ວັນທີ 3 ທັນວານີ້, ທີ່ແຂວງບໍລິຄຳໄຊ ສູນກາງແນວລາວສ້າງຊາດ (ສນຊ) ແລະ ອົງການ ຢູນີເຊັບ ໄດ້ຈັດກອງປະຊຸມປຶກສາຫາລື ຮ່ວມກັບ ບັນດາສື່ມວນຊົນທີ່ແຂວງ ບໍລິຄຳໄຊ ເພື່ອຊ່ວຍຊຸກຍູ້ ຂະບວນການ ໂຄສະນາສັກຢາກັນພະຍາດ ເພື່ອຕ້ານມະເຮັງປາກມົດລູກ (HPV) ທົ່ວປະເທດ.
ລັດຖະບານແຫ່ງ ສປປ ລາວ ໄດ້ເລີມຈັດຕັ້ງປະຕິບັດຂະບວນການສັກຢາກັນພະຍາດ HPV ເເລະ ເອົາວຽກງານດັ່ງກ່າວເຂົ້າ ໃນເເຜນງານສັກຢາກັນພະຍາດເເຫ່ງຊາດນັບເເຕ່ປີ 2020 ເປັນຕົ້ນມາ ໂດຍຜ່ານການສະໜັບສະໜູນຈາກອົງການກາວີ (Gavi), ອົງການຢູນີເຊັບ, ອົງການອະນາໄມໂລກ ແລະ ຄູ່ຮ່ວມພັດທະນາ. ລັດຖະບານ ແຫ່ງ ສປປ ລາວ ໄດ້ເປີດຕົວຂະບວນການໂຄສະນາການສັກຢາກັນ ພະຍາດ HPV ໃນໂຮງຮຽນ ຮອບໃໝ່ໂດຍແນໃສ່ເດັກຍິງ ອາຍຸ 10 ປີ ຄຽງຄູ່ກັບເດັກຍິງ ອາຍຸ 11 ຫາ 13 ປີ ທີ່ບໍ່ເຄີຍໄດ້ຮັບວັກຊີນນີ້ມາກ່ອນ.
ໃນກອງປະຊຸມດັ່ງກ່າວ, ທ່ານ ເຍ່ຍເກີຢ່າງ ໜໍ່ຈໍ່ຈົງຕົວ ຮອງປະທານສູນກາງແນວລາວສ້າງຊາດ ເເລະ ປະທານກອງປະຊູ່ມ ໄດ້ກ່າວວ່າ: “ແນວລາວສ້າງຊາດ ເປັນພາກສ່ວນສຳຄັນຊຶ່ງມີໜ້າທີ່ໃນການ ເຕົ້າໂຮມຄວາມສາມັກຄີ, ໂຄສະນາ, ສຶກສາອົບຮົມ ເເລະ ປຸກລະດົມ ປະຊາຊົນບັນດາເຜົ່າ. ໃນນີ້, ຈະຕ້ອງໂຄສະນະເຜີຍແຜ່ ແລະ ໃຫ້ຄໍາປຶກສາໃຫ້ປະຊາຊົນ, ຊຸມຊົນໃນກຸ່ມເປົ້າໝາຍມີຄວາມເຂົ້າໃຈ ແລະ ຮັບຮູ້ເຖິງສາເຫດ, ໄພອັນຕະລາຍຂອງພະຍາດມະເຮັງປາກມົດລູກ, ຊຶ່ງຈະຕ້ອງເຮັດໃຫ້ກຸ່ມເປົ້າ ໝາຍເປັນເຈົ້າຮັກຕົນເອງ ເເລະ ຮັກຕົນເອງຈະຕ້ອງສັກຢາກັນພະຍາດມະເຮັງປາກມົດລູກ”.
ໃນກອງປະຊຸມດັ່ງກ່າວ, ຍັງໄດ້ຍົກໃຫ້ເຫັນ ບັນຫາການແຕ່ງງານກ່ອນໄວອັນຄວນ ຊຶ່ງຍັງຄົງ ເປັນບັນຫາທ້າທາຍອັນສຳຄັນໃນ ສປປ ລາວ. ທ່ານ ໄຊມ້ອນ ນາເຊີ ຫົວໜ້າພະເເນກສື່ສານໂຄສະນາ ຂອງອົງການຢູນີເຊັບ ປະຈຳ ສປປ ລາວ ໄດ້ເນັ້ນໜັກເຖິງບົດບາດອັນ ສຳຄັນຂອງສູນກາງ ແນວລາວສ້າງຊາດໃນການປຸກລະດົມຊຸມຊົນເພື່ອຢຸດຕິການແຕ່ງງານກ່ອນໄວອັນຄວນຂອງເດັກນ້ອຍໃນ ສປປ ລາວ. ທ່ານ ກ່າວຕື່ມວ່າ: “ການເເຕ່ງງານກ່ອນໄວອັນຄວນເປັນອຸປະສັກທີ່ຈໍາກັດການພັດທະນາ ຂອງເດັກຍິງ ແລະ ປະເທດຊາດ. ດັ່ງນັ້ນ, ສນຊ ເເລະ ເຄືອຂ່າຍສື່ມວນຊົນ ໃນລະດັບຊຸມຊົນຂອງພວກ ເຂົານັ້ນເເມ່ນມີບົດບາດອັນສໍາຄັນໃນການປ່ຽນແປງ ທັດສະນະຄະຕິ ຂອງຊຸມຊົນຕໍ່ບັນຫານີ້”.
ສປປ ລາວ ເປັນປະເທດທີ່ຄອງອັດຕາການແຕ່ງງານກ່ອນໄວອັນຄວນ ຂອງເດັກສູງທີ່ສຸດ ໃນອາຊີຕາເວັນອອກສ່ຽງໃຕ້, ໂດຍມີເຖິງ 30.5% ຂອງເດັກຍິງໃນປະເທດທີ່ແຕ່ງງານກ່ອນອາຍຸ 18 ປີ.
(ແຫຼ່ງຂ່າວ: ອົງການຢູນີເຊັບ)
