ ວ່າດ້ວຍການດໍາເນີນຄະດີແພ່ງ ເພື່ອເປັນ ເຄື່ອງມື ແລະ ເປັນບ່ອນອີງໃນການເຄື່ອນໄຫວປະຕິບັດໜ້າທີ່ວຽກງານ, ການພິຈາລະນາຕັດສິນ ແລະ ພິພາກສາຄະດີຂອງສານ ໃຫ້ມີຄວາມຖືກຕ້ອງ, ວ່ອງໄວ, ຍຸຕິທຳ, ມີຄວາມເຊື່ອໝັ້ນຈາກປະຊາຊົນ ແລະ ກາຍເປັນເຄື່ອງມືຜະເດັດການສັກສິດ ເດັດຂາດຂອງພັກ; ເພື່ອຮວບຮວມເອົາບົດຮຽນອື່ນໃນກົດໝາຍທີ່ກ່ຽວຂ້ອງ, ລະບຽບການ, ນິຕິກຳອື່ນ ແລະ ບົດຮຽນຂອງຕ່າງປະເທດທີ່ພົວພັນກ່ຽວກັບວຽກງານການແກ້ໄຂບັນຫາທາງແພ່ງນໍາມາປັບປຸງເຂົ້າໃສ່ ກົດໝາຍວ່າດ້ວຍການດໍາເນີນຄະດີແພ່ງສະບັບປັບປຸງໃໝ່ ສາມາດຈັດຕັ້ງປະຕິບັດໄດ້ງ່າຍ ແລະ ສອດຄ່ອງກັບສະພາບຄວາມເປັນຈິງຂອງປະເທດເຮົາ, ແກ້ບັນຫາຄະດີຫລົບໄປຫລົບມາ, ມີຄວາມຊັກຊ້າ, ແກ່ຍາວເວລາ, ຮັບປະກັນຄວາມເປັນເອກະພາບ ແລະ ມີຜົນສັກສິດໃນການຈັດຕັ້ງປະຕິບັດ.
ພາຍຫລັງການປັບປຸງກົດໝາຍວ່າດ້ວຍດໍາເນີນຄະດີແພ່ງ ຈະສ້າງຄວາມເຊື່ອໝັ້ນຂອງສັງຄົມ ກໍຄື ຄູ່ຄວາມ, ບຸກຄົນທີສາມ ຕໍ່ສານປະຊາຊົນ ໃນການພິຈາລະນາຕັດສິນ ຫລື ພິພາກສາຄະດີແພ່ງ ແລະ ບັນດາປະກົດການຫຍໍ້ທໍ້ຕ່າງໆ; ເຮັດໃຫ້ບຸກຄົນ ແລະ ການຈັດຕັ້ງຮູ້ໄດ້ເຖິງ ພາລະບົດບາດ, ສິດ ແລະ ໜ້າທີ່ ການເຄື່ອນໄຫວວຽກງານຂອງສານປະຊາຊົນ ກ່ຽວກັບການດໍາເນີນການຄະດີແພ່ງ ກໍຄື ພິຈາລະ ນາແກ້ໄຂຂໍ້ຂັດແຍ່ງທາງແພ່ງ, ເຮັດໃຫ້ປະຊາຊົນເຂົ້າເຖິງຂະບວນການຍຸຕິທໍາ, ສັງຄົມມີຄວາມສະຫງົບສຸກ, ມີຄວາມເປັນລະບຽບຮຽບຮ້ອຍ ແລະ ປະກອບສ່ວນເຂົ້າໃນການສ້າງລັດ ທີ່ປົກຄອງດ້ວຍກົດໝາຍ ຢູ່ ສປປ ລາວ, ແກ້ໄຂບັນຫາການດໍາເນີນຄະດີມີຄວາມຊັກຊ້າແກ່ຍາວ, ຄະດີຫລົບໄປຫລົບມາບໍ່ມີມື້ສິ້ນສຸດ, ຮັບປະກັນການດໍາເນີນຄະດີແພ່ງ ມີຄວາມ ວ່ອງໄວ, ຖືກຕ້ອງ ແລະ ຄວາມຍຸຕິທໍາ ໃນສັງຄັມ.
