ທ່ານ ເພັດ ພົມພິພັກ ລັດຖະມົນຕີກະຊວງແຜນການ ແລະ ການລົງທຶນ(ຜທ) ໄດ້ຊີ້ແຈງຫລາຍບັນຫາທີ່ຕິດພັນກັບການຈັດສັນແຜນການລົງທຶນຂອງລັດ ປະຈໍາປີ 2025 ຢູ່ກອງປະຊຸມ ສະໄໝສາມັນເທື່ອທີ 8 ຂອງສະພາ ແຫ່ງຊາດ ຊຸດທີ IX ໃນຕອນບ່າຍວັນທີ 25 ພະຈິກ 2024 ເຊິ່ງປະກອບມີ 12 ກະຊວງ-ອົງການ ແລະ 18 ແຂວງ ໂດຍກວມເອົາເປົ້າໝາຍບຸລິມະສິດຂອງລັດຖະບານ ທີ່ມີກໍານົດຫລັກການ ແລະ ການຈັດສັນ ໃຫ້ມີຄວາມເປັນເອກະພາບ, ມີຈຸດສຸມ ແລະ ມີຄວາມຍຸຕິທໍາ. ໃນນັ້ນ, ຄວນກຳນົດອັດຕາສ່ວນຈັດສັນງົບປະ ມານ ໃຫ້ແກ່ການແກ້ໄຂໜີ້ສິນ ໂຄງການສຳເລັດ 100%, ໂຄງການສືບຕໍ່ ແລະ ໂຄງການໃໝ່ໆ.
ໃນນັ້ນ, ລັດຖະບານ ໄດ້ສຸມໃສ່ບັນດາເປົ້າໝາຍແຜນງານໂຄງການຕ່າງໆທີ່ເຫັນວ່າຍັງບໍ່ທັນໄດ້ຄາດໝາຍ, ໃນປີ 2025 ນີ້ ມີງົບປະມານລົງທຶນຂອງລັດທັງໝົດ ຈໍານວນ 5.300 ຕື້ກີບ ເພີ່ມຂຶ້ນ 6% ຖ້າທຽບໃສ່ປີ 2024 ແລະ ຕາມແຈ້ງການລ່າສຸດຂອງກະຊວງການເງິນຈະເພີ່ມໃຫ້ອີກ 150 ຕື້ກີບ, ດັ່ງນັ້ນງົບປະມານລົງທຶນລັດໃນປີ 2025 ຄາດວ່າຈະໄດ້ທັງໝົດຈໍານວນ 5.450 ຕື້ກີບ ເພື່ອເຮັດໃຫ້ການຈັດຕັ້ງປະຕິ ບັດມີຄວາມເປັນເອກະພາບກັນລັດຖະບານ ຈຶ່ງໄດ້ກໍານົດເປັນອັນລວມ ໃຫ້ຂະແໜງການ ແລະ ທ້ອງຖິ່ນເປັນຜູ້ຈັດສັນທຶນເຂົ້າຢູ່ໃນໂຄງການຕົວຈິງ, ໝາຍວ່າ ລັດຖະ ບານ ກໍານົດເພດານຕົວເລກລວມ ໂດຍບໍ່ໄດ້ຈັດສັນເອງ, ການຈັດສັນຕົວຈິງແມ່ນມອບໃຫ້ຂະແໜງການ ແລະ ທ້ອງຖິ່ນ ເປັນຜູ້ຈັດສັນເຂົ້າໃນໂຄງການບຸລິມະສິດຂອງຂະແໜງການ ກໍຄືທ້ອງຖິ່ນ, ໃນຈໍານວນ 5.300 ຕື້ກີບນີ້, ມີບ້ວງທຶນທົ່ວໄປ 3.150 ຕື້ກີບ, ໄດ້ຈັດສັນໃຫ້ 2 ກຸ່ມແຜນງານໃຫຍ່ ຄື: ກຸ່ມແຜນງານທີ 1 ຈັດສັນໃຫ້ບັນດາແຜນງານໂຄງການບຸລິມະສິດຂອງລັດຖະບານ ມີ 9 ເປົ້າໝາຍ ແລະ ກຸ່ມທີ 2 ຈັດສັນໃຫ້ບັນດາໂຄງການປົກກະຕິ ແລະ ໂຄງການເປົ້າໝາຍສະເພາະຂອງບັນດາກະ ຊວງ ແລະ ທ້ອງຖິ່ນ.
