-—————
ວັນທີ 28 ພະຈິກ 2024 ທີ່ຫໍປະຊຸມໃຫຍ່ຂອງແຂວງອັດຕະປື ໄດ້ມີພິທີໂຮມຊຸມນຸມປາຖະກະຖາຫວນຄືນມູນເຊື້ອວັນສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ຄົບຮອບ 49 ປີ (2 ທັນວາ 1975 – 2 ທັນວາ 2024) ແລະ ວັນເກີດປະທານ ໄກສອນ ພົມວິຫານ ຜູ້ນໍາທີ່ແສນເຄົາລົບຮັກຂອງປວງຊົນລາວທັງຊາດ ຄົບຮອບ 104 ປີ (13 ທັນວາ 1920-13 ທັນວາ 2024) ໂດຍການໃຫ້ກຽດເຂົ້າຮ່ວມ ພ້ອມບັນລະຍາຍເອກະສານຂອງ ສະຫາຍ ພົທ ວັນທອງ ກອງມະນີ ກຳມະການສູນກາງພັກ ເລຂາພັກແຂວງ ເຈົ້າແຂວງອັດຕະປື, ມີບັນດາສະຫາຍຮອງເລຂາພັກແຂວງ, ຄະນະປະຈໍາພັກແຂວງ, ກໍາມະການພັກແຂວງ, ການນຳຂະແໜງການອ້ອມຂ້າງແຂວງ, ຄະນະພັກຮາກຖານກຸ່ມບ້ານ, ນາຍບ້ານອ້ອມຂ້າງແຂວງ ແລະ ພະນັກງານອາວຸໂວບໍານານ ເຂົ້າຮ່ວມ.
ໃນພິທີ ສະຫາຍ ພົທ ວັນທອງ ກອງມະນີ ໄດ້ຍົກໃຫ້ເຫັນເຖິງມູນເຊື້ອ ແລະ ຄວາມສໍາຄັນຂອງວັນຊາດທີ 2 ທັນວາທຸກໆປີ ແມ່ນການສະຫຼອງວັນມະຫາໄຊ ອັນເຕັມໄປດ້ວຍຄວາມພາກພູມໃຈຂອງຄົນໃນຊາດ ເຊິ່ງໄດ້ມາຈາກການຕໍ່ສູ້ກູ້ຊາດ ອັນຍືດເຍື້ອຍາວນານ ຂອງບັນພະບູລຸດເຮົາ, ປະຊາຊົນລາວຜູ້ຮັກຊາດບັນດາເຜົ່າ ທີ່ໄດ້ຕໍ່ສູ້ດ້ວຍນຳໃຈເສຍສະຫຼະ ຈຶ່ງໄດ້ນຳເອົາວັນນີ້ມາໃຫ້ຊາດ, ມາໃຫ້ປະຊາຊົນເຮົາ ສະນັ້ນ ຕະຫຼອດໄລຍະ ແຫ່ງການປົກປັກຮັກສາ ແລະ ສ້າງສາພັດທະນາປະເທດຊາດ ຄົບຮອບ 49 ປີ ການພັດທະນາເສດຖະກິດ-ສັງຄົມຂອງແຂວງອັດຕະປື ແລະ ທິດທາງສືບຕໍ່ເສີມຂະຫຍາຍມູນເຊື້ອວັນຊາດທີ 2 ທັນວາ ເຂົ້າໃນການສ້າງສາພັດທະນາແມ່ນຍັງສືບຕໍ່ກໍ່ສ້າງໃຫ້ເຂັ້ມແຂງ ແລະ ມີຫັກການຂອງພັກຢ່າງສະເໝີຕົ້ນສະເໝີປາຍຕະຫຼອດໄປ.
ມູນເຊື້ອອັນພິລະອາດຫານ ແລະ ຜົນງານຂອງອາດິດປະທານ ໄກສອນ ພົມວິຫານ ແລະ ຜົນງານອັນໃຫຍ່ຫຼວງໃນພາລະກິດຕໍ່ສູ້ປົດປ່ອຍຊາດການປົກປັກຮັກສາ ແລະ ສ້າງສາພັດທະນາປະເທດຊາດ ເຊິ່ງການຫວນຄືນມູນເຊື້ອຂອງເພິ່ນແມ່ນເພື່ອເຮັດໃຫ້ບັນດາພະນັກງານຫຼັກແຫຼ່ງ ມີຄວາມຮັບຮູ້ ເຂົ້າໃຈ ແລະ ມີຄວາມເອກອ້າງທະນົງໃຈຕໍ່ມູນເຊື້ອປະຫວັດສາດ ແລະ ວິລະກຳຂອງບັນດາວິລະບູລຸດໃນອະດີດ ທີ່ໄດ້ສ້າງຜົນງານອັນໃຫຍ່ຫຼວງໄວ້ ຄຸນງານຄວາມດີອັນໃຫຍ່ຫຼວງຂອງທ່ານປະທານ ໄກສອນ ພົມວິຫານ ຜູ້ນຳທີເຄົາລົບຮັກຂອງພວກເຮົາ ສະມາຊິກພັກຄວນສືບຕໍ່ຮໍ່າຮຽນເອົາຄຸນສົມບັດ ທັດສະນະປະຕິວັດ ແບບແຜນໃນການນຳພາ ແບບແຜນການດຳລົງຊີວິດ ແລະ ອຸດົມຄະຕິປະຕິວັດຂອງທ່ານປະທານໄກສອນ ພົນວິຫານ ພະນັກງານຫຼັກຕ້ອງເສີມຂະຫຍາຍມູນເຊື້ອຮັກຊາດ ມູນເຊື້ອຕໍ່ອັນອົງອາດກ້າຫານມູນເຊື້ອສາມັກຄີພາຍໃນຊາດ ພາຍໃຕ້ການນຳພາຂອງພັກປະຊາຊົນປະຕິວັດລາວຕະຫຼອດໄປ.
ໂອກາດດຽວກັນໃນພິທີຍັງໄດ້ມອບຂອງຂວັນ ໃຫ້ບັນດາທ່ານອະດິດການນຳຂອງແຂວງ ເພື່ອເປັນການສະແດງຄວາມເຄົາລົບຮັກ, ກະຕັນຍູຮູ້ບຸນຄຸນຕໍ່ຜົນງານອັນໃຫຍ່ຫຼວງຂອງອາດີດການນຳທີ່ເພີ່ນໄດ້ນຳພາ-ຊີ້ນຳວຽກງານໃນເມື່ອກ່ອນອີກດ້ວຍ.
# ໂດຍ: ໄພບູນ
