ຂປລ. ແຫລ່ງຂ່າວຈາກ ແຂວງອຸດົມໄຊ ໃຫ້ຮູ້ວ່າ: ຄະນະຮັບຜິດຊອບຈັດງານແຂ່ງຂັນກິລາ ມິດຕະພາບ ເພື່ອສຸຂະພາບ ແລະ ວັດທະນະທຳ ອະນຸພູມີພາກລຸ່ມແມ່ນ້ຳຂອງ ຄັ້ງທີ XII ທີ່ແຂວງອຸດົມໄຊ ໄດ້ເປັນເຈົ້າພາບ ໄດ້ຊ້ອມການສະແດງໃຫຍ່ ໃນວັນທີ 19 ພະຈິກ 2024 ທີ່ເດີນກິລາແຂວງອຸດົມໄຊ ເພື່ອກຽມຄວາມພ້ອມແກ່ງານແຂ່ງຂັນດັ່ງກ່າວ ຊຶ່ງຈະຈັດຂຶ້ນໃນລະຫວ່າງວັນທີ 23-24 ພະຈິກ 2024 ທີ່ຈະມາເຖິງນີ້ ໂດຍຈະມີນັກກິລາ ຈາກ ສສ ຫວຽດນາມ, ຣາຊະອານາຈັກໄທ, ນັກກິລາຈາກໂຮງຮຽນ ແລະ ວິທະຍາໄລສາທາລະນະສຸກ ພາຍໃນ ສປປ ລາວ ເຂົ້າຮ່ວມ.
ທ່ານ ຫຸມພັນ ອິນທະມຸງຄຸນ ຫົວໜ້າພະແນກສາທາລະນະສຸກ ແຂວງອຸດົມໄຊ ໄດ້ກ່າວວ່າ: ຈຸດປະສົງ ການຊ້ອມການສະແດງຄັ້ງນີ້, ເພື່ອສະແດງຜ່ານອະນຸກຳມະການຈັດງານ ເປັນຕົ້ນ ການຝຶກຊ້ອມຂອງກ້ອນກຳລັງ ສວນສະໜາມ ແລະ ບົດຟ້ອນຕ່າງໆ ເພື່ອໃຫ້ມີຄວາມພ້ອມທຸກດ້ານ, ຊຶ່ງຈຸດປະສົງຂອງການຈັດງານຄັ້ງນີ້ ກໍເພື່ອເປັນການສົ່ງເສີມສາຍພົວພັນຮ່ວມມື ລະຫວ່າງສະຖາບັນການສຶກສາ ສາທາລະນະສຸກພາຍໃນປະເທດ ແລະ ບັນດາປະເທດລຸ່ມແມ່ນໍ້າຂອງ ຜ່ານຂະບວນການກິລາ ແລະ ວັດທະນະທຳ ທັງເປັນການສົ່ງເສີມສຸຂະພາບຂອງຜູ້ເຂົ້າຮ່ວມແຂ່ງຂັນກິລາຄັ້ງນີ້ ພ້ອມນີ້, ຍັງເປັນການເຜີຍແຜ່ວັດທະນະທຳ ແລະ ຮີດຄອງປະເພນີອັນດີງາມຕໍ່ຜູ້ເຂົ້າຮ່ວມ ທັງພາຍໃນ ແລະ ຕ່າງປະເທດ, ສ້າງຄວາມຮູ້, ຄວາມສາມາດ ແລະ ປະສົບການ ແກ່ນັກສຶກສາ ສາທາລະນະສຸກ ອຸດົມໄຊ ແລະ ຄູອາຈານ ໃນການບໍລິຫານຄຸ້ມຄອງງານແຂ່ງຂັນກິລາ
