ການດໍາເນີນກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ IX ໃນວັນທີ 3 ທັນວາ 2024, ທ່ານ ນາງ ວັດທະນາ ດາລາລອຍ ຮັກສາການຜູ້ວ່າການທະນາຄານ ໄດ້ຂຶ້ນລາຍງານກ່ຽວການປັບປຸງກົດໝາຍວ່າດ້ວຍທະນາຄານແຫ່ງ ສາ ທາລະນະລັດ ປະຊາທິປະໄຕ ປະຊາຊົນລາວ. ທ່ານໄດ້ຍົກໃຫ້ເຫັນເຖີງຄວາມຈຳເປັນ ໃນການປັບປຸງກົດໝາຍ ເຊິ່ງ ກົດໝາຍວ່າດ້ວຍທະນາຄານແຫ່ງ ສປປ ລາວ ສະບັບທຳອິດຊື່ວ່າ: ກົດໝາຍວ່າດ້ວຍການສ້າງຕັ້ງທະນາຄານແຫ່ງ ສປປ ລາວ ຖືກຮັບ ຮອງ ແລະ ປະກາດໃຊ້ ໃນປີ 1990 ແລະ ໄດ້ຮັບການປັບປຸງ 3 ຄັ້ງ ຄື: ປີ1995, 1999 ແລະ ໃນປີ 2018. ກົດໝາຍວ່າດ້ວຍທະນາຄານແຫ່ງ ສປປ ລາວ (ສະບັບປັບປຸງ) ເລກທີ 47/ສພຊ, ລົງວັນທີ 19 ມິຖຸນາ 2018 ໄດ້ມີການຈັດຕັ້ງປະຕິບັດເປັນໄລຍະເວລາ 6 ປີ ເຊິ່ງເຫັນວ່າ: ເປັນບ່ອນອີງສຳຄັນໃນປັບປຸງການຈັດຕັ້ງ ກໍຄືການຄຸ້ມຄອງ, ຕິດຕາມ ແລະ ກວດກາ ການເຄື່ອນໄຫວວຽກງານຂອງທະນາຄານແຫ່ງ ສປປ ລາວ ເຊິ່ງເຮັດໃຫ້ການຈັດຕັ້ງປະຕິບັດນະໂຍບາຍເງິນຕາມີຄວາມຄ່ອງຕົວ, ການຄຸ້ມຄອງສະຖາບັນການເງິນມີຄວາມໝັ້ນຄົງ ແລະ ລະບົບການຊຳລະຂອງ ສປປ ລາວ ໄດ້ຮັບການພັດທະນາ ທັງດ້ານປະລິມານ ແລະ ຄຸນນະພາບ ເຊິ່ງສາມາດສັງລວມຫຍໍ້ຜົນສຳເລັດທີ່ພົ້ນເດັ່ນ ດັ່ງນີ້:
ໄດ້ສຳເລັດການປັບປຸງໂຄງປະກອບຂອງສະພາບໍລິຫານ ທີ່ເປັນການຈັດຕັ້ງສູງສຸດ ພ້ອມທັງສ້າງຕັ້ງ 3 ຄະນະກຳມະການ ຄື: 1 ຄະນະກຳມະການນະໂຍບາຍເງິນຕາ, 2 ຄະນະກຳມະການສະຖຽນລະພາບທາງດ້ານການເງິນ ແລະ 3 ຄະນະກຳມະການກວດກາ; ໄດ້ປັບປຸງກົດໝາຍ ຈໍານວນ 3 ສະບັບ ເພື່ອລົງເລິກການຄຸ້ມຄອງວຽກງານວິຊາສະເພາະ ຄື: ກົດໝາຍວ່າດ້ວຍທະນາຄານທຸລະກິດ, ກົດໝາຍວ່າດ້ວຍລະບົບການຊຳລະ ແລະ ກົດໝາຍວ່າດ້ວຍການຄຸ້ມຄອງເງິນຕາຕ່າງປະເທດ.
