ພິທີປະກາດສ້າງຕັ້ງ ກອງບັນຊາການທະຫານຊາຍແດນ ກອງທັບປະຊາຊົນລາວ ໄດ້ຈັດຂຶ້ນໃນວັນທີ 29 ພະຈິກ 2024 ຜ່ານມາ ໂດຍການເປັນປະທານຂອງ ສະຫາຍ ພົນເອກ ຈັນສະໝອນ ຈັນຍາລາດ ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດ, ມີຜູ້ຕາງໜ້າຈາກກະຊວງອ້ອມຂ້າງ, ຄະນະພັກ-ຄະນະບັນຊາ, ບັນດາກົມກອງ ເຂົ້າຮ່ວມ.
ການປະກາດສ້າງຕັ້ງກອງບັນຊາການທະຫານຊາຍແດນ ກອງທັບປະຊາຊົນລາວ ໃນຄັ້ງນີ້, ອີງຕາມດໍາລັດວ່າດ້ວຍການສ້າງຕັ້ງ ກອງບັນຊາການທະຫານຊາຍແດນ ກອງທັບປະຊາຊົນລາວ, ອີງຕາມ ກົດໝາຍ ວ່າດ້ວຍລັດຖະບານ ສະບັບເລກທີ 03/ສພຊ, ລົງວັນທີ 16 ພະຈິກ 2021, ອີງຕາມ ໜັງສືສະເໜີ ຂອງກະຊວງປ້ອງກັນປະເທດ ສະບັບເລກທີ 6429/ກປທ, ລົງວັນທີ 20 ພະຈິກ 2023, ອີງຕາມ ໜັງສືສະເໜີ ຂອງກະຊວງພາຍໃນ ສະບັບເລກທີ 234/ພນ, ລົງວັນທີ 30 ພະຈິກ 2023 ແລະ ອີງຕາມ ການອອກດໍາລັດ ຂອງນາຍົກລັດຖະມົນຕີ ໂດຍເຫັນດີ ອະນຸມັດໃຫ້ສ້າງຕັ້ງ ກອງບັນຊາການທະຫານຊາຍແດນ ກອງທັບປະຊາຊົນລາວ ສັງກັດໃນໂຄງ ປະກອບກົງຈັກການຈັດຕັ້ງ ຂອງກະຊວງປ້ອງກັນປະເທດ ໂດຍໄດ້ແຕ່ງຕັ້ງ ສະຫາຍ ພົນຈັດຕະວາ ສີ ທະວີໄຊ ເປັນຮັກສາການຫົວໜ້າການ ເມືອງ ແລະ ສະຫາຍ ພັນເອກ ອຸ່ນຄໍາ ສີແຫວນວົງສັກ ຮັກສາການຜູ້ບັນຊາການ, ແຕ່ງຕັ້ງ ສະຫາຍ ພັນເອກ ອຳພັນ ໄຊຍາສຸບັດ ເປັນຮອງຫົວໜ້າຜູ້ບັນຊາການ, ທັງເປັນຫົວໜ້າຫ້ອງເສນາ ທິການ ກອງບັນຊາການ, ສະຫາຍ ພັນເອກ ດາວໄກ ເລີດລິວັນ ເປັນຮອງຫົວໜ້າການເມືອງ, ທັງເປັນຫົວໜ້າຫ້ອງ ການເມືອງ ກອງບັນຊາການ, ສະຫາຍ ພັນເອກ ສັກສິດ ພິຈິດ ເປັນຮອງຫົວໜ້າກອງບັນຊາການ, ທັງເປັນຫົວໜ້າຫ້ອງສືບ ຂ່າວຊາຍແດນ ກອງບັນຊາການ, ສະຫາຍ ພັນໂທ ພຸດສະດີ ເລື່ອງວັນໄຊ ເປັນຮອງຫົວໜ້າກອງບັນຊາການ ຮັບຜິດຊອບວຽກງານພະລາທິການ, ທັງເປັນຫົວໜ້າຫ້ອງພະລາທິ ການ ກອງບັນຊາການ ແລະ ແຕ່ງຕັ້ງ ພັນໂທ ຄໍາປານ ບົວລະບັດ ເປັນຮອງຫົວໜ້າກອງບັນຊາການ ຮັບຜິດ ຊອບວຽກງານ ເຕັກນິກ, ທັງເປັນຫົວໜ້າຫ້ອງເຕັກນິກ ກອງບັນຊາການ. ພ້ອມນີ້, ຍັງໄດ້ ແຕ່ງຕັ້ງຄະນະຫ້ອງ ກອງບັນຊາການທະຫານຊາຍແດນ ຈໍານວນ 12 ສະຫາຍ ຕື່ມອີກ.
ໂອກາດນີ້ ສະຫາຍ ພົນເອກ ຈັນສະໝອນ ຈັນຍາລາດ ໄດ້ມີຄຳເຫັນໂອ້ລົມ ໂດຍໄດ້ສະແດງ ຄວາມຍ້ອງຍໍຊົມເຊີຍ ຕໍ່ຄະນະຊີ້ນໍາ ບັນດາອະນຸກຳມະການ ແລະ ຊ່ວຍວຽກໃນການປັບປຸງ ຍົກລະ ດັບກໍາລັງທະຫານຊາຍແດນ ທີ່ໄດ້ທຸ່ມເທເຫື່ອແຮງ, ສະຕິປັນຍາ ພ້ອມທັງເອົາໃຈໃສ່ ຊີ້ນໍາຊຸກຍູ້ ແລະ ຈັດຕັ້ງປະຕິບັດບັນດາໜ້າວຽກຕ່າງໆ ສໍາເລັດຕາມແຜນການ ແລະ ໄດ້ປະກາດສ້າງຕັ້ງກອງບັນຊາການທະຫານຊາຍແດນ ກອງທັບປະຊາຊົນລາວ ໃນຄັ້ງນີ້. ພ້ອມທັງ ເນັ້ນໃຫ້ຜູ້ ທີ່ໄດ້ຖືກແຕ່ງຕັ້ງມອບໝາຍໜ້າທີ່ໃໝ່ ສຸມທຸກສະຕິປັນຍາ, ເຮື່ອແຮງ ເຂົ້າໃນການຈັດຕັ້ງປະຕິບັດໜ້າທີ່ ທີ່ໄດ້ຮັບມອບໝາຍ ໃຫ້ສຳເລັດຕາມເປົ້າໝາຍ.
ພ້ອມນີ້, ສະຫາຍ ພົນເອກ ຈັນສະໝອນ ຈັນຍາລາດ ຍັງໄດ້ຊີ້ທິດເຍືອງທາງອັນເປັນນິມິດໝາຍ ທີ່ດີແຫ່ງການເຕີບໃຫຍ່ຂະຫຍາຍຕົວ ທາງດ້ານປະລິມານ ແລະ ຄຸນນະພາບຂອງ ກອງທັບປະຊາຊົນລາວ ໂດຍສະເພາະແມ່ນ ເຫລົ່າຮົບທະຫານຊາຍແດນ ເພື່ອກ້າວເຂົ້າສູ່ລະບຽບແບບແຜນ ແລະ ທັນສະໄໝເປັນກ້າວໆ, ທັງຮັບປະກັນເຮັດສຳເລັດໜ້າທີ່ການເມືອງຂອງເຫລົ່າຮົບ ໃນສະເພາະໜ້າ ແລະ ຍາວນານ.
ພາບ: ຂັນໄຊ
