ສະຫາຍ ພົນເຮືອເອກ ຕົ້ງຈຸນ ລັດຖະມົນຕີກະຊວງປ້ອງກັນ ປະເທດ ແຫ່ງ ສປ ຈີນ ພ້ອມດ້ວຍຄະນະໄດ້ທຳການ ເຄື່ອນໄຫວຢ້ຽມຢາມ ກອງບັນຊາການທະຫານແຂວງຫຼວງພະບາງໃນວັນທີ 23 ພະຈິກ 2024 ນີ້, ໂດຍມີ ສະຫາຍ ພົນໂທ ວົງຄໍາ ພົມມະກອນ ຮອງລັດຖະມົນຕີກະຊວງປ້ອງກັນປະເທດ ແຫ່ງ ສປປ ລາວ, ສະຫາຍ ພົນຈັດຕະວາ ວິລ່ຽມ ວົງທິສານ ຫົວໜ້າການທະຫານ ກອງບັນຊາການທະຫານແຂວງຫຼວງພະບາງ ພ້ອຄະນະໃຫ້ການຕ້ອນຮັບ.
ສະຫາຍ ພົນຈັດຕະວາ ວິລ່ຽມ ວົງທິສານ ໄດ້ຕີລາຄາສູງຕໍ່ການເດີນທາງມາຢ້ຽມຢາມ ກອງບັນຊາການທະຫານແຂວງຫຼວງ ພະບາງ ຂອງສະຫາຍ ພົນເຮືອເອກ ຕົ້ງຈຸນ ພ້ອມຄະນະ ໃນຄັ້ງນີ້ເຊິ່ງເປັນຂີດໝາຍອັນສຳຄັນໃນການສືບຕໍ່ເພີ່ມພູນຄູນ ສ້າງສາຍພົວພັນມິດຕະພາບການຮ່ວມມືຊ່ວຍເຫຼືອເຊິ່ງກັນ ແລະ ກັນ, ຄວາມສາມັກຄີຮັກແພງຖານບ້ານໃກ້ເຮືອນຄຽງຂອງສອງຊາດ, ສອງກອງທັບ ລາວ-ຈີນ ໃຫ້ນັບມື້ກ້າວເຂົ້າສູ່ລວງເລິກ, ພ້ອມທັງໄດ້ລາຍງານທີ່ຕັ້ງ, ພາລະບົດບາດ, ຂອບເຂດ, ສິດ ແລະ ໜ້າທີ່ຂອງກອງບັນຊາການທະຫານແຂວງຫຼວງພະບາງ ໃຫ້ຄະນະຜູ້ແທນໄດ້ຮັບຊາບ.
ໂອກາດນີ້, ສະຫາຍ ພົນເຮືອເອກ ຕົ້ງຈຸນ ໄດ້ສະແດງຄວາມຂອບໃຈຕໍ່ ຄະນະພັກ – ຄະນະບັນຊາ ກອງບັນຊາການທະຫານແຂວງຫຼວງພະບາງ ທີ່ໄດ້ໃຫ້ການຕ້ອນຮັບອັນອົບອຸ່ນ, ພ້ອມທັງໄດ້ອວຍພອນສາຍພົວພັນຂອງສອງພັກ, ສອງກອງທັບ ລາວ-ຈີນ ໃຫ້ກ້າວຂຶ້ນຢ່າງບໍ່ຢຸດຢັ້ງ.
ທີ່ມາ: ໜັງສືພິມກອງທັບປະຊາຊົນລາວ