ນອກຈາກນີ້, ໄດ້ສ້າງດຳລັດວ່າດ້ວຍການເງິນ ແລະ ການບັນຊີ ຂອງທະນາຄານແຫ່ງ ສປປ ລາວ ແລະ ໄດ້ປັບປຸງດຳລັດວ່າດ້ວຍຄັງສຳຮອງເງິນຕາຕ່າງປະເທດ ຊຶ່ງເຮັດໃຫ້ການຄຸ້ມຄອງຄັງສຳຮອງເງິນຕາຕ່າງປະເທດ ມີທ່າອ່ຽງເພີ່ມຂຶ້ນ ແລະ ສາ ມາດກຸ້ມການນໍາເຂົ້າໄດ້ຫຼາຍຂຶ້ນ ຄື: ຈາກ 873,17 ລ້ານໂດລາ ໃນປີ 2018 ມາເປັນ 1.760ລ້ານໂດລາ ໃນເດືອນ 10/2024, ສາມາດກຸ້ມການນຳເຂົ້າເພີ່ມຂຶ້ນຈາກ 3,23 ເດືອນ ເປັນ 4,29 ເດືອນ. ນອກນີ້ ກໍໄດ້ປັບປຸງດຳລັດສະບັບອື່ນ ລວມທັງໝົດ 7 ສະບັບ’; ໄດ້ຈັດຕັ້ງປະຕິບັດນະໂຍບາຍເງິນຕາ ເພື່ອຮັກສາສະຖຽນລະພາບເງິນຕາແຫ່ງຊາດ ກໍຄືຄວບຄຸມອັດຕາເງິນເຟີ້ ດ້ວຍການນໍາໃຊ້ເຄື່ອງມືນະໂຍບາຍເງິນຕາ ແລະ ມາດຕະການໃຫ້ແທດເໝາະ ໃນແຕ່ລະໄລຍະ ໂດຍສະເພາະເຄື່ອງມືອັດຕາດອກເບ້ຍເລີ່ມມີປະສິດທິຜົນ; ໄດ້ຄຸ້ມຄອງສະຖາບັນການເງິນໃຫ້ມີຄວາມໝັ້ນຄົງ, ຮັບປະກັນການເຂົ້າເຖິງແຫຼ່ງທຶນ ແລະ ການບໍລິການທາງດ້ານການເງິນ. ປັດຈຸບັນ, ມີສະຖາບັນການເງິນທັງໝົດ 326 ແຫ່ງ. ໃນນັ້ນ, ມີ ທະນາຄານທຸລະກິດ35 ແຫ່ງ, ສະຖາບັນການເງິນທີ່ບໍ່ແມ່ນທະນາຄານ ແລະ ຫົວໜ່ວຍໃຫ້ບໍລິການຊຳລະ 291 ແຫ່ງ ແລະ ອື່ນໆ.
ທ່ານຍັງໄດ້ຍົກໃຫ້ເຫັນໂຄງປະກອບ ແລະ ບາງເນື້ອໃນສຳຄັນຂອງຮ່າງກົດໝາຍ ສະບັບປັບປຸງໃນຄັ້ງນີ້ປະກອບ ມີ 10 ພາກ, 10 ໝວດ ແລະ 89 ມາດຕາ ໂດຍໄດ້ປັບປຸງ55 ມາດຕາ (ປັບປຸງເນື້ອໃນ 36 ມາດຕາ ແລະ ປັບປຸງວິທີຂີດຂຽນ 19 ມາດຕາ), ເພີ່ມໃໝ່ 14 ມາດຕາ, ຮັກສາໄວ້ 20 ມາດຕາ. ໃນນັ້ນ, ໄດ້ໂຮມເຂົ້າກັບມາດຕາອື່ນ 3 ມາດຕາ ແລະ ຕັດອອກ 1 ມາດຕາ (ທຽບໃສ່ກົດໝາຍສະບັບປັດຈຸ ບັນ ປະກອບມີ 10 ພາກ, 7 ໝວດ ແລະ 79 ມາດຕາ). ສຳລັບມາດຕາທີ່ຕັດອອກ ແມ່ນມາດຕາ 48 ທີ່ກໍານົດກ່ຽວກັບການຄໍ້າປະກັນໃຫ້ແກ່ສະຖາບັນການເງິນໃນການກູ້ຢືມຈາກຕ່າງປະເທດ ຕາມການເຫັນດີຂອງລັດຖະບານ.