ໃນນີ້,ໃຫ້ບຸລິມະສິດໂຄງການສົມທົບທຶນກັບຕ່າງປະເທດ ຫລື ODA, ໂຄງການທີ່ມີປະສິທິຜົນມາງດ້ານເສດຖະກິດ ແລະ ໂຄງການສະໜັບສະໜູນການຈັດຕັ້ງປະຕິ ບັດສອງວາລະແຫ່ງຊາດ ເຊິ່ງໄດ້ຈັດສັນໄປຕາມບຸລິມະສິດ ໂດຍອີງໃສ່ທິດທາງບຸລິມະສິດຂອງແຜນພັດທະນາເສດຖະກິດ-ສັງຄົມ ແລະ ມະຕິຂອງກົມການເມືອງສູນກາງພັກ ເລກທີ 04 ວ່າດ້ວຍການສ້າງເສດຖະກິດເປັນເອກະລາດ ເປັນເຈົ້າຕົນເອງ ໃນໄລຍະໃໝ່ ແລະ ແກ້ໄຂຄວາມຫຍຸ້ງຍາກທາງດ້ານເສດຖະກິດການເງິນ ໃຫ້ບັນດາຂະແໜງການ ແລະ ທ້ອງຖິ່ນ, ກໍານົດຫລັກການບຸລິມະສິດ ແລະ ຈຸດສຸມຂອງການລົງທຶນໄວ້ໃນສັດສ່ວນທີ່ຊັດເຈນພໍສົມຄວນ ຕາມທີ່ໄດ້ລະບຸໄວ້ໃນຄໍາສັ່ງເລກທີ 12/ນຍ ແລະ ຄໍາແນະນໍາຂອງກະຊວງແຜນການ ແລະ ການລົງທຶນສະບັບເລກທີ 2034 ເຊິ່ງຫລັກການໃນການຈັດສັນທຶນໃຫ້ແກ່ໂຄງການລົງທຶນຂອງລັດ ແມ່ນຕ້ອງໄດ້ມີຈຸດສຸມ ແລະ ຫລີກລ່ຽງການແບ່ງສະເລ່ຍ ເພື່ອສຸມທຶນຮ່ອນເຂົ້າໃສ່ໂຄງການສືບຕໍ່ທີ່ມີການຊຸກຍູ້ໃຫ້ມີເສດຖະກິດ ແລະ ມີການຜະລິດເຕີບໂຕ ໂດຍສະເພາະແມ່ນໂຄງການໃກ້ຈະສໍາເລັດ ໃຫ້ສືບຕໍ່ສໍາເລັດເພື່ອໃຫ້ນໍາໃຊ້ໄດ້ໄວ.
ລັດຖະມົນຕີ ກະຊວງ ຜທ ໃຫ້ຮູ້ອີກວ່າ: ໃນປີ 2025 ສໍາລັບການຊໍາລະໜີ້ສິນ ແຕ່ປີ 2021 ຄືນຫລັງທີ່ມີມູນຄ່າຄ້າງຊໍາລະບໍ່ເກີນ 500 ລ້ານກີບ ເພື່ອໃຫ້ສິ້ນສຸດໂຄງການ ແລະ ປົດອອກຈາກແຜນພັດທະນາລົງທຶນຂອງລັດ ປີ 2024 ແມ່ນໃຫ້ລຶບລ້າງໂຄງການທີ່ມີໜີ້ສິນ 300 ລ້ານກີບ ເຊິ່ງປີ 2025 ແມ່ນສູ້ຊົນໃຫ້ໄດ້ລຶບລ້າງໂຄງ ການ 500 ລ້ານກີບ ເນື່ອງຈາກວ່າປີ 2025 ນີ້, ລັດຖະບານ ບໍ່ໄດ້ກໍານົດໂຄງປະກອບການລົງທຶນຂອງລັດ. ດັ່ງນັ້ນ,ກະ ຊວງແຜນການ ແລະ ການລົງທຶນ ຈຶ່ງໄດ້ແຈ້ງເພດານໃຫ້ກະຊວງອົງການ ແລະ ທ້ອງຖິ່ນ ເປັນຜູ້ຈັດສັນໃສ່ໂຄງການຂອງຕົນຕາມເງື່ອນໄຂຕົວຈິງຂອງແຕ່ລະພາກສ່ວນ ແລະ ໃຫ້ບຸລິມະສິດໂຄງການແກ້ໄຂໜີ້ສິນ ແລະ ໂຄງການສືບຕໍ່ໃກ້ຈະສໍາເລັດ, ໂຄງການຮີບດ່ວນ ແລະ ໂຄງການໃໝ່ ຖ້າມີຄວາມຈໍາເປັນແທ້ຕ້ອງໄດ້ສະເໜີໃຫ້ກະຊວງແຜນການ ແລະ ການລົງທຶນເພື່ອຄົ້ນຄວ້າສັງລວມຈັດລຽງບຸລິມະສິດ ແລະ ລາຍງານລັດຖະບານ ເພື່ອພິຈາລະນາອະນຸມັດ ເພື່ອບໍ່ໃຫ້ສ້າງໜີ້ສິນໃນຕໍ່ໜ້າອີກ. ສະນັ້ນ, ໃນປີ 2025 ຈັດສັນທຶນໃຫ້ສູນກາງ ແລະ ທ້ອງຖິ່ນມີສັດສ່ວນ ຄື: ສູນກາງ 13% ແລະ ໃຫ້ທ້ອງຖິ່ນ 57%, ຜ່ານການຈັດຕັ້ງປະຕິບັດສັດສ່ວນການແກ້ໄຂໜີ້ສິນ ການຈັດສັນໂຄງການແກ້ໄຂໜີ້ສິນມີຈໍານວນ 803,76 ຕື້ກີບ ກວມເອົາ 17,9%, ຈັດສັນໃຫ້ໂຄງການສືບຕໍ່ ຈໍານວນ 3.216 ຕື້ກີບ ເທົ່າກັບ 71,5%, ຈັດສັນໃຫ້ໂຄງການໃໝ່ຈໍານວນ 479 ຕື້ກີບ ກວມເອົາ 10,7% ເຊິ່ງລວມທັງໂຄງການຟື້ນຟູໄພພິບັດ.
